စပ်ကဵုပရေၚ်ဗလးပ္တိတ်ဍာ်ပရေံပရေံ ဖူကူယှဳမာဂှ်တုဲ အလဵုအသဳဂျပါန် လလောၚ်ပ္တိတ် ပရေၚ်ဘပဠကော်ဖုၚ်ဍုၚ်ကြုက်

တိုဝ်ကျိုဝ်၊ အဝ်ဂါတ် (၃၀)

ကြဴနူဖူကူယှဳမာ ဗလးပ္တိတ်ဍာ်ပရေံပရေံတုဲဂှ် ဖုၚ်ကော်နၚ် ခယျကေတ်နူကဵုဍုၚ်ကြုက်မွဲ ဘပဠဟီုဂးလဝ်ဂှ် ဂွံဒုၚ်လဝ်တဲ ဂၠိုၚ်ကဵုဝါရောၚ် အလဵုအသဳဂျပါန် ဟီုဂးလဝ်ရ။

လ္ပာ်ရုၚ်ကလုတ်ကြုက် မၞုံဍုၚ်တိုဝ်ကျိုဝ်ဂှ်လေဝ် ဒဒှ်ရဂွံဒုၚ်လဝ်တဲဖုၚ်ပလာပ်ပထုဲ ဇရေၚ်အလဵုအသဳဂျပါန်ကီုရောၚ်ဂှ် ခၠေဝ်ပလန်ဟီုဂးလဝ်ရ။

“ဖုၚ်ကော်နၚ် နူကဵုဍုၚ်ကြုက် မဘပဠဒၟံၚ် ဗွဲမဂၠိုၚ်ဂၠေၚ်ဂှ် ဂျပါန် ဂွံဒုၚ်လဝ်တဲရ။ နကဵုဌာနနူကဵုမဆေၚ်စပ်တံလေဝ် စိုတ်အိုတ်ဗွဲမလောန်တုဲ သီုကဵုဒးဂွိၚ်ဒၟံၚ်တံလေဝ် နွံရ” သာ်ဝွံ ညးမၞုံအခေါၚ်ဟီုဂး အလဵုအသဳ ဇၞော်သ္ကိုပ်ဂကောံအလဵုအသဳဂျပါန် ဟီုဂးလဝ် ပ္ဍဲကဵုပေါဲသောၚ်ကလးလိက်ပရိုၚ်ရ။

နကဵုဌာနဝန်ဇၞော်ကာဍုၚ်သ္အာၚ်ဂျပါန် ဟိုတ်ပရေၚ်ကော်ဖုၚ်သာ်ဏံတုဲ ဒဒှ်ရဒးကော်လဝ် ကလုတ်တမာန်ကြုက်ဂှ်လေဝ် ဌာနဝန်ဇၞော်ဂှ် လလောၚ်ပ္တိတ်လဝ်ရ။

စပ်ကဵုပရူဒဒှ်ဏံတုဲ ညးမၞုံအခေါၚ်ဟီုဂး ဝန်ဇၞော်ကာဍုၚ်သ္အာၚ်ကြုက်ဂှ် ဒဒှ်ရဟွံတီကေတ်ဂှ် ခၠေဝ်ပၠန်လဝ်တုဲ နကဵုရုၚ်ကလုတ်ကြုက် ဖျေံသ္ဇိုၚ်တိုဝ်ကျိုဝ်ဂှ် ဂွံဒုၚ်လဝ်တဲဖုၚ်ဘပဠ ဇရေၚ်အလဵုအသဳဂျပါန်ဂှ် သ္ဂးကၠုၚ်ရ။ ပြဝကော်ဖုၚ်သာ်ဏံဂှ် သ္ကဵုဒှ်တဴ ပလာပ်ပထုဲ ကုကမၠောန်ရုၚ်ကလုတ်ဂှ်ဂးတုဲ ကလေၚ်လလောၚ်ပ္တိတ်လဝ် တၚ်လလောၚ်တြးမွဲတုဲ ဟီုဂးလဝ်ရ။

ပ္ဍဲကဵုတၚ်လလောၚ်တြး အလဵုအသဳဂျပါန်ဂှ် ဖုၚ်ဘပဠကော်နၚ်တံဂှ် ဒဵုကဵုဂကောံဂျပါန် ဖျေံသ္ဇိုၚ်ဍုၚ်ကြုက်တံလေဝ် ဂွံဒုၚ်လဝ်တဲကီုတုဲ ညံၚ်ပရေၚ်ဂီုကၠီု ညးဍုၚ်ကွာန်ဂျပါန်တံ ဂွံနွံ ရေၚ်တၠုၚ်လဝ်ရောၚ် ဂွံတီကေတ်ရ။

ပ္ဍဲကဵုၝောံခန်ဍုၚ်ဖူကူယှဳမာဂှ် ဗလးပ္တိတ်ဍာ်ပရေံပရေံတုဲ ဂွံမွဲတ္ၚဲဂှ် စဂွံဒုၚ်လဝ်တဲဖုၚ် စနူကဵု +86 code ဍုၚ်ကြုက်ဂှ်တုဲ ဖုၚ်ကော်နၚ်ဂှ် ၂၀၀ ပြၚ်နွံလဝ်ရောၚ် သ္ဂးရ။

ဟိုတ်နူပရေၚ်ကော်သာ်ဏံတုဲ ဒဒှ်ရသ္ကဵုဒှ်တဴ ပလာပ်ပထုဲ ကုကမၠောန် ညးယိုက်ဝန်ဍုၚ်တံရောၚ်ဂှ် သၞာဲဒဴဍုၚ်ဇၞော်ဂှ်မွဲတၠ ဟီုဂးလဝ်ရ။

သ္အာၚ်နူဂှ်ပၠန် ဒဵုကဵုအခိၚ်လၟုဟ် လၟေၚ်ဒဒှ်ကော်ဖုၚ်လအာတုပ်သာ်ဏံတံ ဒဒှ်ရက္တဵုဒှ်ဒၟံၚ် အလုံဍုၚ်ဂျပါန်မွဲပြးဇးဂှ်လေဝ် ဟီုဂးလဝ်ရ။

စပ်ကဵုအကာဲအရာဏံတုဲ ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ကြုက် ဝန်ဝဳဗေန်ဂှ် “နကဵုကြုက် အခေါၚ်အရာ ကောန်ဍုၚ်သ္အာၚ် မၞုံအပ္ဍဲဍုၚ်တံကဵု ဒတုဲဖဵုတံဂှ် ကဵုလဝ်ဂီုကၠီု လ္ဂောံကဵုသၞောဝ်လၟိုန်ရောၚ်” သာ်ဝွံ ဟီုဂးလဝ်ရ။

ဍာ်ပရေံပရေံတံဂှ် သ္အးဇ္ၚးနူကဵုထၟာဲဓာတ်ဖူကူယှဳမာဂှ်တုဲမှ ဒဒှ်ရဗလးပ္တိတ်လဝ်ဂှ် ဂျပါန်ဟီုဂးလဝ်ကီုလေဝ် ဍာ်ပရေံပရေံတံဏံ ဒဒှ်ရဘဲဟွံမွဲ ဟွံထ္ၜးလဝ်သက်သဳဂှ်ရ ကပေါတ်ဂျပါန် တိတ်နူဍာ်သီုဖအိုတ်တံဂှ် ကၟာတ်လဒဵုတာဒၞါလဝ်ရောၚ် ကြုက် ဟီုဂးလဝ်ရ။

Ref: CNA