သ္ၚိကောန်ဒပ်ပၠန်ဂတး ပ္ဍဲတွဵုရးဍုၚ်မန်တအ် ဒးဒုၚ်ကၟာတ်ဒၞာကၠေတ်ဆက်ကၠုၚ်

မတ်မလီု၊ အဝ်ဂါတ်(၃၁)

သ္ၚိဒၟံၚ်ကောန်ဒပ်ပၠန်ဂတး မၞုံပ္ဍဲတွဵုရးဍုၚ်မန် ဗတိုက်ပၠန်ဂတးပ္တိတ်ဒၟံၚ် ဒပ်ကံၚ်ဇြဳပၞာန် ကေတ်လဝ်ဇြဟတ်လွဟ်တုဲ သီလဝ်အဝဵုကၟိန် သွာၚ်နာနာတအ်ဂှ် နူလ္ပာ်ကံၚ်ဇြဳပၞာန် ကၠောန်သ္ပဒၟံၚ် ပရေၚ်ကၟာတ်ဒၞာ ကၠေတ်ဆက်ကၠုၚ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၂၉)တုဲကၠုၚ်တေံ သ္ၚိဒၟံၚ် ကေုာံ ဂိုဝ်ဒေါၚ် ကိုဝ်ယာန်ယှေန်အောၚ် ကောန်ဒပ် ဂကောံဇြဟတ်ပၠန်ဂတးကျာ်ထဝ်(KRF) မၞုံအရာပ်တောၚ်ဒူသု ဍုၚ်ကျာ်ထဝ်ဂှ် ကံၚ်ဇြဳပၞာန် ကၠုၚ်စိုပ်ကၟာတ်ဒၞာလဝ်ရ။

သ္အာၚ်နူဂှ်ပၠန် ပ္ဍဲဂိတုအဝ်ဂါတ် စၟတ်တ္ၚဲ (၂၈) ဂှ်လေဝ် ကၟာတ်ဒၞာလဝ် သ္ၚိဒၟံၚ်ကိုဝ်သိုဝ်ထိုက်အောၚ် ကောန်ဒပ်စဵုဒၞားညဍုၚ်ကွာန် ပွိုၚ်ဍုၚ်ပံၚ် ကွာန်ဥတ္တတာရ။

ပ္ဍဲဂိတုအဝ်ဂါတ် စၟတ်တ္ၚဲ (၁၇) ဂှ်လေဝ် သ္ၚိဒၟံၚ်ခါမ်သဳ ကိုတ်ယျေဝ်တွေညဳ ညးတာလျိုၚ် ဂကောံဇြဟတ်ပၠန်ဂတးကျာ်ထဝ် မၞုံအရာပ်သ္ကုတ်သၟဝ်ကျာ ဍုၚ်ကျာ်ထဝ်ဂှ်လေဝ် နကဵုတၚ်ထ္ၜးဟိုတ်ညးကေၚ်မံၚ်လဝ်ဂးတုဲ ကၟာတ်ဒၞာလဝ်ရ။

ကောန်ဒပ် KRF ကိုဝ်ယာန်ယှောၚ်ဂှ်မ္ဂး ဒပ်ကံၚ်ဇြဳပၞာန်ဒးဂိဒၟံၚ် ပ္ဍဲပေါဲဗတိုက်ဗလးမုက်တိဂှ် သွက်ဂွံပၠုပ်စိုတ်ဖေက် ပ္ဍဲညးဍုၚ်ကွာန်တအ်ဂှ် ဗက်ဂၠာဲကၟာတ်ဒၞာဒၟံၚ် သ္ၚိဒၟံၚ်ကောန်ဒပ်ပၠန်ဂတးတအ်တုဲ ပ္ဍဲလ္တူဏံ သွက်ဂွံဒးဟီုဂး တၟေၚ်ၚ်တၟဟ်ဟ်ဟၟဲရဂှ် သ္ဂးလဝ်ရ။

ကောန်ဒပ်ပၠန်ဂတး ဒးဒုၚ်ကၟာတ်ဒၞာလဝ်သ္ၚိဒၟံၚ်တအ်ဂှ် ဒပ်ကံၚ်ဇြဳပၞာန် ပံက်လဝ်ဂဗုတ်ကြဴမုက် နကဵုၝောံပိုဒ်ဗတိုက်သရိုဟ်ပွပ္ကီုပရာပ် ဖျေံဒဏ်ဂစိုတ်ကီု သီုဒဏ်ထံၚ်စဵုကဵုမွဲအယုက်မာန် နကဵုၝောံပိုဒ်နာနာသာ်ရ။

သြၚ်လောန်တိုၚ်(မ်)ဂှ် အတိုၚ်စရၚ်ၜိုတ်ဍစိုပ်ပကောံပ္ကေဝ်လဝ်ဂှ်မ္ဂး ပ္ဍဲမွဲကာလဒပ်ပၞာန်သီအဝဵုဏံ သ္ၚိဒၟံၚ်ကောန်ဒပ်ပၠန်ဂတး မၞုံပ္ဍဲတွဵုရးဍုၚ်မန် ဗ္ဒာဲ (၅၀) ဒးဒုၚ်ကၟာတ်ဒၞာလဝ်ရ။

ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP)ဂှ်မ္ဂး ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ၚ်ဏံ အလုံမွဲကၟိန်ဍုၚ် သ္ၚိဒၟံၚ် ကေုာံ ပရေၚ်ပိုၚ်ပြဳအဇာဇၞော် (၇၅၀) ပြၚ် ဒးဒုၚ်ကၟာတ်ဒၞာလဝ်ရဂှ် လလောၚ်တြးလဝ် ပ္ဍဲဂိတုဨဗြဴတုဲကၠုၚ် စၟတ်တ္ၚဲ (၂၅)ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media