ဒပ်ကံၚ်ဇြဳပၞာန်ပ္တိတ်ကေတ်ဒၟံၚ်ဆု ပ္ဍဲယေန်မာပေန်ဂှ် ဒးဒုၚ်ဗတိုက် ချိုတ်လဝ်(၇)တၠ

​ယေန်မာပေန် – အဝ်ဂါတ်(၃၁)

ရးဒေသသေတ်ဂါၚ်၊ ပွိုၚ်ဍုၚ်ယေန်မာပေန် ပ္ဍဲဗွိုၚ်ဂြိုပ်ဆုသဳဒူ ဒပ်ကံၚ်ဇြဳပၞာန် ပ္တိတ်ကေတ်ဒၟံၚ်ဆုဂှ် ဒးဒုၚ်ဗတိုက်တုဲ ဒးချိုတ်လဝ် (၇)တၠရဂှ် ဒပ်မဟာ KLG လလောၚ်တြးလဝ် ပရိုၚ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၂၉)တုဲကၠုၚ်တေံ အခိၚ်နူဂယးဂှ် ဒပ်ကံၚ်ဇြဳပၞာန်ပ္တိတ်ကေတ်ဒၟံၚ်ဆု ကရောၚ်ပၞာန်အာဂတ ဇြဟ်မၞုံ (၃၅)တၠဂှ် ဟိုတ်နူလုပ်စိုပ်ဂၠိုက်ဂၠာဲဒၟံၚ် ပ္ဍဲသ္ၚိဒၟံၚ်ညးဍုၚ်ကွာန်တအ်တုဲ ဂကောံဇြဟတ်ပၠန်ဂတးတအ် ဗတိုက်လဝ်ရ။

ပ္ဍဲပေါဲဗတိုက်ဂှ် လအ်ပွိုၚ် (၁၅)မိနေတ်တုဲ သီဂွံလဝ် နူဒပ်ကံၚ်ဇြဳပၞာန် MA 11 မွဲဒကိုအ်၊ ဖျေဲမကမ် ၃ ဖျေဲ၊ ပလောံဒၞာကမ် ၂ ဂတှ်ေ၊ ဖုၚ်တဲ ၃ မ၊ ထိုၚ်ကၟာဲ ၁ မ၊ ထိုၚ်လှုဲခွက် ၁ မ၊ သြန်ဒ္ကေဝ်ဗၟာလ္ၚဵု၊ သြန်ၝာတ်သေံ ၅၀ ကေုာံ ကပေါတ်ထဝ်တအ်ရဂှ် ဓမံက်လဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ပ္ဍဲကဵုပေါဲဗတိုက်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၇)တၠတုဲ ဟွံအောန်နူ(၇)တၠ ဇီုကပိုက်ဒးလဝ်ဘဲဝပ်ရဂှ် ၜိုန်ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာ ဟွံမာန်ရ။

ဒပ်ကံၚ်ဇြဳပၞာန် ပ္တိတ်ကေတ်ဒၟံၚ်ဆုဂှ် သ္ကိုပ်ကရောၚ်ပၞာန် ULF (ဒပ်ပံၚ်ကောံ) ဗိုလ်နိုၚ်မေန် က္ဍိုက်က္ဍိုပ်တုဲ ကရောၚ်ပၞာန် Comrade၊ ကရောၚ်ပၞာန် KLG၊ ကရောၚ်ပၞာန် Alpha ကေုာံ PDF B-21 (တံဒပ် ၁၇)၊ PDA (တံဒပ် ၃၅)၊ ဒပ်ဗိုလ်နှခါန်မှိုဲ၊ GZ ချေန်တွောန်၊ LPDF တေမေန်တမာန် မဒှ်မဟာမိတ်ဒေသတအ် ပံၚ်တောဲဗတိုက်လဝ်တုဲ ပရေၚ်ဇီုကပိုက်ဒးပြဟ်လလုဲလဝ် ဟၟဲရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KLG