ပ္ဍဲပေါဲဗတိုက်ဒှ်လဝ်ကဵု TNLA ဂှ် ပရေၚ်ဇီုကပိုက် လ္ပာ်ကံၚ်ဇြဳပၞာန် ဒးချိုတ်လဝ်ဂၠိုၚ်ဒၟံၚ်ဂှ် လလောၚ်တြးလဝ်

မူသေဝ် – အဝ်ဂါတ် (၃၁)

တွဵုရးသေံသၟဝ်ကျာ၊ ပ္ဍဲပွိုၚ်ဍုၚ်မူသေဝ် ကေုာံ ပွိုၚ်ဍုၚ်ကွောတ်ခိုၚ်တအ်ဂှ် ဒပ်ပၞာန်တအာၚ် (TNLA) ကေုာံ ဒပ်ကံၚ်ဇြဳပၞာန်တအ် ဒှ်လဝ်ပေါဲဗတိုက်ဆေၚ်မုက်တုဲ ပရေၚ်ဇီုကပိုက် လ္ပာ်ကံၚ်ဇြဳပၞာန် ဒးချိုတ်လဝ်ဂၠိုၚ်ဒၟံၚ်ရဂှ် TNLA လလောၚ်တြးလဝ် ပရိုၚ်ရ။

ဒပ်ပံၚ်တောဲ ကံၚ်ဇြဳပၞာန်ကဵု ပၞာန်ညးဍုၚ်ကွာန်တအ်ဂှ် ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲဒဵုလွေဝ်တေဝ်မုၚ် TNLA ဖျေံလဝ်သ္ဇိုၚ်ဂှ် နဇြဟတ်ပေၚ်ၚ်တုဲ ပ္ဍဲဗ္ဒာဲကွာန်နာထာန် ကေုာံ ကွာန်ဇြေဝ်လာန်ဂှ် ပေါဲဗတိုက်က္တဵုဒှ်လဝ် (၂)ဝါတုဲ ကေုာံ ဒပ်ကံၚ်ဇြဳပၞာန် ထ္ပက်စှ်ေကၠုၚ်ကရောၚ်ပၞာန် ပ္ဍဲလွယ်နဝ်ဖောၚ် ပွိုၚ်ဍုၚ်ကွောတ်ခိုၚ်ဂှ်လေဝ် ဒှ်လဝ်ပေါဲဗတိုက် ဗ္ဒာဲကွာန်ခိုဝ်မုမ်ရဂှ် ဂွံတီကေတ်ရ။

ပ္ဍဲကဵုပေါဲဗတိုက်ဆေၚ်မုက် က္တဵုဒှ်လဝ် ပ္ဍဲဂိတုအဝ်ဂါတ် စၟတ်တ္ၚဲ (၂၉)ဂှ် လ္ပာ်ကံၚ်ဇြဳပၞာန် ပန်ဖျေံလဝ်လွဟ်ဇၞော် အပံၚ်လၟိဟ် (၆၀)ဝါပြၚ်တုဲ ပရေၚ်ဗတိုက်ပန်ကဵုက္ၜၚ်ကျာလေဝ် နွံလဝ်ရဂှ် ဓမံက်လဝ် ပ္ဍဲတၚ်လလောၚ်တြး TNLA ရ။

ဟိုတ်နူလွဟ်ဇၞော်ဒပ်ကံၚ်ဇြဳပၞာန်ပန်ဖျေံလဝ်တုဲ သ္ၚိဒၟံၚ်ညးဒေသ ကွာန်ဇြေဝ်လတအ် ဒးလီုလာ်လဝ်တုဲ ဟိုတ်နူပရေၚ်ဇီုကပိုက်ဒးလဝ်မၞိဟ် နွံဒၟံၚ်ဂှ် ဒးဂြိပ်ပါဲဒဴဒၟံၚ် သီုအလုံကွာန်လေဝ် နွံဒၟံၚ်ရဂှ် ဂွံတီကေတ်ရ။

ဟိုတ်နူပရေၚ်ဒပ်ကံၚ်ဇြဳပၞာန် ဗတိုက်ဒၟံၚ်ဗီုပြၚ်ဏံတုဲ နူလ္ပာ် TNLA ဟိုတ်နူက္လေၚ်ထ္ပက်လဝ်ကရောၚ်ပၞာန် ပ္ဍဲဗဒိုပ်ပၞာန်ဇြေဝ်လ ကေုာံ ဏာမ်ဖေတ်ကာ ပွိုၚ်ဍုၚ်ကွောတ်ခိုၚ်တုဲ ဗတိုက်လဝ်ဂှ်ရ ပရေၚ်ဇီုကပိုက် လ္ပာ်ကံၚ်ဇြဳပၞာန် ဒးချိုတ်လဝ်ဂၠိုၚ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန်သီအဝဵုကဵု ဒပ်ပၞာန်တအာၚ် (TNLA) တအ်ဂှ် ပ္ဍဲကဵုဂိတုဂျူလာၚ်တုဲကၠုၚ်ဏံ ပေါဲဗတိုက်တအ် က္တဵုဒှ်ကၠုၚ်ဒၟံၚ်တုဲ ပ္ဍဲဂိတုအဝ်ဂါတ်ဂှ်မ္ဂး ပရေၚ်ဆေၚ်မုက် စဵုကဵု (၁၈)ဝါ နွံလဝ်တုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ်ဂၠိုၚ်ဒၟံၚ်ရဂှ် ဂွံတီကေတ်ရ။

စပ်ကဵုအကာဲအရာပေါဲဗတိုက်ဗလးမုက်တိ ပြဟ်ဟ်လၟုဟ်တုဲ နကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်လဝ်ကဵု ဒပ်ကံၚ်ဇြဳပၞာန် ကေုာံ ဒပ်ပၞာန်တအာၚ် (TNLA)ကီုလေဝ် သီုၜါလ္ပာ် က္လေၚ်ဟီုသှ်ကဵုလဝ် ဟၟဲရ။

ပရိုၚ် – သြၚ်လောန်တိုၚ်(မ်)

ဗီုရုပ် – TNLA