ၜဳကလေၚ်၊ အဝ်ဂါတ် (၃၁)
အပ္ဍဲပရေၚ်ပန်ပှော် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA ပ္ဍဲကဵုဂၠံၚ်ကာလ္ဂုၚ်−မတ်မလီု ကွာန်ဝေန်ပျာန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ယာန်ဖ္ဍိုက်မၞိဟ်ယဲမွဲဖ္ဍိုက် ဒးဒုၚ်ပန်လဝ် အကြာရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုအဝ်ဂါတ် ၂၉ တေံ ရေၚ်ကွဳစက်ကံၚ်ဇြဳပၞာန် ကွဳစက် ၅ ဖ္ဍိုက်ပါလုပ် မဒဳကၠုၚ် နူကဵုကျာ်ထဝ် အာလ္ပာ်သဓီုဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဟိုတ်နူကြတ်ဗ္တိုက်လဝ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ်ရ။
အပ္ဍဲပရေၚ်ပန်ပှော်ၜါလ္ပာ်ဏံဂှ် ဟိုတ်နူကွဳစက်ရီုဗၚ်ပရေၚ်မှာဇန် (တောၚ်တန်းမေတ္တာ) ဒးဒုၚ်ပန်လဝ်အကြာဂှ်ရ မၞိဟ်ယဲ အာယုက် ၄၅ သၞာံ ဒဝ်ယှိုဲဇြေန် မပါဗက်ကၠုၚ်လ္တူကွဳစက်ဂှ် ဒးမကမ်ကလိဂွံလဝ်ဝပ်ရ။
မၞိဟ်ယဲဒဝ်ယှိုဲဇြေန် ကလိဂွံလဝ်ဝပ် မကမ်သေနာတ်ကၠိုဟ်အာဂှ် တိုန်စိုပ်လွဳဒၟံၚ် ပ္ဍဲကဵုရုၚ်ဂဥုဲညးဍုၚ်ကွာန်ခရိုၚ်သဓီုရောၚ် ဂွံတီကေတ်ရ။
အပ္ဍဲကဵုလၟေၚ်ဒဒှ် ရေၚ်ကွဳစက်ကံၚ်ဇြဳပၞာန် ဒးဒုၚ်ဗ္တိုက်အကြာဂှ် ကောန်ဒပ်ကံၚ်ဇြဳပၞာန်မွဲတၠ ကလိဂွံလဝ်ဝပ်တုဲ ကွဳစက်ပၞာန်မွဲဖ္ဍိုက်လေဝ် သၠာလက္ကရဴဗ္တိုဟ်ထ္ကးအာဂှ် ညးဒေသတံ ဟီုဂးလဝ်ရ။
ဒပ်ကံၚ်ဇြဳပၞာန် မဒးဒုၚ်ကြတ်ဗ္တိုက်ဂှ်ဝွံ ကၠောန်သ္ပပန်ပှော်ဏာလဝ် မွဲဒမြိပ်ဂၠံၚ်ကွဳစက် လ္ဂုၚ်−မတ်မလီုတံဂှ် ညးအာတရဴတံ ဟီုရ။
တုဲကၠုၚ် ပ္ဍဲဂိတုအဝ်ဂါတ် ၂၄ တေံဂှ်လေဝ် ပ္ဍဲကဵုသ္ကုတ်ဂၠံၚ်ရေဝ်−ဇြပ်ဗု၊ ကွာန်(လိမ္မော်ခြံ) ၊ ပွိုၚ်ဍုၚ်ရေဝ်ဂှ် ကွဳစက်ညးအာတရဴမွဲဖ္ဍိုက် ဒးဒုၚ်ပန်လဝ်တုဲ ညးအာတရဴ ၂ တၠ ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai