ပ္ဍဲပွိုၚ်ဍုၚ်ယှိုဲကျေန် ဟိုတ်နူလွဟ်ဇၞော်စှ်ေတုဲ ပါလုပ်သီုကောန်ၚာ်သၟတ်မွဲတၠ ကောန်အရာပ် ၂ တၠဒးချိုတ်လဝ်

ညံၚ်လေဝ်ပေန်၊ အဝ်ဂါတ်(၃၁)

ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU၊ ပ္ဍဲပွိုၚ်ဍုၚ်ယှိုဲကျေန်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ပါလုပ်သီုကောန်ၚာ်မွဲတၠ ကောန်အရာပ် (၂) တၠ ဒးချိုတ်လဝ်ရဂှ် ဗဟဵု KNU လလောၚ်တြးလဝ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၂၉) တုဲကၠုၚ်တေံဂှ် သီုပေါဲဗတိုက်ဟၟဲမွဲသာ် နူကဵုတံဒပ်ပၞာန်တိုက်ကံၚ်ဇြဳပၞာန် ခလရ (၂၆၄) ပန်ဖျေံဏာလွဟ်ဇၞော် ပ္ဍဲကွာန်ပျေန်ယျေဂျဳ ပွိုၚ်ဍုၚ်ယှိုဲကျေန် KNU ဗၞတ် (၃) ဝါရ။

ဟိုတ်နူလွဟ်ဇၞော်ကံၚ်ဇြဳပၞာန်ပန်ဖျေံဏာလဝ်ဂှ်တုဲ ကောန်ၚာ်အယုက် (၇)သၞာံမွဲတၠ ကေုာံ မၞိဟ်ဗြဴမွဲတၠတအ်ဂှ် ဒးဘဲလွဟ်မကမ် ဒးချိုတ်လဝ်တုဲ ပါလုပ်သီုမၞိဟ်ဗြဴမွဲတၠ ကောန်အရာပ် (၃) တၠ ဇီုကပိုက်ဒးလဝ်ဘဲဝပ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ်တုဲ သ္ၚိဒၟံၚ်ညးဍုၚ်ကွာန်ပိုၚ် မၞုံပ္ဍဲကွာန်ယျေတွောန်ကုမ် ကေုာံ ပျေန်ယျေဂျဳ ဟွံအောန်နူ (၃) မ ဇီုကပိုက် ဒးလီုလာ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲကဵုတ္ၚဲဂှ်လေဝ် ပ္ဍဲကွာန်လေတ်တေတ်ဂျဳ၊ ပွိုၚ်ဍုၚ်မုမ် KNU ဂှ် ဟိုတ်နူတံဒပ်ကံၚ်ဇြဳပၞာန် ခမရ (၄၃၉)ပန်ဖျေံလဝ်လွဟ်ဇၞော်တုဲ ကောန်ကွာန်မွဲတၠ ဇီုကပိုက်ဒးလဝ်မကမ်လွဟ်ဇၞော်တုဲ ဂွံလဝ်ဘဲဝပ်ရဂှ် ဂွံတီကေတ်အတိုၚ်တၚ်လလောၚ်တြးဂှ်ရ။

ပ္ဍဲခရိုၚ်ညံၚ်လေဝ်ပေန် KNU ဂှ် ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန် ပန်ပှ်ောဗတိုက်ဒၟံၚ်တုဲ သွက်ကောန်အရာပ်ညးဍုၚ်ကွာန်တအ်ဂှ် ပရေၚ်ဖေက်ဂၟံက် ကေုာံ ပရေၚ်ဂီုကၠီုဗၠးဘဲဟၟဲ က္တဵုဒှ်ဒၟံၚ်တုဲ ဒးဆေၚ်ဒၟံၚ်မုက်ကဵု တၚ်ကော်ချဴ ပါလုပ်သီုပရေၚ်စသုၚ်မံၚ်စံၚ်ကီု သီုသွက်သ္ဂောံက္လိဂွံဂဥုဲဇဗရုံဂပ် ဗွဲမဂၠိုၚ်ရဂှ် ဂကောံအခေါၚ်အရာမၞိဟ်ကရေၚ် KHRG လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU