ကျာ်ထဝ်၊ အဝ်ဂါတ် (၃၁)
ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကွာန်ကညေန်ချံၚ် ပ္ဍဲဂိတုအဝ်ဂါတ် (၂၉) အခိၚ်နူဂယး ၜိုတ် ၈ နာဍဳ မၞိဟ်တြုံမွဲတၠ လိုန်ဒးမာၚ်တိုပ်တိ ဗ္တိုဟ်ထ္ကးအာတုဲ ကလိဂွံအာလဝ်ဝပ် ဇီုကပိုက်ဒးလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးတြုံဒေသ ကွာန်ကညေန်ချံၚ် ၂ တၠဂှ်ဝွံ အဃောမအာဂၠါဲၜၚ် ပ္ဍဲကဵုဂြိုပ် မၞုံဗ္ဒါဲကွာန်ဂှ် ကိုဝ်အံၚ်သာန်ဥူ အာယုက် ၃၀ ဂှ်ဝွံ လိုန်ဒးအာလဝ်မာၚ်တိုပ်တိရ။
ဟိုတ်နူလိုန်ဒးလဝ်မာၚ်တိုပ်တိဂှ်ရ ကိုဝ်အံၚ်သာန်ဥူဝွံ ဂဒအ်ဗြာတ်ပါ်ပုၚ် ကြပ်ပိုတ်က္တဵုဒှ်လဝ်တုဲ စးဇိုၚ်လ္ပာ်ပါဲလေဝ် ဂွံအာလဝ်ဝပ်ဂှ် ဂွံတီကေတ်ရ။
ဒၟါနူမာၚ်တိုပ်တိတုဲ ကိုဝ်အံၚ်သာန်ဥူ မဇီုကပိုက်ကလိဂွံလဝ်ဝပ်ဂှ် နကဵုအရီုဗၚ်ဂကောံရီုဗၚ်မှာဇန်တံတုဲ တိုန်စိုပ်လွဳဒၟံၚ် ပ္ဍဲကဵုရုၚ်ဂဥုဲညးဍုၚ်ကွာန်ခရိုၚ်သဓီုရ။
ကွာန်ကညေန်ချံၚ်ဂှ်ဝွံ မ္ၚးနူဒပ်ကံၚ်ဇြဳပၞာန်ဂှ် ဒှ်ဒေသဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA, PDF တံ ချဳဒရာၚ်ပရေၚ်ပၞာန်မွဲကီုရ။
တုဲကၠုၚ် ပ္ဍဲဂိတုဂျူလာၚ် ၁၂ တေံဂှ်လေဝ် မာၚ်အေဆာန်မံၚ် အာယုက် ၁၂ သၞာံ တိတ်မၚ်ဂၠဴ အကြာကွာန်ဝါဒက်ကွေန် ကဵု ကွာန်ညေန်အိုၚ်ဂှ် လိုန်ဒးအာမာၚ်တိုပ်တိတုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai