ဗဒိုပ်ဗၠာဲသၟိၚ် ပ္ဍဲလဂုၚ် ပတေၚ်ဂြတ်လဝ်ပရေၚ်ဂီုကၠီုတအ်ဂှ် ဂကောံဇြဟတ်ပၠန်ဂတးတအ် ဖံက်ဗတိုက်

လဂုၚ် – အဝ်ဂါတ် (၃၁)

ဗဒိုပ်ဗၠာဲသၟိၚ် ပ္ဍဲရးလဂုၚ် ဒပ်ကံၚ်ဇြဳပၞာန် ပတေၚ်ဂြတ်လဝ်ပရေၚ်ဂီုကၠီု (၆)ဗဒိုပ်ဂှ် ဂကောံဇြဟတ်ပၠန်ဂတးတအ် ဖံက်ခတိုဟ်ဗတိုက်လဝ် ပွိုၚ် (၃)တ္ၚဲဆက်က်မာန်လဝ်ရဂှ် ဒပ်မဟာညးဍုၚ်ကွာန် ရးလဂုၚ် လလောၚ်တြးလဝ် ပရိုၚ်ရ။

နူဂိတုအဝ်ဂါတ် စၟတ်တ္ၚဲ (၂၇)တုဲကၠုၚ်တေံ စဵုကဵုစၟတ်တ္ၚဲ (၂၉)ဏံ ဖံက်ခတိုဟ်ဗတိုက်လဝ် ဗဒို်ဗၠာဲသၟိၚ် သၟဝ်တဲကံၚ်ဇြဳပၞာန်ရ။

ပ္ဍဲဂိတုအဝ်ဂါတ် စၟတ်တ္ၚဲ (၂၇) အခိၚ်ဗ္တံဂှ် ဗတိုက်လဝ် ဒပ်လ္ပာ်ဂီုကၠီုဗၠာဲသၟိၚ် စၟတ် (၈) မၞုံဂၠံၚ်ပါတ္တမျာ(ပတ္တမြာ)၊ ပါတ္တမျာဍုၚ်တၟိ၊ ပွိုၚ်ဍုၚ်မၚ်ဂြာဲဍုၚ်ဂှ်တုဲ ပ္ဍဲစၟတ်တ္ၚဲ (၂၈)ဂှ်မ္ဂး ဗတိုက်ဖံက်ခတိုဟ်လဝ် ရုၚ်ပရေၚ်အုပ်ဓုပ် ပွိုၚ်ဍုၚ်ဒဂုၚ်ဍုၚ်တၟိ သ္ကုတ်သၟဝ်ကျာ ကေုာံ ဗဒိုပ်ဗၠာဲသၟိၚ်ယှိုဲပေါက္ကာန်တအ် နကဵုမာၚ်ထိၚ်ခရာဇမ္ၚောဲရ။

သ္အာၚ်နူဂှ်ပၠန် ပ္ဍဲဂိတုအဝ်ဂါတ် စၟတ်တ္ၚဲ (၂၉)ဂှ် ဖံက်ခတိုဟ်ဗတိုက်လဝ် ဗဒိုပ်ဗၠာဲသၟိၚ် ပွိုၚ်ဍုၚ်ဒဂုၚ်ဗၟံက်၊ ဗဒိုပ်ဗၠာဲသၟိၚ်ဥက္ကလာပသၠုၚ်ကျာ ကေုာံ ဗဒိုပ်ဗၠာဲသၟိၚ်ယာန်ကေန်တအ် နကဵုမာၚ်ထိၚ်ခရာဇမ္ၚောဲရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

စပ်ကဵုပရေၚ်ဗတိုက်ဖံက်ခတိုဟ်တအ်ဂှ်တုဲ ၜိုန်ရပရေၚ်ဇီုကပိုက်လီုလာ်လဝ်နွံကီုလေဝ် ဃောလ္ၚတ်ဂၠိုက်ဂၠာဲဒၟံၚ် အကာဲအရာဗလးမုက်တိပြဟ်ဟ်ဏံရဂှ် ကဵုလဝ်သမ္တီရ။

ဗဒိုပ်ဗၠာဲသၟိၚ်သၟဝ်တဲကံၚ်ဇြဳပၞာန်တအ်ဂှ် ဒပ်မဟာညးဍုၚ်ကွာန်ရးလဂုၚ် ကေုာံ KMD 18 Crow Squad၊ Guardians UG၊ KMD 18 Hunter Unit တအ် ပံၚ်တောဲကၠောန်ရေၚ်တၠုၚ်လဝ်ရဂှ် လလောၚ်တြးလဝ်ရ။

ကောန်ဒပ်ဗၠာဲသၟိၚ်ရးလဂုၚ် ဟွံမိက်ဓမံက်ယၟု မွဲတၠဂှ်လေဝ် ပရေၚ်ပရောဖံက်ခတိုဟ်လဝ်တအ်ဂှ် ဒှ်လဝ်ဍာံဍာံတုဲ သွက်ဂွံဟီုထ္ၜးကဵုအကာဲအရာ ပရေၚ်ဇီုကပိုက်ချိုတ်ဂျိုၚ် သောဲသောဲဗြောဲဂှ် ပါဲတးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ပွိုၚ်ဍုၚ်ယာန်ကေန်ကေုာံ ပွိုၚ်ဍုၚ်ဥက္ကလာပသၠုၚ်ကျာ ဒးဒုၚ်ဗတိုက်လဝ်