ကောန်ဍုၚ်ကြုက် (၈၈) တၠ လီဠာန်ပရေၚ်ဆာန်လ္တူလပှ်ကျာတုဲ အာတ်လှုဲ နကဵုစၟတ်သမ္တီပြဝစပ်ကဵုလိၚ်တံဂှ် အေန်ဒိုဝ်နဳယှာ ရပ်လဝ်

ဗာတ်တာန်၊ အဝ်ဂါတ် (၃၁)

ကောန်ဍုၚ်ကြုက် ဂၠိုၚ်ကဵုဒါဇြိန် သံသယနွံဒၟံၚ် ကၠောန်ဒၟံၚ်ဂိုဏ်လီဠာန်ပရေၚ်ဆာန်လ္တူအောန်လိုၚ်တံဂှ် ရပ်ဂွံလဝ် ပ္ဍဲကဵုအေန်ဒိုဝ်နဳယှာဏောၚ် ဂကောံဒပ်ဗၠာဲသၟိၚ်တံ ဟီုဂးလဝ် ပ္ဍဲကဵုဂိတုအဝ်ဂါတ် (၃၀) တေံရ။

အတိုၚ်ပရိုၚ် မဂွံနၚ် နူကဵုဂကူကြုက် ရဲကၠောန်ကလောန်မွဲစွံ ကုညးမရပ်ဂွံလဝ်ဂမၠိုၚ်ဂှ်မ္ဂး ဂကောံဒပ်ဗၠာဲသၟိၚ် အေန်ဒိုဝ်နဳယှာဝွံ ပ္ဍဲဂိတုအဝ်ဂါတ် (၂၉) တေံ ရပ်လဝ် မၞိဟ်တြုံ (၈၃) တၠ ကဵု မၞိဟ်ဗြဴ (၅) တၠ ပ္ဍဲကဵုရုၚ်စက် မၞုံဍုၚ်ဗာတ်တာန် လ္တူတ္ကအ်ရဳအူဂှ်ရောၚ် သ္ဂးလဝ်ရ။

ဂကောံလီဠာန်ဏံဂှ်ဝွံ ဘပဠအာတ်လဝ်လှုဲ လ္တူမၞိဟ်ဒးဒုၚ်ဂိလဝ် ဂၠိုၚ်ကဵုကၠံ နူကဵုဍုၚ်ကြုက်တံဂှ်တုဲ ဗွဲမဂၠိုၚ်ဂှ် ဒှ်ဒၟံၚ်သၞာဲဒဴအလဵုအသဳတံရောၚ်ဂှ် ဂကောံဒပ်ဗၠာဲသၟိၚ်တံ ဟီုရ။

“ပ္ဍဲကဵုညးဒးဒုၚ်ကလိလောန်တံဂှ် ကောန်ဍုၚ်အေန်ဒိုဝ်နဳယှာ ပါ၊ ဟွံပါ ဂၠိုက်ဂၠါဲစၟဳစၟတ်ဒၟံၚ်ဖိုဟ်ရ။ ညးမွဲမှ ဟွံပါပုဟ်ဟီုမ္ဂး မၞိဟ်လီဠာန်တံဏံဂှ် ဗက်ဗဒဴကၠေံနူဍုၚ် လွာဲဂှ်ဏောၚ်” သာ်ဝွံ ညးမၞုံအခေါၚ်ဟီုဂး ဂကောံဒပ်ဗၠာဲသၟိၚ်တ္ကအ်ဂှ် ဟီုလဝ်ကဵု AFP ပ္ဍဲကဵုဂိတုအဝ်ဂါတ် (၃၀) တေံရ။

ညးလီဠာန်ဂမၠိုၚ်ဝွံ အပ္ဍဲပရေၚ်ကော်ဖုၚ်ဗဳဒဳယောတံဂှ် ပပၞကၠောန်သ္ပလဝ်ပရေၚ်ဆာန်ညံၚ်သွပ်လ္ပအ် ကုမၞိဟ်ဒးဂိဂမၠိုၚ်တံဂှ်အိုတ်ရ။

ညးဗြဴလီဠာန်တံဂှ် လှေံလှန်ညးတြုံဂမၠိုၚ် ညံၚ်ဂွံဒှ်ကဝေၚ်နူကဵုအောန်လာၚ်တံတုဲ ဗွဲကြဴဂှ် စၟတ်သမ္တီလဝ် ပွစပ်ကဵုလိၚ်တံဂှ်တုဲ မိက်ကၠုၚ်လှုဲတံအိုတ်ရ။

ယဝ်ရကယျာန်ပါဲကၠုၚ် သွက်ဂွံကဵုလှုဲ မအာတ်လဝ်ဂှ်မ္ဂး ဗလးပ္တိုန်အာ ဗဳဒဳယောဂမၠိုၚ် လ္တူမဳဒဳယာပရေၚ်မၞိဟ်တံရောၚ်ဂှ်လေဝ် ဘပဠလဝ်အိုတ်ရ။

ဂကောံဏံဝွံ ဂေတ်ဂြိပ်ဒၟံၚ်ကမၠောန်ဏံ ၜိုတ်လဵုလအ်ယျတုဲ သြန်လုပ်ၜိုတ်လဵုနွံရောဟီုဂှ် ဟွံဂွံတီကေတ် ချိုတ်တ်ပၠိုတ်တ်ဏီရ။

ဍုၚ်ကြုက်ဝွံ ကြဴနူလၞိန်ဗပိန်ဗ္တိုက်သ္အး ဇာဇၞိက်အပ္ဍဲဍုၚ်တံတုဲဂှ် မၞိဟ်လီဠာန်ဗွဲမဂၠိုၚ်ဂၠေၚ်ဝွံ ဆုဲပြံၚ်ကၠုၚ်လဝ် လ္ပာ်အေန်ဒိုဝ်နဳယှာ ကေုာံ ဍုၚ်အာယှဒိုဟ်အဂၞဲတံရောၚ်ဂှ် ဂကောံဒပ်ဗၠာဲသၟိၚ်တံ ကေၚ်ဟီုဂးကၠုၚ်လဝ် နူကဵုကၠာတေံရ။

ပ္ဍဲသၞာံ ၂၀၁၉ တေံ ဂကောံဒပ်ဗၠာဲသၟိၚ်ဝွံ ရပ်ဒက်ဂွံလဝ် ကောန်ဍုၚ်ကြုက် (၈၅) တၠကဵု ကောန်ဍုၚ်အေန်ဒိုဝ်နဳယှာ (၆) တၠ နကဵုဂဗုတ်လီဠာန်လ္တူအောန်လာၚ်ဂှ်တုဲ မၞိဟ်တံဏံ လီဠာန်ဏာလဝ် နူကဵုမၞိဟ်ဒးဒုၚ်ဂိလဝ်တံ ဒဝ်ဠာ ဂၠိုၚ်ကဵုပြကောဋိကိုဋ်ရ။

Ref; CAN