သၞေဟ်ကၚ်စၟဳစၟတ်ဍာ်ဗု ဒးဒုၚ်ဗတိုက်တုဲ ကောန်ဒပ်ကံၚ်ဇြဳပၞာန် (၃)တၠ ဒးချိုတ်လဝ်

ဍာ်ဗု၊ သေပ်တေမ်ဘာ(၁)

ရးဒေသဇၞော်တၞၚ်သြဳ၊ ဍုၚ်ဍာ်ဗု၊ သၞေဟ်ကၚ်စၟဳစၟတ် ဖျေံလဝ်ဗ္ဒပ် ဗ္ဒာဲကျာ်ဒတူဂှ် ဒဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၃)တၠ ဒးချိုတ်တုဲ ဒးလဝ်ဘဲဝပ် (၄)တၠရဂှ် ဂကောံစဵုဒၞာညးဍုၚ်ကွာန် ပွိုၚ်ဍုၚ်ထဝါဲ (DDT) လလောၚ်တြးလဝ်ရ။

သၞေဟ်ကၚ်စၟဳစၟတ် ဒပ်ဇြဳပၞာန် ကေုာံကောန်ဒပ်ဗၠာဲသၟိၚ် ဇြဟတ် (၁၀)တၠပြၚ် ဖျေံလဝ်ဗဒိုပ်ဂှ် ဒပ်ပံၚ်ကောံ ဒပ်စဵုဒၞာညးဍုၚ်ကွာန်တအ် အာစိုပ်ဗတိုက်လဝ် နကဵုလွဟ်ဇၞော်ဍောတ်ရ။

ဟိုတ်နူပရေၚ်ပန်ဗတိုက်ဏံ ပရေၚ်ပန်ပှော်ၜါလ္ပာ် က္တဵုဒှ်လဝ် ဗ္ဒာဲပွိုၚ် (၁၅)မိနေတ်တုဲ လ္ပာ်ဒပ်ပံၚ်ကောံတအ် ပရေၚ်ဇီုကပိုက်ဒး ဟၟဲမွဲသာ်တုဲ ဆုတ်က္လေၚ်တိတ်လဝ် ဗွဲမအံၚ်ဇၞးမာန်ရဂှ် ဓမံက်လဝ် ပ္ဍဲတၚ်လလောၚ်တြးရ။

ညးတာလျိုၚ်လလောၚ်တြးပရိုၚ် ဂကောံစဵုဒၞာညးဍုၚ်ကွာန် (DDT)ဂှ်မ္ဂး သၞေဟ်ကၚ်စၟဳစၟတ်ကံၚ်ဇြဳပၞာန်ဏံ ဟိုတ်နူရပ်စပ်စၟဳစၟတ်ဒၟံၚ် ညးဍုၚ်ကွာန်အာတရဴတအ်ကီု၊ အာတ်မိက်ကေတ်ဒၟံၚ်သြန်ကီု ဟိုတ်နူကၠောန်ဒၟံၚ်ဂှ်ရ ဒးဗတိုက်လဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပရေၚ်ဗတိုက်ပန်ဏံဂှ်မ္ဂး DDT ဒပ်လ္ပာ် ၃၊ ခရိုၚ်ထဝါဲ တံဒပ် ၁၊ DGRF ဒပ်လ္ပာ် ၄၊ ဂကောံဗလးကျာ (ပကဖ ဍာ်ဗု)၊ TPLF ကေုာံ ဒပ်ဒမၠုက်နဂါနဳတအ် ပံၚ်တောဲတုဲ ဗတိုက်ပန်လဝ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၁၉)တေံလေဝ် နူကဵုသၞေဟ်ကၚ်စၟဳစၟတ်ကံၚ်ဇြဳပၞာန်ဂှ် ဟိုတ်နူပန်ပှော်ဏာလဝ်ကြာန်န်တုဲ ကောန်အရာပ် (၄)တၠ ဒးလဝ်ဘဲဝပ်တုဲ ပ္ဍဲကဵုဂှ် ညးဒေသ ဒဝ်တွယ်တွယ်ဂှ်မ္ဂး ဒးချိုတ်လဝ် ဟိုတ်နူဘဲလွဟ်မကမ်ရဂှ် ဂွံတီကေတ် အတိုၚ်လဟီု ညးဒေသတအ်ရ။

ပရိုၚ် – သြၚ်လောၚ်တိုၚ်(မ်)

ဗီုရုပ် – DWF