ပွိဖျူ – သေပ်တေမ်ဗာ(၁)
ရးဒေသမဂွေ၊ ပ္ဍဲပွိုၚ်ဍုၚ်ပွိဖျူဂှ် ရပ်ဂွံလဝ် မၞိဟ်ကၠောန်တြးပ္တိတ်သြန်ပတောံ (၂)တၠ ပွိုၚ်ၜါတ္ၚဲဆက်ဆက်ရဂှ် လလောၚ်တြးလဝ် ပ္ဍဲမဳဒဳယာတြးဝါဒ ကံၚ်ဇြဳပၞာန်ရ။
ပ္ဍဲကဵုဂိတုအဝ်ဂါတ် စၟတ်တ္ၚဲ (၂၉)ကဵု စၟတ်တ္ၚဲ (၃၀)ဂှ် ရပ်ဂွံလဝ် မၞိဟ်တြုံမွဲတၠကီု သီုမၞိဟ်ဗြဴမွဲတၠ လိၚ်မံၚ်ဒၟံၚ်သ္ၚိ ပ္ဍဲကွာန်ယှောက်တဝ် ပွိုၚ်ဍုၚ်ပွိဖျူ အဆက်ဆက်ရ။
ရပ်ဂွံလဝ် မၞိဟ်ဗြဴဂှ် သီုစက်ကၠောန်ပ္တိတ်သြန်ပတောံ ပ္ဍဲကွာန်ယှောက်တဝ်တုဲ မၞိဟ်တြုံဂှ်မ္ဂး ရပ်ဂွံလဝ် ပ္ဍဲဖျာသတိုဝ် လ္တူဍုၚ်မွဲဒၞာဲရဂှ် ဂွံတီကေတ်ရ။
“မၞိဟ်ကၠုၚ်လိၚ်မံၚ်ဒၟံၚ်သ္ၚိရ။ ဍေံတအ် ကၠုၚ်နူလဵုလေဝ် ဟွံတီပုဟ်။ ဗက်ဒၟံၚ်ဒၞာဲဇိုၚ် နူလဂုၚ်တေံတုဲ ကၠုၚ်ရပ်ဂွံလဝ် လ္ပာ်ဏံဂှ်လေဝ် ဟီုလဝ်ရ” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် သြန်ပတောံ ကၠောန်ပ္တိတ်နူပွိဖျူဂှ် သုၚ်စောဲဒၟံၚ် ပ္ဍဲလဂုၚ်နွံဒၟံၚ်ရဂှ်လေဝ် ဂွံတီကေတ်ရ။
ညးဒေသပွိဖျူတအ်ဂှ်မ္ဂး သြန်ပတောံဏံ ဗက်ပရးဒၟဴၚ် ပ္ဍဲကွာန်ကြပ်ကဵုဍုၚ် ဒၞာဲဝိုၚ်ဝေၚ်လံၚ်ၛၚ် နွံမာန်ဒၟံၚ်ရဂှ် ပတှ်ေကေတ်လဝ်တုဲ ဝိုၚ်ဝေၚ်လံၚ်ၛၚ်တအ်ဂှ် ပံက်ကၠောန်ဒၟံၚ် သီုတ္ၚဲသီုဗ္တံ နကဵုအခေါၚ်ကံၚ်ဇြဳပၞာန်ရ။
မွဲကရောံကဵု မၞိဟ်ဒးဒုၚ်ရပ်ဂွံလဝ်ၜါတၠဏံ သီဂွံလဝ် သြန်ပတောံ (၄၃၀)တၞးပြၚ်၊ စက်မွဲမ သီု Laptop တအ်တုဲ ပံက်လဝ်ဂဗုတ် စၟဳစၟတ်ဒၟံၚ်ဂဗုတ် ပ္ဍဲဗဒိုပ်ဗၠာဲသၟိၚ်ပွိဖျူရဂှ် ဂွံတီကေတ်ရ။
စပ်ကဵုအကာဲအရာဂဗုတ်လၟုဟ်ဏံတုဲ ၜိုန်ရသြၚ်လောန်တိုၚ်(မ်) ဆက်စၠောံလဝ်ကဵု ဗဒိုပ်ဗၠာဲသၟိၚ်ပွိဖျူကီုလေဝ် ဆက်စၠောံလဝ်ဟွံဂွံရ။
ပရိုၚ် – သြၚ်လောန်တိုၚ်(မ်)
ဗီုရုပ် – မဳဒဳယာတြးဝါဒကံၚ်ဇြဳပၞာန်
sanlontai