ဒဳမအ်ဇြော – သေပ်တေမ်ဗာ(၁)
တွဵုရးကရေၚ်ဍာဲ၊ ပ္ဍဲကွာန် မၞုံပ္ဍဲပွိုၚ်ဍုၚ်ဒဳမအ်ဇြောတအ်ဂှ် ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံဗုမ်ကဵုက္ၜၚ်ကျာတုဲ ညးဍုၚ်ကွာန်မွဲတၠ ဒးချိုတ်လတ်ရဂှ် KNDF လလောၚ်တြးလဝ် ပရိုၚ်ရ။
ပ္ဍဲဂိတုအဝ်ဂါတ် စၟတ်တ္ၚဲ (၃၁)အခိၚ်နူဂယးဂှ် ဒပ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် ပ္ဍဲကွာန်ညးဍုၚ်ကွာန်တအ် မံၚ်တန်တဴဒၟံၚ်ကီု သီုကဵုပ္ဍဲဗဒိုပ်ပါဲဘဲပၞာန်တအ် နကဵုက္ၜၚ်ကျာရ။
ပ္ဍဲကွာန်သ္ကုတ်ပလိုတ် ပွိုၚ်ဍုၚ်ဒဳမအ်ဇြော သ္ပတံနူ အခိၚ်နူဂယး (၄)နာဍဳပြၚ်တုဲဂှ် ဟိုတ်နူကံၚ်ဇြဳပၞာန် ဂြာတ်ထောံဖျေံလဝ်ဗုမ် နကဵုက္ၜၚ်ကျာ (၃)အလန်ဂှ်ရ စမြိုၚ်တအ် ဇီုကပိုက်ဒးလီုလာ်လဝ် နွံရဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲကဵုဗဒိုပ်ပါဲဘဲပၞာန် သ္ကုတ်ဗၟံက်ပွိုၚ်ဍုၚ်ဒဳမအ်ဇြော အခိၚ်နူဂယး (၆)နာဍဳပြၚ်ၚ်ဂှ် ဟိုတ်နူထပ်ဂြာတ်ထောံဖျေံလဝ်ဗုမ်(၉)မ ကဵုက္ၜၚ်ကျာ (၂)ဖ္ဍိုက်ပၠန်ဂှ်ရ ညးဍုၚ်ကွာန်မွဲတၠ ဒးချိုတ်လဝ်တုဲ ဇီုကပိုက်ဒးလဝ်ဘဲဝပ် (၂)တၠ ဘာဗ္တောန်လိက်ကီု သီုစမြိုၚ်တအ် ဇီုကပိုက်ဒးလီုလာ်လဝ်ရဂှ် ဓမံက်ထ္ၜးလဝ်ရ။
ပ္ဍဲကဵုတွဵုရးကရေၚ်ဍာဲ ကြပ်ညောန်ဒၟံၚ်ကဵုနေပျဳဒဝ် ဒၞာဲကံၚ်ဇြဳပၞာန်လဇံက်လဝ်ရုၚ်ဂှ် ဟိုတ်နူထ္ပက်ဒၟံၚ်ကရောၚ်ပၞာန် သ္ကာတ်မြဟ်ဂှ်ရ ညးဍုၚ်ကွာန်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဗဒိုပ်ပါဲဘဲပၞာန် ကေုာံ ဂြိုပ်ဒဵုတအ်ရ။
သ္အာၚ်နူပန်ဖျေံလွဟ်ဇၞော် ပ္ဍဲကဵုညးဍုၚ်ကွာန်တအ် သီုရန်တၟံနွံနွံတုဲ ၜိုန်ရကၠောန်ဒၟံၚ် ပရေၚ်ဗတိုက်ပန် နကဵုက္ၜၚ်ကျာကီုလေဝ် ညးမၞုံအခေါၚ်ဟီုဂးကံၚ်ဇြဳပၞာန် ဂအုပ်ဗိုလ်ဇြဝ်မေန်ထောန်ဂှ်မ္ဂး ဗတိုက်ပန်လဝ်ကောန်အရာပ်တအ် ဟၟဲပုဟ်ပုဟ်ဂှ် ဟီုတးပါဲလဝ် ပ္ဍဲပေါဲသောၚ်ကလးပရိုၚ် ဍေံတအ်ကၠာန်သ္ပလဝ်ဂှ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – KNDF
sanlontai