နေဗျဳဒဝ်၊ သေပ်တေမ်ဗာ (၁)
ဖအောန်ဖျေံ ပရေၚ်ဒိုက်ဝါတ်တံတုဲ ဘဝပိုန်ဒြပ်ပရေၚ်မၞိဟ်တံ ညံၚ်ဂွံဖောအ်ဗြေဝ်တောတက်မာန် နကဵုညးဍုၚ်ကွာန်တံ သ္ဒးလေပ်လိက်ဏောၚ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးလဝ် ပ္ဍဲကဵုကောံဓရီု ဂကောံအလဵုအသဳကၟိန်ဍုၚ်ပံၚ်ကောံကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ဂိတုအဝ်ဂါတ် (၃၀) တေံဂှ်ရ။
က္ဍိုပ်သ္ကိုပ်ပၞာန်ဂှ် ပရေၚ်ဖအောန်ဖျေံ ပရေၚ်ဒိုက်ဝါတ်တံဂှ် စရေၚ်တၠုၚ်လဝ် နူကဵုအာယုက်အလဵုအသဳဒဳမဝ်ကရေဇြဳတုဲကၠုၚ်တေံတုဲ သွက်ဂွံဖအောန်ဖျေံမာန်ဂှ် နွံပၟိက် ဒးသၠုၚ်ပ္တိုန်ပရေၚ်ပညာ အဓိကဏောၚ်ဂှ် သ္ဂးရ။
ဗွဲယျေဘုယျမ္ဂး ညးဍုၚ်ကွာန်ဒၟံၚ်လ္တူဍုၚ် ဗွဲမဂၠိုၚ်ဝွံ လေပ်ပညာတန်ဂၠိုၚ်တုဲ ညးဍုၚ်ကွာန် နူကဵုဒေသကွာန်ရးတံကဵု ဒေသတၞုၚ်တၞးတံဂှ် ဟိုတ်နူလေပ်ကၠုၚ်ပညာတန် အောန်ဒၟံၚ်ဏီဂှ်ရ ရန်တၟံညံၚ်ညးဍုၚ်ကွာန် နူကဵုဒေသတံဏံ ဂွံလေပ်ပညာတန် သၠုၚ်တိုန်ကၠုၚ်ဂှ်တုဲ သွက်ဂွံရေၚ်တၠုၚ်ဂှ် က္ဍိုပ်သ္ကိုပ်ပၞာန် ဟီုလဝ်ရ။
ကၠာတေံ အလုံမွဲဍုၚ် ညးဟွံလေပ်လိက် ညံၚ်ဂွံအိုတ်အးဂှ် ရေၚ်တၠုၚ်လဝ် တန်ဗ္တောန် “အ” ပိမတံတုဲ အံၚ်ဇၞးလဝ်ဂှ်ရ အခါလၟုဟ်ဂှ်လေဝ် ညံၚ်ညးဍုၚ်ကွာန် နူကဵုဒေသကွာန်ရး ကေုာံ ဒေသတၞုၚ်တၞးတံ ဂွံလေပ်လိက် သွက်ဂွံရေၚ်တၠုၚ်ကဵုဂှ် ဟီုဂးလဝ်ရ။
ညးသ္ၚဳဂၠိပ်တံဂှ် ပရေၚ်ဒိုက်ဝါတ်အပ္ဍဲဍုၚ် သၠုၚ်တိုန်ကၠုၚ်ဂှ်ဝွံ ကြဴနူဒပ်ပၞာန်သီအဝဵုတုဲ ဒၟါနူၚုဟ်မးလှုဲဗၟာစှ်ေကၠုၚ် မက္တဵုဒှ်ဒၟံၚ်တံဂှ်ကီု၊ ၚုဟ်ဖျာသၠုၚ်တိုန်ကၠုၚ် ဂၠိုၚ်ကဵုဆ ပပ္တံနူကဵုဗၞိက်စၞစသုၚ်သ္ဇိုၚ်တံဂှ်ကဵု အခက်အခုဲကမၠောန်ကၟိတ်တံရောၚ်ဂှ် ထံက်ထ္ၜးလဝ်ရ။
သ္အာၚ်နူဂှ်ပၠန် ဒၟါနူကံၚ်ဇြဳပၞာန် ဖန်ဇန်ကောပ်ကာဲဟွံလေပ်၊ လလောၚ်ပ္တိတ် တၚ်သၞောတ်ဗ္ၜတ် ဟွံမွဲပၟိက်တံသၟးဟွံက ဟိုတ်နူပဋိပက္ခ မက္တဵုဒှ်ဒၟံၚ်လၟုဟ်တံဂှ်တုဲလေဝ် နကဵုညးဍုၚ်ကွာန်ဒေသတံ ကၠောန်ၜိုတ်စသုၚ်ဟွံဂွံတုဲ ဒးပါဲဒဴဒၟံၚ်ဘဲပၞာန်ဂှ်ရ ပရေၚ်ဒိုက်ဝါတ်တံ သၠုၚ်တိုန်ကၠုၚ်ရဂှ် သ္ဂးလဝ်အိုတ်ရ။
အတိုၚ်လိက်ဒုၚ်စဳရေၚ် တိုက်သြန်ဂၠးတိတံဂှ်မ္ဂး ပ္ဍဲသၞာံ ၂၀၂၂ ဒပ်ပၞာန်သီလဝ်အဝဵုဂှ် လၟိဟ်မၞိဟ် မ္ဒးမံၚ်ဒၟံၚ်သၟဝ်ပၞောန်ပရေၚ်ဒိုက်ဝါတ် စပ်ကဵုအလုံဍုၚ်မွဲဂှ် သၠုၚ်တိုန်ကၠုၚ် စဵုကဵု ၄၀ တၟံကၠံဂှ် လလောၚ်ပ္တိတ်လဝ် ပ္ဍဲကဵုကၞောတ်သၞာံတုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)
ဗီု−MOI
sanlontai