ပ္ဍဲခရိုၚ်ညံၚ်လေဝ်ပေန် KNU ကောန်အရာပ်ဇီုကပိုက်ချိုတ်တံ ဒှ်ကၠုၚ်သ္ဇက်ဒးဂွိၚ်

ညံၚ်လေဝ်ပေန်၊ သေပ်တေမ်ဗာ (၁)

ပ္ဍဲတိဍာ် ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် မ္ၚးနူလွဟ်ဇၞော် ဒပ်ကံၚ်ဇြဳပၞာန်တံဂှ် သီုကဵုပရေၚ်ဗ္တိုက်တရဴကျာတံဂှ်တုဲ ပရေၚ်ကောန်အရာပ်ဇီုကပိုက်ချိုတ်တံ ဒှ်ကၠုၚ် သ္ဇက်ဒးဂွိၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံဗော်သွးမှာဇန်ကရေၚ်တံရ။

ပ္ဍဲကဵုဝၚ်ကမၠောန်ဝါဗ္ၚ ကေုာံ ပ္ဍဲကဵုကွာန် နူကဵုပွိုၚ်ဍုၚ်ကျံက်ကျဳ ကေုာံ ပွိုၚ်ဍုၚ်မုၚ်၊ ပွိုၚ်ဍုၚ်ယှိုဲကျေန် ခရိုၚ်ညံၚ်လေဝ်ပေန်တံဂှ် နူကဵုဒပ်ကံၚ်ဇြဳပၞာန်တံ ပန်ပှော်လွဟ်ဇၞော်၊ ဗ္တိုက်ပန်ပှော်တရဴကျာ ကေုာံ ဗ္တိုက်ကဵုဒရုၚ်တံဂှ် ကၠောန်သ္ပလဝ် အရိုဟ်ဒဒှ်တ္ၚဲရ။

အတိုၚ်စရၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်လဝ် ၜိုတ်က္ဍစိုပ်တံဂှ်မ္ဂး နူဂိတုအဝ်ဂါတ် (၁၈) စဵုကဵု (၃၁) အပ္ဍဲပွိုၚ် (၂) သတ္တာဟဂှ် ပါလုပ်သီုကဵုကောန်ၚာ်၊ ညးဗြဴတံဂှ် ညးဍုၚ်ကွာန်ကောန်အရာပ် ဟွံအောန်နူကဵု ၅ တၠ ချိုတ်အာလဝ်တုဲ ကောန်အရာပ် (၂၀) တၠပြၚ် သီုညးဗြဴ၊ သီုကောန်ၚာ်တံဂှ် ဇီုကပိုက်ကလိဂွံလဝ်ဝပ်ရ။

သ္အာၚ်နူဂှ်ပၠန် ဟိုတ်နူပရေၚ်ဗ္တိုက်ပန်ပှော် လ္တူညးဍုၚ်ကွာန်ကောန်အရာပ် ဒပ်ကံၚ်ဇြဳပၞာန်တံဂှ်တုဲ သီုကဵုဘာကျာ်ခရေတ်ယာန်ဂှ် စမြိုၚ်သ္ၚိဒၟံၚ်အပံၚ် ဗ္ဒါဲ ၄၀ မ ဇီုကပိုက်လီုလာ်လဝ်တုဲ လၟိဟ်မၞိဟ်ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရ။

အတိုၚ်ဂလာန် ဂကောံအခေါၚ်အရာမၞိဟ်ကရေၚ် KHRG တံဂှ်မ္ဂး ပရေၚ်ကောန်အရာပ်ဇီုကပိုက်ချိုတ်ဂှ်ဝွံ ပ္ဍဲကဵုခရိုၚ်ညံၚ်လေဝ်ပေန် KNU ဂှ် ဟိုတ်နူဒှ်ဒၟံၚ်ပရေံအိုတ်ဂှ်ရ နကဵုဍုၚ်သ္အာၚ်ဂမၠိုၚ် ရပ်စပ်စကာ နဲကဲနာနာသာ်တုဲ သွက်ဂွံကေတ်အရေဝ်ကၟာတ်လဒဵုကဵု ဒပ်ကံၚ်ဇြဳပၞာန်တံဂှ် အာတ်မိက်လဝ်ရ။

ဟိုတ်နူပရေၚ်ဗ္တိုက်ပန်ပှော် ကေုာံ ပရေၚ်ရပ်ဒက် ဒပ်ကံၚ်ဇြဳပၞာန် မစွံပွန်ပ္တဝ်လဝ်က္ဍိုပ် လ္တူညးဍုၚ်ကွာန်ကောန်အရာပ်တံဂှ်တုဲ က္တဵုဗဒှ်လဝ် ညးဍုၚ်ကွာန်တံ ညံၚ်ဂွံဖေက်လကိုတ် ကေုာံ ဟွံဂီုကၠီုတံရ။ ညးဍုၚ်ကွာန်ကောန်အရာပ်ဗွဲမဂၠိုၚ်ဂၠေၚ် ဒးဂြိပ်ဒဴပါဲဒလေတ်ဒၟံၚ်တုဲ အရီုဗၚ်ပရေၚ်ဗ္စာရဏာမၞိဟ်တံလေဝ် နွံပၟိက်ဒၟံၚ်ရောၚ်ဂှ် ဂကောံမှာဇန်ကရေၚ်တံ လလောၚ်ပ္တိတ်လဝ်ရ။

သ္အာၚ်နူဂှ်ပၠန် ဟိုတ်ဟွံမွဲမွဲသာ် ဒပ်ကံၚ်ဇြဳပၞာန် ရပ်ဒက်လဝ် ညးဍုၚ်ကွာန်ကောန်အရာပ် (၅) တၠ မၞုံအပ္ဍဲပွိုၚ်ဍုၚ်မုၚ်၊ ခရိုၚ်ညံၚ်လေဝ်ပေန် KNU တံဂှ်တုဲ ပလံၚ်ဗစိုပ်လဝ် တမ်ဒပ် ခမရ (၅၉၉) တံဂှ်တုဲ အပ္ဍဲဂိတုဂျူလာၚ် တုဲကၠုၚ်တေံဂှ်လေဝ် ကံၚ်ဇြဳပၞာန် ရပ်ဒက်လဝ် ညးဍုၚ်ကွာန်ကောန်အရာပ် (၂၀) တၠတုဲ (၁၈) တၠဂှ် ဖျေံလဝ်ဒဏ်ထံၚ် ၆ ဂိတုစၟအ်အ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ်−သြၚ်လောန်တိုၚ်(မ်)

ဗီု−KNU