ဆက်ဗ္တိုက်ပလီုအာ ဝါဒတၠအဝဵု နကဵုနဲကဲပၠန်ဂတးရပ်လွဟ်ရောၚ် ဗော်ဍုၚ်မန်တၟိဟီု

ကၞောတ်ၜဳရေဝ်၊ သေပ်တေမ်ဗာ(၁)

ဗ္တိုက်ပလီုဝါဒတၠအဝဵု နကဵုနဲကဲပၠန်ဂတးရပ်လွဟ်တုဲ ဆက်ဂစာန်အာ စဵုကဵုက္လိဂွံ အခေါၚ်ဗၠးၜးကောန်ဂကူရောၚ်ဂှ် ဗဟဵုဗော်ဍုၚ်မန်တၟိဂှ် ပ္တိတ်လဝ်တၚ်လလောၚ်တြး လ္တူတ္ၚဲပၠန်ဂတးမန် မရနုက်ကဵု(၇၆)ဝါဂှ်ရ။

ပ္ဍဲတၚ်လလောၚ်ပ္တိတ် လစွံစိုတ်ဗော်ဍုၚ်မန်တၟိ မဒှ်ဂကောံဒပ်ရပ်လွဟ်ကောန်ဍုၚ်အရၚ်ဝှ်ကြံၚ်ဂှ်တှ်ေ ဗော်ညးတံဂှ် သ္ပပဓာနကဵု ဇြဟတ်ကောန်ဂကူမန် မဒှ်ပရေၚ်တဴတက်ကောန်ဂကူတံဂှ်တုဲ ချဳဒရာၚ်ကၠောန်သ္ပ ဒတူလိုၚ်မံၚ် ဗွဲမဗၠးၜးရဂှ် သ္ဂးရ။

ယဝ်ရဖန်ဗဒှ် ဂုဏ်ဖဵုသွက်ဂကူ ကေုာံ ပရေၚ်ဒက်ပ္တန်ကၟိန်ဍုၚ်ဖေတ်ဒရာဒဳမိုကရေဇြဳဍာံဇေတ် ကံကုသဵုဇကု ဇကုဖန်ဖက်ကေတ်ဍိုက်က်ပေၚ်ၚ်မာန်မ္ဂး ဂကောံဇြဟတ်သာ်လဵုမွဲဟွံဟီု နကဵုဗော်ဂှ် ဆက်စပ်ဆက်ဆောံအာရောၚ်ဂှ် ဗော်ဍုၚ်မန်တၟိဂှ် ဟီုပ္တိတ်ကၠုၚ်ရ။

သ္အာၚ်နူဂှ်ပၠန် ပ္ဍဲပ္ၚံက်ဂၠံၚ်တရဴ ပရေၚ်ဍုၚ်ကွာန် က္တဵုဒှ်မံၚ်လၟုဟ်ဂှ် နအလဵုဗော်ဂှ် စွံအဓိက ကုပရေၚ်ခိုၚ်ကၠိုက် ဗော်၊ ဒပ်၊ဒေသဖျေံသ္ဇိုၚ်တံတုဲ အဟိန်မၚ်မွဲရံၚ်စံၚ်အာညးဍုၚ်ကွာန်ကောန်အရာပ်တံဂှ် ဒက်ပ္တန်အာ ပရေၚ်ညဳသၟဟ်ကောန်ဂကူတုဲ သွက်ပရေၚ်တဴတက်ကောန်ဂကူဂှ် ရေၚ်တၠုၚ်အာနာနာသာ်ရောၚ်ဂှ် သ္ဂးရ။

လ္တူတၚ်လလောၚ်ပ္တိတ်ဏံဂှ် ဥက္ကဌ ကဝ်မတဳ ပရေၚ်ပၞာန်၊ ပရေၚ်ဍုၚ်ကွာန် ဒပ်စဵုဒၞါဍုၚ်မန်(MSDF) ဒံက်တာ သဳရိမန်ဆာန်ဂှ် နကဵုဗော်ဍုၚ်မန်တၟိဂှ် ပ္ဍဲအနာဂါတ်ဏံ သွက်သ္ဂောံဒှ် ပဋိပက္ခရပ်လွဟ် ကုကံၚ်ဇြဳပၞာန်တုဲ ကိစ္စဖံက်ဗ္တိုဟ်ကၠုၚ်သေနာတ်တံဂှ် ဒှ်ဟွံမာန်ဏီပုဟ်ဂှ် သ္ၚဳဂၠိပ်လဝ်ရ။

“ဆက်ကၠောန်အာကဵု ပရေၚ်ပၠန်ဂတးရပ်လွဟ်တံကီုရောၚ်ဂှ် ဟီုလဝ်ရ။ မွဲလ္ပာ်ပၠန်ဂှ်လေဝ် ဟိုတ်နူဟီုလဝ် ပြဿနာပရေၚ်ဍုၚ်ကွာန်ဂှ် သဳကၠဳအာနနဲပရေၚ်ဍုၚ်ကွာန်တံရောၚ်ဂှ်ရ အခိၚ်လၟုဟ်ဂှ် အကာဲအရာတံ ဆက်နွံမံၚ်အတိုၚ်ဂှ် အတိုၚ်ဂှ်ပၠန်ဏီရ။ ဟိုတ်ဂှ်ရ ပ္ဍဲကဵုလညာတ်ပိုဲတံဂှ် ပ္ဍဲအနာဂတ်ဂတဏံ ကိစ္စသွက်သ္ဂောံဒှ် ပဋိပက္ခရပ်လွဟ် ကုကံၚ်ဇြဳပၞာန်ဗီုလၟုဟ်တံ၊ ကိစ္စဖံက်ဗ္တိုဟ်သေနာတ်တံဂှ် ဒှ်ဟွံမာန်ဏီပုဟ်ဂှ် အဲညာတ်ကေတ်ရ” သာ်ဝွံ ညးသ္ဂးရ။

ဗော်ဍုၚ်မန်တၟိဂှ်တှ်ေ ပြဟ်ဟ်ဏံဂှ် ဟိုတ်နူပၞာန်အပ္ဍဲဍုၚ်ဇြဟတ်ခိုဟ်မံၚ်တုဲ ပွပကီုပရာပ်နာနာသာ်တံ ဆက်က္တဵုဒှ်မံၚ်ဂှ်ရ ပရေၚ်သဳကၠဳပရေၚ်ဍုၚ်ကွာန်ပြဟ်ဟ်ဏံဂှ် မ္ၚးနူပသောၚ်ပြဿနာပရေၚ်ဍုၚ်ကွာန်ဟွံမာန်ဂှ် သွက်ကၟိန်ဍုၚ်သ္ဂောံညိၚ်ဝတ်ကၠုၚ် အယောၚ်အလာအောန်မံၚ်ရဂှ် သ္ဂးရ။

လ္တူအကာဲအရာ က္တဵုဒှ်မံၚ်ဗီုလၟုဟ်ဏံဂှ် နကဵုဗော် သွက်ဂွံဒက်ပ္တန်ကၟိန်ဍုၚ်ပံၚ်ကောံဍာံဇေတ် မဒှ်လၟေၚ်ကမၠောန် ပရေၚ်ဒက်ပ္တန်ဍုၚ်မန်ဂှ် ကေတ်ဇြဟတ်ပရေၚ်ညဳသၟဟ်ကောန်ဂကူတုဲ သ္ပပဓာန် ကုဇြဟတ်ပံၚ်ကောံကောန်ဍုၚ်အရၚ်တံတုဲ ပလေဝ်အာ ဗွဲမခိုၚ်ကၠိုက်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးရ။

မွဲလ္ပာ်ဂှ် ပြဿနာပရေၚ်ဍုၚ်ကွာန်ဂှ် ညံၚ်ဂွံပသောၚ်ကဵုနနဲပရေၚ်ဍုၚ်ကွာန် ဍိုက်က်ပေၚ်ၚ်မာန်ဂှ် ပံၚ်တောဲရေၚ်တၠုၚ်အာ မွဲကရောံကဵုဂကောံကောန်ဍုၚ်အရၚ်တံ မွဲစွံရောၚ်ဂှ်လေဝ် ဗော်ဍုၚ်မန်တၟိဂှ် ကဵုလဝ်သမ္တီပၠန်ရ။

ဒံက်တာသဳရိမန်ဆာန်ဂှ်တှ်ေ အကာဲအရာလၟုဟ်ဏံဂှ် ဒးပိုတ်သ္ကုတ်ယျဏောၚ်တုဲ သၞောတ်တၠအဝဵုပၞာန် နာနာသာ်တံဂှ် ပသောၚ်ကဵုနနဲပရေၚ်ဍုၚ်ကွာန်ဟွံဂွံရပုဟ်ဂှ် ထံက်ထ္ၜးလဝ်ရ။

“လညာတ်အဲဂှ်တှ်ေ အခိၚ်ဏံဂှ် ဒးပိုတ်သ္ကုတ်ရ။ စကစကီုဒှ်၊ သၞောတ်တၠအဝဵုပၞာန်နာနာသာ်တံဂှ် ပသောၚ်ကုနနဲပရေၚ်ဍုၚ်ကွာန်ဟွံဂွံရပုဟ်ဂှ် အဲပတှ်ေစှ်ေစိုတ်ရ။ မုဒှ်ရောဟီုတှ်ေ အလဵုသဳပၞာန်တံဂှ် ပ္ဍဲသၞာံ (၁၉၆၂)ဂှ် သ္ကိုပ်ဗိုလ်နေဝေန်သီအဝဵုရ။ ဗွဲကြဴ ပ္ဍဲပေါဲဗ္တိုက် ပရေၚ်ချဳဒရာၚ်ညးဍုၚ်ကွာန် သၞာံ ၁၉၈၈ဂှ်လေဝ် ကဵုမံၚ်အခက်ခုဲ ပ္ဍဲအခန်ကဏ္ဍအဓိကဂှ် ဒပ်ပၞာန်ဏံရ” သာ်ဝွံ ညးသ္ဂးရ။

ဗော်ဍုၚ်မန်တၟိဂှ်တှ်ေ ပရေၚ်ဗၠးၜးကောန်ဂကူမန်ဂှ် ဟွံစိုပ်တိုၚ်ပ္ကဴဏီတုဲ ဟိုတ်နူတာလျိုၚ်ပၠန်ဂတးဂကူတံ ဆက်နွံမံၚ်ဏီဂှ်ရ အလုံကောန်ဂကူမန် ညံၚ်သ္ဂောံဆက်လုပ်အာပပေါဲဗ္တိုက် မွဲကရောံကဵု မဟာမိတ်ကောန်ဍုၚ်အရၚ်တံကဵု ဂကောံဒဳမိုကရေဇြဳ ပ္ဍဲဍုၚ် တံကဵု ဍုၚ်သ္အာၚ်တံ နကဵုစိုတ်ဓါတ်ခိုၚ်ၚ်၊ ဝဳရိယဗိုန်န်၊ ညဳညဳသၟဟ်ဟ်အိုတ်ညိဂှ် ဖ္တိုက်ဖ္အောဝ်လဝ် ပ္ဍဲတ္ၚဲပၠန်ဂတးဂှ်ရ။

တ္ၚဲပၠန်ဂတးမန် မရနုက်ကဵု(၇၆)ဝါဂှ် မပါလုပ်သီုတိဍာ်ထိၚ်ဒဝ်ဗော်ဍုၚ်မန်တၟိတံကဵု ပ္ဍဲဒေသကောန်ဂကူမန်တံ မံၚ်တန်တဴမံၚ်လ္ၚဵုတံဂှ် ကၠောန်သ္ပလဝ် နကဵုက္ဍိုပ်လိက် မသ္ဂး”ဇြဟတ်ပၠန်ဂတးဇၞော် အခေါၚ်အရာဂကူမံက်”ဂှ်ရ။

ပရိုၚ်-သြၚ်လောန်တိုၚ်မ်

ဗီု-NMSP