ထဝါဲ၊ သေပ်တေမ်ဗာ (၁)
ဟိုတ်နူကံၚ်ဇြဳပၞာန် သာတုဲပတေၚ်ဂြတ်ကၠုၚ် အခေါၚ်ပလံၚ်ဗစိုပ်သ္ၚု လ္ပာ်ဒေသ (အရှေ့တော) ၊ ပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳဂှ်ရ ဒးဆေၚ်ဒၟံၚ်မုက်ကဵု သ္ၚုပိုတ်အိုတ်တံဏောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒေသ (အရှေ့တော) ထဝါဲ ဂကောံဇြဟတ်ပၠန်ဂတးတံ ဇြဟတ်ခိုဟ်ကၠုၚ်ဒၟံၚ်ဂှ် စနူသၞာံဏံမံက်တုဲ ကံၚ်ဇြဳပၞာန် နူစကၟာတ်လဒဵုထောံ အခေါၚ်ပလံၚ်ဗစိုပ်ဂဥုဲဇဗ သီုကဵုသ္ၚုတံဂှ်ရ အခါလၟုဟ် ကၟာတ်ထောံလဝ် အခေါၚ်ယိုက်ဏာနၚ်သ္ၚုတံရ။
ဒပ်ကံၚ်ဇြဳပၞာန်ဝွံ ဖျေံသ္ဇိုၚ်ပ္ဍဲကဵုသၞေဟ်ကၚ်စၟဳစၟတ် မၞုံဒဵုကျံက်မေဝ်၊ ပကာရဳ၊ ၈ မိုၚ်၊ ဗျဝ်တဝ်ဝ မဒှ်ဂၠံၚ်လုပ် ဒေသ(အရှေ့တော) ထဝါဲတံမာန်ဂှ်တုဲ စၟဳစၟတ်ဒၟံၚ်တုဲ ယဝ်ရဖ္ဍိုက်နၚ်သ္ၚုနွံမ္ဂး ပွမသီဂိုၚ်တံဂှ် ကၠောန်သ္ပဒၟံၚ်ရ။
ဟိုတ်နူဒးဒုၚ်ကၟာတ်လဒဵုလဝ် အခေါၚ်ပလံၚ်ဗစိုပ်သ္ၚုတံဂှ်ရ ပ္ဍဲကဵုဒေသ(အရှေ့တော) ထဝါဲတံဂှ် ၚုဟ်သ္ၚုကြံၚ် (ဧည့်မထ) မွဲရိုက် နူကဵုၚုဟ်မၞုံ ထပှ်ဠက်ဒ္ကေဝ်ဂှ် ၚုဟ်သၠုၚ်တိုန်ကၠုၚ် စဵုကဵုမွဲကိုဋ်ဒ္ကေဝ်ပြၚ်ရဂှ် ညးဒေသတံ ဟီုဂးလဝ်ရ။
သ္အာၚ်နူဂှ်ပၠန် ညးဒေသတံဝွံ ကရောံၚုဟ်သ္ၚုသၠုၚ်တိုန်ကၠုၚ်ဂှ် ရာန်သ္ၚုလေဝ် ဝါတ်ဂါတ်ကၠုၚ်ဂှ်ရ ဍာ်ဇမၠိၚ် သွက်ဂွံဒးဆေၚ်မုက် ကုပြသၞာကျာတ်ဝါတ်သ္ၚု ဇၞော်ကဵုဇြဟတ်ဂှ် နွံဒၟံၚ်ရ။
ဂကောံသုတေသနအပ္ဍဲဒေသတံဂှ်လေဝ် ပ္ဍဲကဵုရးဒေသဇၞော်တၞၚ်သဳဂှ် ဟိုတ်နူဒပ်ကံၚ်ဇြဳပၞာန် ကၟာတ်လဒဵုလဝ် အခေါၚ်ယိုက်ဏာနၚ် ဂဥုဲဇဗ ကေုာံ သ္ၚုတံဂှ်တုဲ ညးဍုၚ်ကွာန်ဒေသတံ ကရောံၚုဟ်ဖျာသၠုၚ်တိုန်ကၠုၚ်ဂှ် ပရေၚ်စသုၚ်မံၚ်စံၚ်တံလေဝ် သာတုဲကြေပ်ဂြတ်ကၠုၚ်မာန်ဂှ် လလောၚ်ပ္တိတ်လဝ်ရ။
ဟိုတ်နူတၚ်ကၟာတ်လဒဵုကံၚ်ဇြဳပၞာန်တံတုဲ ညးဍုၚ်ကွာန်ပါဲဒဴဘဲပၞာန် ဗ္ဒါဲ ၄၀၀၀၀ ပြၚ်ဂှ်လေဝ် နွံပၟိက်ဒၟံၚ် ကုအရီုဗၚ် သ္ၚု၊ ဇွောံမစၞစ ကေုာံ ဂဥုဲဇဗတံရောၚ်ဂှ် လလောၚ်ပ္တိတ်ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai