စပ်ကဵုပရေၚ်ၜဳကြုက်သၠုၚ်ကျာတုဲ အစာံဗီုတိကြုက်ဂှ် မလေဝ်ယှာ တးပါဲထောံလဝ်

ကွာလာလာမ်ပူ၊ သေပ်တေမ်ဗာ (၁)

အစာံဗီုတိကြုက်တၟိ မစၟတ်သမ္တီလဝ် ဒဒှ်ရပိုၚ်ပြဳ တွဵုဒၞက်ဍာ် နူကဵုရေၚ်ၜဳမလေဝ်ယှာ မၞုံၜဳကြုက်သၠုၚ်ကျာတံဂှ် အလဵုအသဳမလေဝ်ယှာတံ တးပါဲလဝ်ရ။

ကြဴနူတးပါဲလဝ် သာ်ဏံတုဲဂှ် မအရေဝ်လက္ကရဴအိုတ် အလဵုအသဳဗေကျေန် မဟီုဂးဒၟံၚ်ဗိုန်န်ခိုၚ်ၚ် စပ်ကဵုပရေၚ်ပိုၚ်ပြဳတွဵုဒၞက်ဍာ်တံဂှ်လေဝ် မံက်တိတ်ကၠုၚ်လဝ်ရ။

ကြုက်ဝွံ အလုံၜဳကြုက်သၠုၚ်ကျာမွဲ ဒဒှ်ရညးတံပိုၚ်ပြဳဂှ် ကမြဴဟီုဂးလဝ်တုဲ နူကဵုဂၠံၚ်တရဴဍာ်ဏံဂှ် လၟေၚ်သၞာံၚုဟ်မးကူသာန်သွံရာန် ဂၠိုၚ်ကဵုထရဳလဳယာန် ဂၠါဲဂွံဒၟံၚ်ရောၚ် မဒှ်ရ။

မလေဝ်ယှာ၊ ဖဳလေတ်ဖေန်၊ ဝေဒ်နာမ် ကေုာံ ဘရူနာၚ်တံဝွံ အာတ်မိက်လဝ် သ္ကုတ်ၜဳ ဒၞါဲဗွဲမဂၠိုၚ်ဂှ်တုဲ အပ္ဍဲတွဵုဒၞက်ဍာ်ဍုၚ်သ္အာၚ်တံ အခေါၚ်ဗၠးၜးတရဴကျာ ညံၚ်ဂွံဗိုန်ဗတ်ခိုၚ်ကၠိုက်ဂှ် ကၟိန်ဍုၚ်ပံၚ်ကောံအမေရိကာန်လေဝ် ဗလးလဝ် က္ၜၚ်ဂမၠိုၚ်ကီုရ။

ပ္ဍဲသတ္တာဟဏံ အလဵုအသဳကြုက် လလောၚ်တြးလဝ် “အစာံဗီုတိ”  မအာတ်မိက်လဝ်မွဲလ္ပာ်ဓဝ် စဵုကဵုဗလးၜဳ သြၚ်ဇမ္ၚောဲ တွဵုရး Sarawak ကဵု Sabah မၞုံတ္ကအ်ဗဝ်နဳယိုဝ် ဒေသအပိုၚ်အခြာပရေၚ်ပိုန်ဒြပ်တၞဟ်ခြာ မလေဝ်ယှာတံဂှ်ရ။

တၚ်အာတ်မိက်ကြုက် မၞုံအပ္ဍဲၜဳကြုက်သၠုၚ်ကျာ အတိုၚ်အစာံဗီုတိကြုက် သၞာံ ၂၀၂၃ မအုပ်ဓလီုလဝ် ဒေသတရဴဍာ် မလေဝ်ယှာဂှ်လေဝ် သ္ပအာစၟတ်သမ္တီဟွံသေၚ်ပုဟ်ဂှ် ထ္မံက်ထ္ၜးလဝ် ပ္ဍဲကဵုတၚ်လောၚ်တြး ဌာနဝန်ဇၞော် ကာဍုၚ်သ္အာၚ် မလေဝ်ယှာဂှ်ရ။

ကိစ္စဏံဝွံ ထုဲထံၚ်တုဲ ဒၟါနူဟွံဒုၚ်ဒွံလုက်ဂှ်ရ ဒုၚ်သ္ဇိုၚ်ကဵု သၞောဝ်ဍုၚ်သ္အာၚ်တုဲ နူကဵုပေါဲသဳကၠဳတံမွဲကဆံၚ် ဗွဲမၜိုဟ်လလမ် ဗွဲမစှ်ေကဵုသၞောတ် ဒဒှ်ရထေက်ကဵုဒးရပ်စပ်သောၚ်ကလးဂှ် အလဵုအသဳကွာလာလာမ်ပူ ဟီုဂးရ။

ပရေၚ်ခၞံဗဒှ် Code of Conduct မအုပ်ဓလီုသောၚ်ကလးကဵု ပြသၞာတရဴဍာ် ဍုၚ်အာယှာသၠုၚ်ကျာ မသဳကၠဳလဝ် ခြာဟွံလအ်ဏံဂှ် ဒဒှ်ရတုပ်စိုပ်ဂှ် နူကဵုမလေဝ်ယှာ ထံက်လဝ်ဂလာန်ရ။

ယာန်ဍာ်ကြုက်တံဂမၠိုၚ် ဟိုတ်နူလုပ်စိုပ်လဝ် အပ္ဍဲအပိုၚ်အခြာဒေသတၟေၚ် မလေဝ်ယှာဂှ်ရ နူကဵုအလဵုအသဳကွာလာလာမ်ပူ ကေၚ်ကော်ဆဵုဂဗလဝ် ကလုတ်ဗေကျေန်ရ။

မလေဝ်ယှာဝွံ အာတ်မိက်လဝ် ဒၞါဲၜဳကြုက်သၠုၚ်ကျာ သၟဝ်ကျာတ္ကအ်ဗဝ်နဳယိုဝ်တံဂှ်တုဲ အပ္ဍဲကာလခြာဟွံလအ်ဏံ အလဵုအသဳကြုက် ဒက်ပ္တန်လဝ် တ္ကအ်ပတောံဂမၠိုၚ်တုဲ ဖျေံလဝ်စမြိုၚ်ပၞာန်ရပ်စပ်တံကဵု ဂၠံၚ်က္ၜၚ်ကျာဂြိပ်တံရ။

သ္အာၚ်နူဂှ်ပၠန် ဍုၚ်အာယှဒိုဟ်အဂၞဲတံဂမၠိုၚ်လေဝ် ဂၠုၚ်တမ္ၚာကြုက်တံဝွံ ဒဒှ်ရလေပ်ကၠတ်လုပ် အပ္ဍဲတွဵုဒၞက်ဍာ် ဍုၚ်မဆေၚ်စပ်တံဂှ် ဟီုဂးလဝ်ရ။

Ref: AFP