တၞၚ်သြဳ၊ သေပ်တေမ်ဗာ(၂)
ရးဒေသဇၞော်တၞၚ်သြဳ၊ ပွိုၚ်ဍုၚ်တၞၚ်သြဳ၊ ပ္ဍဲကဵုပေါဲဗတိုက်ဒှ်လဝ် ဗ္ဒာဲကွာန်ဗာန်ကျုက်ဂှ် ပရေၚ်ဇီုကပိုက်ချိုတ်ဂျိုၚ် နွံသီုၜါလ္ပာ်ရဂှ် ညးတာလျိုၚ်ဒပ်စဵုဒၞာညးဍုၚ်ကွာန် (ပကဖ)ပွိုၚ်ဍုၚ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုအဝ်ဂါတ် စၟတ်တ္ၚဲ ၃၁ အခိၚ်ဒေါဝ်တ္ၚဲ ၜိုတ် ၂ နာဍဳဂှ် ကရောၚ်ပၞာန်တိတ်ကၠုၚ် နူတံဒပ်ခမရ ၅၆၁ ဖျေံသ္ဇိုၚ်ညံၚ်ပေန်ကွေန် ဇြဟတ်မၞုံ ၇၀ ပြၚ်ဂှ် နူကဵုဂကောံစဵုဒၞာညးဍုၚ်ကွာန်တအ် ကြတ်ဗတိုက်လဝ်ဂှ် ဒှ်လဝ်ပေါဲဗတိုက်ဆေၚ်မုက်ရ။
ပ္ဍဲကဵုပေါဲဗတိုက်ၜါလ္ပာ်က္တဵုဒှ်လဝ် လအ်ပွိုၚ်မွဲနာဍဳပြၚ်ပြၚ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် ၅ တၠတုဲ လ္ပာ်ဒပ်စဵုဒၞာညးဍုၚ်ကွာန်တအ်ဂှ် သ္ဂံၚ် PDF ဒးပြဟ်လလုဲလဝ် ၁ တၠတုဲ ဒးလဝ်ဘဲဝပ် ၁ တၠရဂှ် ဟီုလဝ်ရ။
ဃောပေါဲဗတိုက်က္တဵုဒှ်ဒၟံၚ်ဂှ် ပန်ရီုလဝ်ကဵုလွဟ်ဇၞော် နူကဵုတံဒပ်ခမရ ၅၆၁ ဖျေံသ္ဇိုၚ်ညံၚ်ပေန်ကွေန် ကေုာံ ဒပ်ကံၚ်ဇြဳပၞာန် မၞုံကွာန်သိန္နော အဆက်ဟွံပိုတ်သ္ကုတ်ရဂှ် ဂွံတီကေတ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ ၁ တ္ၚဲဏံဂှ် ၜိုန်ရပေါဲဗတိုက်က္တဵုဒှ်လဝ် ဟၟဲဏီကီုလေဝ် အကာဲအရာပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရဂှ် ဂွံတီကေတ် အတိုၚ်လဟီုညးတာလျိုၚ်ဒပ်စဵုဒၞာဒေသတအ်ရ။
ပ္ဍဲပွိုၚ်ဍုၚ်တၞၚ်သြဳ လလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲမွဲကာလဒပ်ပၞာန်သီအဝဵုဏံ အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက်ဆေၚ်မုက်ၜါလ္ပာ် က္တဵုဒှ်ဒၟံၚ်ခြာဟွံလအ်ဟွံလအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် –
sanlontai