ၜါသွာၚ်၊ သေပ်တေမ်ဗာ(၂)
ပ္ဍဲတ္ၚဲပၠန်ဂတးမန်ကၠောန်ဗဒှ်လဝ် ပ္ဍဲကွာန်မုဟ်ဒုန် ပွိုၚ်ဍုၚ်ၜါသွာၚ် တွဵုရးဍုၚ်မန်ဂှ် နူလ္ပာ်ကံၚ်ဇြဳပၞာန် ကၟာတ်လဒဵုစဵုဒၞာလဝ် အခေါၚ်သ္ပရှ်ေသှ်ေက္ဍိုပ်သ္ကိုပ်အာဇာနဲမန်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲတ္ၚဲပၠန်ဂတးမန် မရနုက်ကဵု ၇၆ ဝါ ကၠုၚ်စိုပ် ပ္ဍဲဂိတုအဝ်ဂါတ် စၟတ်တ္ၚဲ (၃၁)ဂှ် ဃောညးဍုၚ်ကွာန်မန်တအ် ကၠုၚ်ဖျေံပ္ကဴဇၟန်၊ သ္ပရှ်ေသှ်ေဒစိုၚ်က္ဍိုပ် ပ္ဍဲဒၞာဲဂိုဟ်က္ဍိုပ်သ္ကိုပ်အာဇာနဲပၠန်ဂတးမန် မၞုံကွာန်မုဟ်ဒုန်ဂှ် ဒးဒုၚ်ကၟာတ်လဒဵုစဵုဒၞာလဝ် အခေါၚ်သ္ပရှ်ေသှ်ေရ။
ပ္ဍဲတ္ၚဲဂှ် အခိၚ်နူဂယး ဃောကၠောန်ဗဒှ်ဒၟံၚ်အခန်ကၞာ တ္ၚဲပၠန်ဂတးမန် ဒပ်ကံၚ်ဇြဳပၞာန်၊ ဗၠာဲသၟိၚ် သီုပၞာန်ညးဍုၚ်ကွာန်တအ် နဇြဟတ်ပေၚ်ၚ် စိုပ်ကၠုၚ်တုဲဂှ် ညံၚ်ဟွံဂွံသ္ပရှ်ေသှ်ေက္ဍိုပ်သ္ကိုပ်အာဇာနဲမန်ကီု ညံၚ်ဂွံဂ္ဇအ်လ္ၚောဝ်သက်က်ကီု ဟီုလဝ်ရ။
ကြဴနူဂှ် ဂကောံကံၚ်ဇြဳပၞာန်တအ် မၚ်ရံၚ်ကျောဝ်ဒၟံၚ် ညးကၠုၚ်စိုပ်အခန်ကၞာတ္ၚဲပၠန်ဂတးမန်တအ်တုဲ ညးဍုၚ်ကွာန်မန်မွဲတၠ သ္ပရှ်ေသှ်ေလဝ်ဂးတုဲ ရပ်ဏာလဝ်ရဂှ် ညးပါလုပ်ဒၟံၚ် ပ္ဍဲပရေၚ်ပရောဒဒှ်ဂှ်မွဲတၠ ဟီုထ္ၜးလဝ်ရ။
ညးဍုၚ်ကွာန်မန်ဒးဒုၚ်ရပ်လဝ်ဂှ် ဟိုတ်နူညးတာလျိုၚ် ကဝ်မတဳကၠောန်ဗဒှ်တအ် ပ္ညဳပ္ညပ်ကဵုလဝ်တုဲ က္လေၚ်ဗလးကဵုလဝ်ရဂှ် ဂွံတီကေတ်ရ။
ပ္ဍဲလ္တူပရေၚ်ဒဒှ်ဏံ ညးဆဵုဂဗနတဲမွဲတၠဂှ်လေဝ် “ဒစိုၚ်က္ဍိုပ်ဟွံဂွံ ရှ်ေသှ်ေဟွံဂွံ ဒးဒုၚ်ရပ်ဏောၚ်”ဂှ် ဓမံက်ထ္ၜး ချူပ္တိုန်လဝ် ပ္ဍဲမုက်လိက်ဇာနှိက်ပရေၚ်မၞိဟ်ရ။
ကမၠောန်ပြဝကံၚ်ဇြဳပၞာန်ဂှ် ဒှ်ပိုၚ်ခြာကရေပ်ဓရတ်ဒၟံၚ် အခေါၚ်အရာကောန်ဍုၚ်အရၚ်တအ်တုဲ လက်ထက်ကံၚ်ဇြဳပၞာန် မုလေဝ်စၟဳပတှ်ေဟွံဂွံ ဒှ်ထပ်ထ္ၜးဒၟံၚ်သက်သဳရဂှ် သၟတ်မန်မွဲတၠ ဟီုပါ်ပါဲလဝ်ရ။
တွဵုရးဍုၚ်မန်၊ ပ္ဍဲပွိုၚ်ဍုၚ်ပံၚ်လေဝ် သွက်ဂွံကၠောန်ဗဒှ်အခန်ကၞာ တ္ၚဲပၠန်ဂတးမန်ဂှ် ၜိုန်ရအာတ်မိက်လဝ်အခေါၚ် ဇရေၚ်ကံၚ်ဇြဳပၞာန်ကီုလေဝ် ဟိုတ်နူကလေၚ်လဝ်ပရိုၚ် ဒဒှ်ရဂကောံစဳမာန်အုပ်ဓုပ်ပွိုၚ်ဍုၚ် ကဵုအခေါၚ်ဟွံမာန်တုဲ ဟွံဒှ်ကၠောန်ဗဒှ်လဝ်အခန်ကၞာရ။
အခန်ကၞာတ္ၚဲပၠန်ဂတးမန် မရနုက်ကဵု ၇၆ ဝါဂှ်မ္ဂး ပ္ဍဲဒေသကောန်ဂကကူမန်တအ်မံၚ်တန်တဴဒၟံၚ်လ္ၚဵု ပါလုပ်သီုတိဍာ်ထိၚ်ဒဝ် ဗော်ဍုၚ်မန်တၟိ၊ သီုပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ် ပွိုၚ်ဍုၚ်ရေဝ်တအ်ဂှ် ကၠောန်ဗဒှ်လဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai