ပ္ဍဲပေါဲဗတိုက်လံၚ်ယှေ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ဂၠိုၚ်ဒၟံၚ်

ခေန်ဥူ – သေပ်တေမ်ဗာ(၂)

ဒပ်ကံၚ်ဇြဳပၞာန် ထ္ပက်လုပ်ဒၟံၚ်ကရောၚ်ပၞာန် ပ္ဍဲကွာန်သ္ကုတ်ဗၟံက် ပွိုၚ်ဍုၚ်ခေန်ဥူ၊ ရးသေတ်ဂါၚ်ဂှ်ကဵု ဒပ်စဵုဒၞာဒေသတအ် ပေါဲဗတိုက်ဆေၚ်မုက် က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံဂၠိုၚ်ဒၟံၚ်ရဂှ် ဓမံက်ထ္ၜးလဝ် ပ္ဍဲပရိုၚ်ဒေသဂှ်ရ။

တ္ၚဲဏံ ဂိတုသေပ်တေမ်ဗာ စၟတ်တ္ၚဲ (၁)အခိၚ်နူဂယးဂှ် ပ္ဍဲအခိၚ်တိုန်ကၠုၚ် လ္ပာ်ဒိုဟ်ဨသာန်ကွာန်ယွာတာန် လ္ပာ်ပလိုတ်လေတ်ပလှဂှ် ဂကောံစဵုဒၞာညးဍုၚ်ကွာန် (ပ.က.ဖ) ပွိုၚ်ဍုၚ်ခေန်ဥူ၊ က္ဍိုပ်သ္ကိုပ် (ပ.က.ဖ)ပွိုၚ်တိုက် ကေုာံ ဂကောံစဵုဒၞာကွာန်တအ် ဖံက်ခတိုဟ်လဝ်မာၚ်၊ ပန်ပှော်လဝ်ကဵုလွဟ်ဇၞော်ဍောတ် ဒှ်လဝ်ပရေၚ်ပန်ပှော်ညးသ္ကအ်ရ။

ဟိုတ်နူပေါဲဗတိုက်ဆေၚ်မုက်တုဲ လ္ပာ်ဒပ်ကံၚ်ဇြဳပၞာန် ဇီုကပိုက်ချိုတ် ဒးလဝ်ဘဲဝပ်ဗွဲမဂၠိုၚ်နွံတုဲ ဂၠေၚ်ယိုက်ဏာ ပ္ဍဲလ္ပာ်ကွာန်ပေါက်တုံ နကဵုဝဝ်ဂွံဆဵုလဝ်ဂှ် သ္ဂံၚ်ညာတ်လဝ်နမတ်တအ် ဟီုသ္ဂးလဝ်ရ။

ဇွကောန်ဒပ်ကံၚ်ဇြဳပၞာန် ဒးချိုတ်လဝ်ပ္ဍဲကဵုပေါဲဗတိုက်ၜါတၠဂှ် စွံလဝ်ပ္ဍဲသ္ၚိ မၞုံလ္ပာ်ဂၠံၚ်လုပ် ပလိုတ်လံၚ်ယှေမွဲမဂှ်တုဲ စံၚ်ဏာလဝ် သီုသ္ၚိရဂှ် ဂွံတီကေတ်ရ။

အခိၚ်လၟုဟ်ဏံမ္ဂး ဟိုတ်နူဆက်ထ္ပက်ဒၟံၚ်ကရောၚ်ပၞာန် ပ္ဍဲခေၚ်ဥူဏီဂှ်ရ ညးဒေသနူကွာန်လံၚ်ယှေ၊ လေတ်ပလှ၊ ယွာတာန်၊ ပေါက်တုံ၊ ကျဳကာန်၊ ကေုာံကွာန်ယျေအေကုမ်တအ် (၆၀၀၀)ပြၚ် ဒးဂြိပ်ဒဴဒၟံၚ်တုဲ နွံဒၟံၚ်ပၟိက်ကဵုအရီုဗၚ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ပရေၚ်လလောၚ်ပရိုၚ်ဍာံ ခေန်ဥူ