ပ္ဍဲလက်ထက်ကံၚ်ဇြဳပၞာန် ပ္ဍဲရုၚ်ဌာနဆေၚ်စပ်တံဂှ် ညးစအကြာတံ အုပ်ဓလီုကၠုၚ်

မတ်မလီု၊ သေပ်တေမ်ဗာ (၂)

ပ္ဍဲကာလဒပ်ပၞာန်သီအဝဵုပွိုၚ်ၜါသၞာံပြၚ်ဏံ ပ္ဍဲရုၚ်ဌာနဆေၚ်စပ် သၟဝ်တဲကံၚ်ဇြဳပၞာန် ကဵုမံၚ်ပရေၚ်ရေၚ်တၠုၚ်ညးဍုၚ်ကွာန်တံဂှ် ညးစအကြာတံအုပ်ဓလီုကၠုၚ်တုဲ ဒးကဵုမံၚ်သြန်လှုဲဂၠိုၚ်ကဵုဆရဂှ် ညးဍုၚ်ကွာန်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။

ပ္ဍဲကာလသီအဝဵု ပ္ဍဲဌာနကောပ်ကာဲပရေၚ်မၞိဟ်လုပ်၊ ဌာနက္ဍိုက်က္ဍိုပ်စၞောန်ပ္ညုၚ် ပရေၚ်ပလံၚ်ဗ္စိုပ်ဂၠံၚ်ကုန်၊ မ္ၚးနူဌာနပ္တိတ်ကဵုစၟတ်တဲကၠောံဍုၚ်တံဂှ် ညးယိုက်ဝန် နူဌာနဆေၚ်စပ်ဗွဲမဂၠိုၚ်တံဂှ် ဟွံကဵုပရေၚ်ရေၚ်တၠုၚ် ကုညးဍုၚ်ကွာန်တံတိုက်ရိုက်မွဲသာ် နူကဵုညးစအကြာတံမွဲကဆံၚ်ဟေၚ် ရေၚ်တၠုၚ်ကဵုမံၚ် ကမၠောန်တံရ။

ပ္ဍဲဌာနတံဏံဂှ် နအလဵုညးဍုၚ်ကွာန်တံ အာစိုပ်ကၠောန်သ္ပ ကမၠောန်ပရေၚ်ရေၚ်တၠုၚ်တံမ္ဂး ကဵုမၚ်တဴအခိၚ်ဗွဲမလအ်လတုဲ ကမၠောန်ရေၚ်တၠုၚ် တုဲပ္ဍဲပွိုၚ်မွဲတ္ၚဲမာန်ကၠာတေံဂှ် မ္ၚးနူကၠောန်သ္ပမံၚ်ညံၚ်သ္ဂောံလအ်လဂှ် ကၠောန်သ္ပမံၚ် ညံၚ်အခိၚ်ဂွံအိုတ်၊ သြန်ဂွံအိုတ်၊ မၞိဟ်ဂွံဍောၚ်ရဂှ် ညးဒေသတံ ပါ်ပါဲလဝ်ရ။

သ္အာၚ်နူဂှ်ပၠန် ယဝ်ရကၠောန်ကမၠောန်ပရေၚ်ရေၚ်တၠုၚ် ပ္ဍဲဇရေၚ် ညးစအကြာ စုက်လုက်ကဵု ဌာနဆေၚ်စပ်သၟဝ်တဲကံၚ်ဇြဳပၞာန်တံမ္ဂး ဟွံဒးမၚ်အခိၚ်လအ်အ်မွဲသာ် ၜိုန်ရဂွံပြဟ်ကီုလေဝ် ပရေၚ်အာတ်ကၠုၚ်သြန်လှုဲ ဂၠိုၚ်ကဵုဆတံ နွံကၠုၚ်ရဂှ် သ္ဂးရ။ ညးဒေသ ဒးဂဗလဝ်နမတ်မွဲတၠဂှ်တှ်ေ သွက်တၞးကာတ်ကောန်ဍုၚ်မွဲတၞးဂှ် ဒးကဵုလဝ်သြန် စဵုကဵု ဗ္ဒါဲ(၇)ကိုဋ်ဒ္ကေဝ်ရဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။

“ကၠောန်ဇရေၚ်ညးစအကြာတံတှ်ေ လအ်အိုတ်တှ်ေ မွဲဂိတုရ။ အာကၠောန်နအလဵုဇကုတှ်ေ လအ်ၜိုတ်(၂)ဂိတု၊ (၃)ဂိတုရ။ ညးစအကြာဂှ် အာတ်(၇)ကိုဋ်။ ဗွဲကြဴ ကော်ဏာမၞိဟ်ကၠိုဟ်ခၠၚ်ညိညတံတုဲ ပ္ညဳဂှ် ဒှ်အာ ၆ကိုဋ်ဘာ်ရ။ နကဵုညးစအကြာဂှ် ဂွံပြဟ်ရ။ ညးစအကြာဂှ်လေဝ် ဒးကဵု ညးယိုက်ဝန် လဝကတံ မွဲကဆံၚ်ပၠန်ရ။ သြန်ဂှ်တှ်ေ သာတုဲအိုတ်ဂၠိုၚ်ရ။ အာကၠောန်နအလဵုဇကုမ္ဂး တၚ်နၚ်စုၚ်လေၚ်မံၚ်ဖအိုတ်လေဝ် လအ်ရ။ အာကၠောန်နအလဵုဇကုမ္ဂး ဒးပၠုပ်ၚုဟ်အလဵုသဳ သၟးရ၊ ဆ္ဂး လအ်ရ။ ညံၚ်ကဵုမိက်ဂွံကၠောန်ကဵုညံၚ်ၚ် ဟွံမိက်ကၠောန်ကဵုညံၚ်ၚ်ရ” သာ်ဝွံ သ္ဂးရ။

သ္အာၚ်နူဂှ်ပၠန် သွက်ဂွံကၠောန်ကမၠောန်ပရေၚ်ရေၚ်တၠုၚ် နအလဵုဇကုဂှ် ပ္တိုန်ထ္ၜးတၚ်နၚ်တံမ္ဂးလေဝ် နကဵုညးယိုက်ဝန်ဌာနဆေၚ်စပ်တံဂှ် ကျောဝ်ကဵုတံ ဟွံမွဲတုဲ ဟိုတ်နူကဵုဖျုန်ရေၚ်တၠုၚ် ကုတၚ်နၚ် ညးစအကြာတံ ပ္တိုန်လဝ်ဂှ်ဟေၚ်ရဂှ်ရ ပ္ဍဲဌာနဂှ် ပရေၚ်စလာပ်ဗ္ဇဴတံ က္တဵုဒှ်မံၚ် ဗွဲမဇၞော်ကဵုဇြဟတ်ရဂှ် ညးဆက်ဟီုရ။

ညးဒေသမွဲတၠဂှ်လေဝ် ပ္ဍဲအရာကၠောန် စၟတ်တဲကၠောံဍုၚ်တံဂှ် ယဝ်ရအာကၠောန်နအလဵုဇကုမ္ဂး အိုတ်ၜိုတ် ၃ဠက်ပြၚ်ဓဝ်ရကီုလေဝ် ဒးမၚ် ဗော်ကေန် ၜိုတ်(၃)ဂိတုတုဲ ယဝ်ရကၠောန်ကဵုညးစအကြာတံမ္ဂး ဟွံဒးကေတ် ဗော်ကေန်မွဲသာ် အာတ်သြန် ၄ကိုဋ်ဒ္ကေဝ်ပြၚ်တုဲ ကၠောန်ကဵုမံၚ်လွာဲဂှ်ရဂှ် ဟီုရ။

“နအလဵုဇကုကၠောန်စကေတ်တ်မ္ဂး အတိုၚ်သၞောတ်တြေံမ္ဂး ၃ဠက်ပြၚ်ရ။ ကေတ်ဗော်ကေန်ဂှ် လအ် ၜိုတ်(၃)ဂိတုပြၚ်ဏောၚ်။ ကေတ်လဝ်လၟုဟ်ဂှ် ၜိုတ်ဂိတု(၂)မှ ဂွံဏောၚ်။ ကဵုညးစအကြာဂှ်တှ်ေ ဟွံဒးကေတ် ဗော်ကေန်ပုဟ်၊ ကၠောန်ကဵုညးစအကြာတှ်ေ (၄၇၀၀၀)၊ စဵုကဵုလိက်တိတ်ဂှ် (၁၀)တ္ၚဲရ။ ခက်ခုဲဂှ် ခက်ခုဲကွေံရ။ ကၠာတေံဂှ် မုဗော်ကေန်လေဝ် ဟွံဒးကေတ်ရ။ လုပ်အာမွဲလတုန်ဓဝ်ရ။ လၟုဟ်ဂှ်တှ်ေ ဗီုလဵုဂွံဟီုရော။ မၞိဟ်ဍေံကဵုဍေံရ အေဗီုဂှ်၊ မၞိဟ်ညးကဵုညးနွံမှ လုပ်စပြေပြံၚ်ဏောၚ်။ ခက်ခုဲဂှ်တှ်ေ နအလဵုဇကုကၠောန်စကေတ်တ်မ္ဂး လအ်(၄)ဂိတုရ။ လုပ်ကဵုမၞိဟ်ဍေံ လုပ်ကဵုညးစအကြာတံတှ်ေ လုပ်ဂွံလွာဲဂှ်ရ။ ကၠောန်ကဵုလွာဲဂှ်ရ။ သွက်လိက်ဂွံတိတ်ဂှ် ဒးမၚ် (၁၀)တ္ၚဲရ။ သြန်ဂှ် သာတုဲအိုတ်ဂၠိုၚ်အာရ” သာ်ဝွံ သ္ဂးရ။

ညးဍုၚ်ကွာန်တံ ပ္ဍဲကာလသီအဝဵုဂှ် ဟိုတ်နူအခက်အခုဲ ပရေၚ်စသုၚ်မံၚ်စံၚ်တံကဵု ကမၠောန်ကၟိတ်တံတုဲ သွက်ဂွံအာစိုပ်ကၠောန်ကမၠောန် ပ္ဍဲဍုၚ်မွဲလ္ပာ်တေံဂှ်တုဲ ပရေၚ်ကၠောန် တၞးကာတ်ကောန်ဍုၚ်တံ၊ စၟတ်တဲကၠောံဍုၚ်တံဂၠိုၚ်ကၠုၚ်တုဲ လ္တူဏံဂှ် ညးယိုက်ဝန်တံ ပံၚ်တောဲကဵုညးစအကြာတံတုဲ ကမၠောန်ပရေၚ်ရေၚ်တၠုၚ်တံဂှ် ကၠောန်သ္ပကၠုၚ် နဒဒှ်ဗွဝ်ဖျာမွဲရ။

ၜိုန်ရ ညးယိုက်ဝန်တံ ကၠောန်ကၠုၚ်ကမၠောန်ပရေၚ်ရေၚ်တၠုၚ်ညးဍုၚ်ကွာန်တံ နဒဒှ်ဗွဝ်ဖျာမွဲကီုလေဝ် လ္ပာ်ကံၚ်ဇြဳပၞာန်တံ ကောပ်ကာဲထိၚ်ဒဝ်ကဵုဟွံမာန်တုဲ ကုပွဗက်စအတိတံဂှ် ပွကေတ်အရေဝ်ရေၚ်တၠုၚ် နကဵုဥပဒေဗီုကၠာတေံ ဟၟဲရဂှ်တုဲ ပ္ဍဲဌာနဆေၚ်စပ်တံဂှ် ညးစအကြာတံ အုပ်ဓလီုကၠုၚ် မဒှ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ်တှ်ေ နကဵုညးယိုက်ဝန်ဌာနဆေၚ်စပ်တံ တီကၠိုဟ် ဥပဒေ၊ သၞောဝ်ဥပဒေ နဲကဲကၠောန်သ္ပတံတုဲ ပ္ဍဲအရာရေၚ်တၠုၚ်ကမၠောန်တံဂှ် ညံၚ်သ္ဂောံနွံကဵုသၞောဝ်သၞောတ်ကေုာံ ညံၚ်သ္ဂောံစွံစေတနာ လ္တူကၟိန်ဍုၚ်တုဲ ရေၚ်တၠုၚ်အိုတ်ညိဂှ် ၜိုန်ရဟီုဂး ကဵုလဝ်သတိ ပ္ဍဲကောံဓရီုကၠောန်ဗဒှ်လဝ် ပ္ဍဲဂိတုအဝ်ဂါတ် စၟတ်တ္ၚဲ(၃၀)ဂှ်ကီုလေဝ် တၞဟ်ခြာမံၚ်ကဵု နတဲဏံရ။

အတိုၚ်တၚ်လလောၚ်တြး သၞာံ (၂၀၂၂) ဂကောံမၚ်ရံၚ်ဒ္ဂေတ်လၟေတ်နာနာ CPIဂှ်မ္ဂး အလုံမွဲဂၠးကဝ် ပ္ဍဲဍုၚ်ကံက်ကပှ်လဝ်တၚ်နၚ် ဗက်စအဂတိတံ ၁၈၀ ဍုၚ်ဂှ် ဍုၚ်ဗၟာဂှ် ပရေၚ်ဗက်စအဂတိ နွံမံၚ် မဂၞန် ကဆံၚ် ၁၅၇ ရဂှ် လလောၚ်ပ္တိတ်လဝ်ရ။

ပရိုၚ်-သြၚ်လောန်တိုၚ်မ်

ဗီု-Social Media