ပ္ဍဲပွိုၚ်ဍုၚ်မုၚ် KNU ဂှ် ဟိုတ်နူပရေၚ်ဗ္တိုက်တရဴကျာတုဲ ညးဒေသ ၅၀၀၀ ပြၚ် ဒးပါဲဒလေတ်ဒၟံၚ်ဘဲပၞာန်

မုၚ်၊ သေပ်တေမ်ဗာ (၂)

ဟိုတ်နူပရေၚ်ဗ္တိုက်တရဴကျာကံၚ်ဇြဳပၞာန် ပ္ဍဲကဵုပွိုၚ်ဍုၚ်မုၚ်၊ ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တံဂှ်တုဲ ညးဒေသ ၅၀၀၀ ပြၚ် နူကဵုကွာန် ၈ ကွာန် ဒးဂြိပ်ဒဴပါဲဒလေတ်ဒၟံၚ်ရောၚ် ပ္ဍဲဂိတုသေပ်တေမ်ဗာ ၁ တေံ KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုအဝ်ဂါတ် ၃၀ တေံ ပ္ဍဲကဵုဗ္ဒါဲကွာန်တေတ်ချသုက် ပွိုၚ်ဍုၚ်မုၚ် KNU ဂှ် အကြာဒပ်ပၞာန်ဗၠးၜးကောန်ဂကူကရေၚ် ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။

အပ္ဍဲပေါဲဗ္တိုက်ဂှ် ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တုဲ ညးဍုၚ်ကွာန်ဒေသ ၅၆၆၂ တၠ နူကဵုကွာန် (၈) ကွာန် မပ္တံကဵုကွာန်တေတ်ချသုက်၊ ဖိုဝ်တဝ်သု၊ မျက်ယျေဝ်ကယျေန်၊ မျက်ယျေဝ်ဗမာ၊ တိုၚ်ပေန်၊ ကျောန်ကုန်၊ ဥယှေတ်ခေန် ကေုာံ ၚါဠံက်တိုက်တံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။

ပ္ဍဲကဵုတ္ၚဲဂှ် နူကဵုတမ်ဒပ်ကၚ်ဇြဳပၞာန် ခမရ (၂၀) ဟိုတ်နူပန်ပှော်လဝ်လွဟ်ဇၞော် အပ္ဍဲကွာန်ချုၚ်အေန် ပွိုၚ်ဍုၚ်ယှိုဲကျေန်တံဂှ်တုဲ ညးဒေသညာဖဝ်လေဝ်ထူ ဒးလွဟ်ဇၞော်မကမ်တုဲ ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

အပ္ဍဲပရေၚ်ပန်ပှော်ဗ္တိုက် လွဟ်ဇၞော် ကေုာံ တရဴကျာ ဒပ်ကံၚ်ဇြဳပၞာန်တံဂှ် အကာဲအရာလီုလာ်ဆောံလေၚ်တံဂှ် ဆက်ဂၠိုက်ဂၠါဲဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လောၚ်တြး KNU ဂှ်ရ။

ပ္ဍဲကဵုခရိုၚ်ညံၚ်လေဝ်ပေန် KNU ဂှ် ဟိုတ်နူပရေၚ်ဗ္တိုက်ပန်ပှော်လ္တူညးဍုၚ်ကွာန်ကောန်အရာပ်တံဂှ်တုဲ လၟိဟ်မၞိဟ်ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂကောံဗော်သွးလ္ပာ်ကရေၚ်တံ ကဵုလဝ်သမ္တီရ။

ပရိုၚ်−သြၚ်လောန်တိုၚ်(မ်)

ဗီု−KNU