လိက်ကသုက် NCA နွံဒၟံၚ်ဗွဲမလုပ်သၞောဝ်တုဲ ဟွံလီုဏီပုဟ်ဂှ် ဂကောံဒေါအ်ပန်ပှော် ၅ ဂကောံ ဟီု

နေဗျဳဒဝ်၊ သေပ်တေမ်ဗာ (၂)

လိက်ကသုက်တုပ်စိုတ် ဒေါအ်ပန်ပှော်အလုံဍုၚ် NCA ဂှ်ဝွံ ဟိုတ်နူဒှ်လိက်ကသုက် နူကဵုကၠတ်ထဝ်ကၟိန်ဍုၚ် သ္ပဒတန်ကဵုလဝ်ဂှ်ရ လုပ်ဒၟံၚ်သၞောဝ်တုဲ ဟွံလီုဏီပုဟ်ဂှ် ညးမၞုံအခေါၚ်ဟီုဂး ဂကောံဒေါအ်ပန်ပှော် ၅ ဂကောံ ဒဝ်သဝ်မျယျာဇြာလေန် ဟီုရ။

နူဂိတုအဝ်ဂါတ် (၂၉) စဵုကဵု (၃၁) ဂကောံသဳကၠဳပရေၚ်ၜိုဟ်လလမ်ကံၚ်ဇြဳပၞာန် NSPNC ကဵု ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် ၅ ဂကောံတံ ကြဴနူပေါဲသဳကၠဳပရေၚ်ၜိုဟ်လလမ် ပ္ဍဲကဵုနေဗျဳဒဝ်တုဲဂှ် ဟီုဂးလဝ် ပ္ဍဲကဵုပေါဲသောၚ်ကလးလိက်ပရိုၚ်ရ။

ဒဝ်သဝ်မျယျာဇြာလေန်ဂှ် NCA ဝွံ ဒဒှ်ရကြက်ရှ်သာနွံ အလုံညးဍုၚ်ကွာန် ကောန်ဍုၚ်အရၚ်တံဂှ်ကီု၊ ဒုၚ်သ္ဇိုၚ်ကဵုလိက်ကသုက်ဂှ်တုဲ ရေၚ်တၠုၚ်လဝ် ပေါဲသဳကၠဳပရေၚ်ဍုၚ်ကွာန် ကဆံၚ်ကောန်ဂကူရောၚ် သ္ဂးရ။

ဟိုတ်ဂှ်ရ နကဵုဂကောံရပ်လွဟ်ကောန်ဍုၚ်အရၚ် မထ္ပက်လဝ်စၟတ်တဲ ဒေါအ်ပန်ပှော် ပ္ဍဲကဵုလိက်ကသုက် NCA ဂှ် ဆက်ထ္မံက်အာရုပ်ရဴ NCA ဂှ်ဏောၚ်တုဲ သဳကၠဳအာ ပရေၚ်ၜိုဟ်လလမ် စဵုကဵုဒက်ပ္တန်ကၟိန်ဍုၚ် မဒုၚ်သ္ဇိုၚ်ကဵု ဒဳမဝ်ကရေဇြဳ ကေုာံ သၞောတ်ဖေဝ်ဒရာတံမာန်ဂှ်ရောၚ် ညးဟီုရ။

“လိက်ကသုက်ဏံ ဟွံလုပ်သၞောဝ်ရပုဟ် စၞးဟီုမံၚ်ဂှ် လိက်ကသုက်ဏံ ညံၚ်ဂွံခိုၚ်ကၠိုက်ကၠုၚ်၊ ညံၚ်လမျီုဂွံလုပ်ကၠုၚ် တၚ်ဍိုန်လျနွံမ္ဂး ညံၚ်ဂွံဂွံကၠုၚ်ဇြဟတ်ဂှ် ဒးကၠောန်ဏောၚ်။ အရာလဵုဟွံဟီု တၚ်ဍိုန်လျ တၚ်ဂွံဇြဟတ်ဂှ် နွံဒၟံၚ်တွဵုရဏောၚ်။ တၚ်ဍိုန်လျနွံတှ်ေ ပလေဝ်ပလေတ်ဂွံဒၟံၚ်ဏောၚ်။ လိက်သၞောဝ်သ္ဇိုၚ်ကၟိန်ဍုၚ်ရဂှ် ပလေဝ်ဂွံဒၟံၚ်ဏီရတှ်ေ။ သွက်ဂွံဒှ်သာ်ဏံရဂှ် ဒးပ္တိတ်ဒၟံၚ်ဇြဟတ်လေဝ်။ ဆ္ဂး အခိၚ်လၟုဟ် ကၠတ်ထဝ်ဟွံမွဲပုဟ်ဟီုတှ်ေ ဂၠံၚ်တရဴသဳကၠဳဂှ် လီုအာဟွံဂွံပုဟ်။ ညံၚ်ဂွံစိုပ် လ္တူဂၠံၚ်တရဴပရေၚ်သဳကၠဳဂှ် ဒးပ္တိတ်ဇြဟတ်အဓိကဏောၚ်။ ပ္ဍဲကဵုဒၞါဲဂ္စါန်သာ်ဏံဂှ် လၞုက်ထောံကြက်ရှ်သာ သဘဴဓဝ် NCA တံတုဲမှ သ္ဒးအာဂှ် နွံပၟိက်ဒၟံၚ်ဏောၚ် ညာတ်ရ “ သာ်ဝွံ ညးသ္ဂးရ။

အခိၚ်ထ္ပက်လဝ်စၟတ်တဲ ပ္ဍဲကဵုလိက်ကသုက် NCA အလဵုအသဳဒဳမဝ်ကရေဇြဳၜါအဆက်ဂှ် နဒဒှ်ညးစၞးအလဵုအသဳဂှ် သမ္မတ ကေုာံ ဒုသမ္မတၜါတၠ၊ လ္ပာ်ဒပ်ပၞာန်ဂှ် သ္ကိုပ်က္ဍိုက်ပ်စဵုဒၞါဒပ်ပၞာန် ကဵု ဒုသ္ကိုပ်က္ဍိုက်ပ်၊ ညးစၞးနူကဵုဂကောံရပ်လွဟ်ကောန်ဍုၚ်အရၚ်တံကီု၊ သက်သဳအပ္ဍဲဍုၚ်၊ မ္ၚးဍုၚ်တံ ပါလုပ်လဝ်ရ။

ဆ္ဂး ဗော်သွးကောန်ဂကူကရေၚ် KNU မဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ် မထ္ပက်လဝ်စၟတ်တဲ ပ္ဍဲကဵုလိက်ကသုက် NCA ဂှ် ဟိုတ်နူဒပ်ကံၚ်ဇြဳပၞာန် လိုန်ပလီုပလာ်ထောံ မူသ္ဇိုၚ်အခန် (၁) လိက်ကသုက်ဂှ်တုဲ ဟွံလုပ်သၞောဝ်ရပုဟ်တုဲ သ္ဇက်ဂွံဒးဒ္ဂေတ်ဗက်လေဝ် ဟွံမွဲပုဟ်ဂှ် ထ္မံက်ထ္ၜးဟီုဂးလဝ်ရ။

အခိၚ်လၟုဟ်ဂှ် ဗော်သွးကောန်ဂကူကရေၚ် KNU၊ ဒပ်ပၠတရဴကောန်ဂကူချေၚ် (CNF) ကေုာံ ဒပ်ပၠတရဴဒဳမဝ်ကရေတ်တေတ်ကွးဘာ အလုံဍုၚ်ဗၟာ (ABSDF) တံဝွံ ဟိုတ်နူပရေၚ်ပၞာန်သီအဝဵုတုဲ ကရဴကၠေံစး ကုလိက်ကသုက် NCA ဂှ်တုဲ ဒေါအ်လဝ်ပရေၚ်ဆဵုဂဗသဳကၠဳ ကုကံၚ်ဇြဳပၞာန်ရ။

သၟာပရေၚ်ဍုၚ်ကွာန်ဝှ်ကြံၚ်မွဲတၠ ဥူဖေတာန်ဂှ် ဂကောံသှ်ေဒၟံၚ်ပ္ဍဲကဵု NCA ဂမၠိုၚ်ဝွံ လ္ဂောံကဵုပရေၚ်ဍုၚ်ကွာန်၊ ပရေၚ်ပၞာန်တုဲ ပါဲနူဒးကေမ်ဇျှာပ်လဝ် NCA ဂှ်တုဲမ္ဂး လ္ဂောံကဵုပရေၚ်ဍုၚ်ကွာန် ဟိုတ်နူဒှ်ဂကောံ ဆက်အာဂတဟွံဂွံဂှ်ရ ကံၚ်ဇြဳပၞာန် ရပ်စပ်စကာဒၟံၚ် နဒဒှ်သာဓကမွဲရောၚ်ဂှ် သ္ၚဳဂၠိပ်လဝ်ရ။

“လ္ဂောံကဵုတိဍာ်ညးတံကဵုဒှ် ဇြဟတ်ကဵုဒှ် ညးတံဝွံ ပါဲနူကဵုကေမ်ဇျှာပ်လဝ် NCA တုဲမ္ဂး နကဵုပရေၚ်ဍုၚ်ကွာန် ဂကောံဆက်အာဂတဟွံဂွံတံသၟးရ သှ်ေဒၟံၚ် ပ္ဍဲကဵု NCA ။ ညအ်ဂှ် ကံၚ်ဇြဳပၞာန် သ္ပကၠေံသာဓကတုဲ ဂကောံရပ်လွဟ်ကောန်ဍုၚ်အရၚ်တံ ဒတူလိုၚ်ဒၟံၚ် ကုဍေံတံမွဲစိုတ်မွဲစရိုတ်ဏောၚ်၊ ဆက်အာဒၟံၚ် အတိုၚ် NCA ဏောၚ်ဂးတုဲ ရပ်စပ်ဒၟံၚ် နဒဒှ်သာဓကမွဲရ။ လှေံလှန်တုဲ အာဗီုဏံဏောၚ်၊ ကၠောန်ဗီုဏံဏောၚ်။ ပွမဟီုဂးဒၟံၚ် ကၟိန်ဍုၚ်ပံၚ်ကောံဖေတ်ဒရာတံ မုတံဂှ်လေဝ် နတဲဏံဂှ် အတိုၚ် NCA မုမှထ္မံက်ရုပ်ရဴဟွံမာန်ပုဟ်” သာ်ဝွံ ညးသ္ဂးရ။

ဂကောံဒေါအ်ပန်ပှော် (၅) ဂကောံဂှ် ပ္ဍဲကဵုသၞောဝ်သ္ဇိုၚ် ၂၀၀၈ နူကဵုလ္ပာ်ကံၚ်ဇြဳပၞာန်တံ မပ္တိုန်ထ္ၜးကၠုၚ် အပ္ဍဲပေါဲသဳကၠဳ ပွိုၚ် ၃ တ္ၚဲဂှ် ၝောံပိုဒ်မိက်ဂွံပလေဝ်ဂမၠိုၚ်၊ ကိစ္စသ္ဂောံကၠောန်ဗဒှ်ပေါဲရုဲမာဲတံကဵု ပ္ဍဲကဵုဒေသ EAO တံဂှ် သွက်ဂွံကဵုအရီုဗၚ်ပရေၚ်ဗ္စာရဏာမၞိဟ် EAO တံမာန်ဂှ် သဳကၠဳလဝ်ရောၚ် လလောၚ်ပ္တိတ်လဝ်ရ။

သ္အာၚ်နူဂှ်ပၠန် ဂကောံဒေါအ်ပန်ပှော် ၅ ဂကောံဂှ်လေဝ် သွက်ဂွံဂွံအရီုဗၚ်ပရေၚ်ဗ္စာရဏာမၞိဟ်တံမာန် ပ္ဍဲအရာပ္ညဳပ္ညပ်ထ္မံက်ရုပ်ရဴ ကုဂကောံဍုၚ်သ္အာၚ်တံဂှ် ညံၚ်ညးစၞး EAO ဒေါအ်လဝ်ပန်ပှော်တံ ဂွံပါလုပ်ဂှ်ကီု၊ ပ္ဍဲအရာဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် EAO တံ ဂွံပါလုပ် နတဲစှ်ေစှ်ေမာန်ဂှ်လေဝ် ပ္တိုန်ထ္ၜးလဝ်ရ။

ကြဴနူသဳကၠဳကဵုကံၚ်ဇြဳပၞာန်တုဲ တၚ်တုပ်စိုတ်သ္ဇိုၚ် ၄ တၚ် မပ္ညဳပ္ညပ်ဂွံလဝ်တံဂှ်ကဵု စၟတ်သမ္တီတုပ်စိုတ် သ္ဂောံရေၚ်တၠုၚ်အာဂတဏံ ၅ တၚ်ဂှ် က္ဍိုပ်သ္ကိုပ်ၜါလ္ပာ်တံ သ္ပဒတန်ထ္ပက်လဝ်စၟတ်တဲမာန်ဂှ် လလောၚ်ပ္တိတ်လဝ်ရ။

ပ္ဍဲကဵုဂကောံဒေါအ်ပန်ပှော် အာစိုပ်သဳကၠဳပရေၚ်ၜိုဟ်လလမ် ကုကံၚ်ဇြဳပၞာန် (၅) ဂကောံဂှ် ဗော်ဗၠးၜးရခေၚ် (ALP) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA PC) ၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဂကောံဗၠးၜးကောန်ဂကူပအိုဝ် (PNLO) တံ ပါလုပ်ရ။

ပရိုၚ်−သြၚ်လောန်တိုၚ်(မ်)

ဗီု−MOI