ကံၚ်ဇြဳပၞာန် ကၠောန်သ္ပပရေၚ်ပြံၚ်သၠာဲဝန်ဇၞော်ဂီုကၠီုရး ပ္ဍဲရးဒေသကေုာံတွဵုရး (၅) တၠ

နေပျဳဒဝ်၊ သေပ်တေမ်ဗာ(၃)

ပြံၚ်သၠာဲခါန်ကၞက်လဝ် ဝန်ဇၞော်ပရေၚ်ဂီုကၠီု ကေုာံကေၚ်ကာပယျဵု ပ္ဍဲတွဵုရးကချေၚ်၊ ကရေၚ်ဍာဲ၊ ကရေၚ် တွဵုရးချေၚ်ကေုာံ ရးအၚ်ဝ ပေါဲဗတိုက်သ္ကာတ်မြဟ်ဒၟံၚ်ကဵု ဒပ်ကံၚ်ဇြဳပၞာန်တအ်ရဂှ် ကံၚ်ဇြဳပၞာန် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁)ရ။

ပၞောဝ်ကဵုဝန်ဇၞော်ပရေၚ်ဂီုကၠီုကေုာံ ကေၚ်ကာပယျဵု ဒးဒုၚ်စုတ်အဇာခါန်ကၞက်လဝ်တအ်ဂှ် စၞးသ္ကိုပ်ဗိုလ်ဇၞော်အောၚ်ကျဳလေန် တွဵုရးကချေၚ်ဂှ် သ္ကိုပ်ဗိုလ်ဇၞော်ဂျဝ်ဒူရ၊ စၞးသ္ကိုပ်ဗိုလ်ဇၞော် မျေအ်ဝေ တွဵုရးကရေၚ်ဍာဲဂှ် သ္ကိုပ်ဗိုလ်ဇၞော်တာန်သိုဝ်အောၚ် ကေုာံ စၞးသ္ကိုပ်ဗိုလ်ဇၞော်မျိုဝ်မေန်နောၚ် တွဵုရးကရေၚ်ဂှ် သ္ကိုပ်ဗိုလ်ဇၞော်မေန်ဒူကျဝ်တအ် ပါလုပ်ဒၟံၚ်ရ။

သ္အာၚ်နူဂှ်ပၠန် စၞးဝန်ဇၞော်ပရေၚ်ဂီုကၠီုကေုာံ ကေၚ်ကာပယျဵု တွဵုရးချေၚ် သ္ကိုပ်ဗိုလ်ဇၞော်ဟာန်ဝေန်အောၚ်ဂှ် သ္ကိုပ်ဗိုလ်ဇၞော်တုၚ်ထောန်အောၚ် ကေုာံ စၞးဝန်ဇၞော်ဂီုကၠီုရးဂကောံအလဵုအသဳ ရးဒေသဇၞော်အၚ်ဝ ဗိုလ်ဇၞော်ကျဝ်ကျဝ်မေန်ဂှ် ခါန်ကၞက်စုတ်လဝ် သ္ကိုပ်ဗိုလ်ဇၞော်နေလေန်သိုဝ်ရ။

ဇြေယျ အကြာပ်ဒပ်ဇၞော် CDM ဂှ်မ္ဂး ပ္ဍဲကဵုဝန်ဇၞော်ဂီုကၠီုရး ဒးဒုၚ်ထပ်စုပ်လဝ်အဇာတအ်ဏံ ဟိုတ်နူညးအယုက်ပေၚ်တအ် ပါလုပ်ဒၟံၚ်ဂှ်ရ အတိုၚ်အခိုက်လၟေၚ်ကမၠောန်ဒပ်ပၞာန် ပြံၚ်ကဵုလဝ်ဒၞာဲ ကုမၞိဟ်ဍောတ်တအ်တုဲ ဒှ်ညံၚ်ရဴ စကာကဵုကၠောန်ဒၟံၚ် ကတိုၚ်ကတိုၚ်ကၟဟ်ဟ်ရဂှ် သ္ၚဳဂၠိပ်လဝ်ရ။

ပ္ဍဲတွဵုရးကဵု ရးဒေသဇၞော် ဝန်ဇၞော်ဂီုကၠီု ကေုာံကေၚ်ကာပယျဵု ကံၚ်ဇြဳပၞာန် ထပ်စုတ်အဇာ ခါန်ကၞက်လဝ်တအ်ဂှ် ဒေသဒစဵုဒစးပၠန်ဂတးရပ်လွဟ်ကဵု သၞောတ်တၠအဝဵုပၞာန် ဇြဟတ်ခိုဟ် ပါလုပ်ဒၟံၚ် ဗွဲမဂၠိုၚ်ရ။

တွဵုရးကချေၚ်၊ တွဵုရးကချေၚ်၊ တွဵုရးကရေၚ်ဍာဲကေုာံ တွဵုရးကရေၚ်တအ်ဂှ် ပရေၚ်ဖျေံသ္ဇိုၚ်ချဳဒရာၚ် ဂကောံရပ်လွဟ်ကောန်ဍုၚ်အရၚ်မဆေၚ်စပ်(EAO) မၞုံပ္ဍဲဒေသ ဇြဟတ်ခိုဟ်ဒၟံၚ်တုဲ ပံၚ်တောဲကဵု ဒပ်စဵုဒၞာညးဍုၚ်ကွာန် (PDF)တအ်တုဲ ရပ်လွဟ်ပၠန်ဂတးဒၟံၚ်ကဵု ကံၚ်ဇြဳပၞာန်ရ။

ဗိုလ်ဇၞော် CDM ကောၚ်ဒူဝေန်ဂှ်လေဝ် ဂီုကၠီုရးဒးဒုၚ်ထပ်စုတ်လဝ်အဇာတအ်ဂှ် ဒှ်ညးယိုက်ကၠုၚ်ဒၟံၚ်တာလျိုၚ် ကၠာနူဟွံဂွံသီအဝဵုတေံကဵုဂိတုတုဲ ဟိုတ်နူမံၚ်လဝ်လအ်လဒၟံၚ်ဂှ်ရ ပြံၚ်လဝ်တာလျိုၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

နကဵုကံၚ်ဇြဳပၞာန် ထပ်ဂလိုၚ်ပ္တိုန်လဝ် အယုက်ကာလကာတၟေၚ် (၆) ဂိတုပၠန်ဂှ် ကၠောန်လဝ်ပရေၚ်ပြံၚ်လှာဲ ညးလုပ်ဂကောံကံၚ်ဇြဳလ္ၚဵုတုဲ ဝန်ဇၞော်ဂကောံအလဵုအသဳကၟိန်ဍုၚ်ကီု သီုကဵုသၞာဲဒဴကၟိန်ဍုၚ်ကဆံၚ်လ္တူလ္ၚဵုဂှ်လေဝ် ပြံၚ်သၠာဲခါန်ကၞက်လဝ် ပ္ဍဲဂိတုအဝ်ဂါတ် ပထမသတ္တာဂှ်ရ။

အခိၚ်လၟုဟ်ဏံ အယုက်ကာလကာတၟေၚ် ကံၚ်ဇြဳပၞာန်ထပ်ကေတ်လဝ်ဂှ် ဟိုတ်နူအိုတ်အာ မွဲဂိတုတုဲဂှ်ရ ပ္ဍဲပွိုၚ် (၅)ဂိတုသှ်ေဒၟံၚ်ဏီဂှ် သွက်ဂွံထိၚ်ဒဝ်ယန္တရာပရေၚ်အုပ်ဓုပ်ပၞာန် ကေုာံ ညံၚ်ကၟိန်ဍုၚ်ဂွံညိၚ်ဝတ်မာန်ဂှ် ကံၚ်ဇြဳပၞာန် ဂစာန်ပ္တိတ်ဒၟံၚ်ဇြဟတ် အိုတ်အစောန်ရဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တအ် ခါတ်အကာဲ ပါ်ပါဲလဝ်အိုတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -MOI