ညးဍုၚ်ကွာန်ဗွဲမဂၠိုၚ် ဒးဒုၚ်ဒၟံၚ်ဘဲကြအ်ဒိုဟ်မၞိဟ်မွဲဂကောံ က္ဍိုပ်သ္ကိုပ်ပၞာန်ဟီု

နေပျဳဒဝ်၊ သေပ်တေမ်ဗာ(၃)

နဒဒှ်ဖိုလ်အဆက် ပွပ္ကီုပရာပ်က္တဵုဒှ်ကၠုၚ် ဟိုတ်နူပရေၚ်သီအဝဵုဂှ် ညးဍုၚ်ကွာန်ဗွဲမဂၠိုၚ် ဒးဒုၚ်ဒၟံၚ်ဘဲကြအ်ဒိုဟ် မၞိဟ်မွဲဂကောံရဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် ဟီုလဝ်ရ။

ပ္ဍဲကဵုကောံဓရီုကံၚ်ဇြဳပၞာန် ကၠောန်ဗဒှ်လဝ် ပ္ဍဲနေပျဳဒဝ် ပ္ဍဲသေပ်တေမ်ဗာ စၟတ်တ္ၚဲ(၁)ဂှ် ဆက်စပ်ကဵုပရေၚ်ဒဒှ်ပွပ္ကီုပရာပ် က္တဵုဒှ်ဒၟံၚ် အလုံမွဲဍုၚ်တုဲ ဟီုဂးလဝ်ရ။

က္ဍိုပ်သ္ကိုပ်ပၞာန်ဂှ် ၜိုန်ရရေၚ်တၠုၚ်ကဵုဒၟံၚ် ပရေၚ်ဖောအ်ဗြေဝ်တဴတက် အလုံမွဲဍုၚ် ဗွဲမဂတာပ်အခိၚ်ကီုလေဝ် ဟိုတ်နူပရေၚ်ပ္ကီုပရာပ် နွံဒၟံၚ်ဂှ်ရ ရေၚ်တၠုၚ်ကဵုပရေၚ်ဖောအ်ဗြေဝ်တဴတက် ပ္ဍဲတိဍာ်တအ်ဂှ်ဟွံဂွံ ဂွံညာတ်ကေတ်ဒၟံၚ်ရဂှ် ဟီုလဝ်ရ။

ဟိုတ်နူပရေၚ်ပ္ကီုပရာပ်တုဲ ကၟိန်ဍုၚ်လဇုဲလဇ သှ်ေၜက်ဒၟံၚ်လကြဴကီု ဖိုလ်အဆက်ဂှ် ညးဍုၚ်ကွာန် ပ္ဍဲတိဍာ်ဂှ် ဒးဒုၚ်ဒၟံၚ်တုဲ နကဵုညးဍုၚ်ကွာန်တအ် ရံၚ်ကဵုဂုဏ်ဖိုလ်ဒေသ ဂုဏ်ဖိုလ်တိဍာ်တုဲ သွက်ဂွံပံၚ်တောဲရေၚ်တၠုၚ်ကဵု သွက်ပရေၚ်ဗတိုက်သရိုဟ်ပွပ္ကီုပရာပ် ပရေၚ်ညိၚ်ဝတ်ၜိုဟ်လလံဂှ် က္ဍိုပ်သ္ကိုပ်ပၞာန်ဟီုသ္ဂးလဝ်ရ။

ပ္ဍဲကောံဓရီုဂှ်မ္ဂး သွက်ဂွံဒ္ဂေတ်ဗက် သၞောတ်ဒဳမဝ်ကရေဇြဳဗော်ဇဳ ကေုာံ လၟေၚ်ကမၠောန်ဒက်ပ္တန်ကၟိန်ဍုၚ်ပံၚ်ကောံ ဒုၚ်သ္ဇိုၚ်ကဵု သၞောတ်ဖေတ်ဒရေဝ် ကေုာံ ဒဳမဝ်ကရေဇြဳဂှ် ညံၚ်ညးဍုၚ်ကွာန်ကောန်ဍုၚ်အရၚ်တအ်သီုဖအိုတ် ဂွံပါလုပ်ပံၚ်တောဲဂှ် က္ဍိုပ်သ္ကိုပ်ပၞာန် ဗတိုက်ဖ္အောဝ်လဝ်ဏီရ။

ပွပ္ကီုပရာပ်က္တဵုဒှ်ဒၟံၚ်ပ္ဍဲဍုၚ်တအ်ဂှ် မံက်ဂတဝ်တိတ်ကၠုၚ် ဟိုတ်နူပရေၚ်ဒပ်ပၞာန်သီအဝဵုတုဲ တၠဒုဟ်ပရေၚ်ပ္ကီုပရာပ်အဓိကဂှ် ဒှ်ဂကောံပၞာန်ဟေၚ်ရဂှ် ဂကောံဇြဟတ်ပၠန်ဂတးတအ် က္လေၚ်ဟီုပလန်လဝ်ရ။

အတိုၚ်လိက်ဒုၚ်စဳရေၚ် ISP – Myanmar မဒှ်ဂကောံသုတေသနမွဲဂကောံဂှ်မ္ဂး ဟိုတ်နူပဋိပက္ခရပ်လွဟ် က္တဵုဒှ်ကၠုၚ် မွဲကရောံပရေၚ်သီအဝဵု အလုံမွဲကၟိန်ဍုၚ်တုဲ ကောန်အရာပ် စဵုကဵု ၈၆၀၀ ပြၚ် ဒးချိုတ်လဝ်ရဂှ် လလောၚ်တြးလဝ် ပ္ဍဲဂိတုဂျောန်တုဲကၠုၚ် စၟတ်တ္ၚဲ (၁၄)ဂှ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – MRTV