ဒပ်ပံၚ်ကောံ KNLA ဗတိုက်သီကေတ် ဗဒိုပ်တေတ်ချဇြုက်ကံၚ်ဇြဳပၞာန်

ညံၚ်လေဝ်ပေန်၊ သေပ်တေမ်ဗာ(၃)

ဗဒိုပ်တေတ်ချဇြုက်ကံၚ်ဇြဳပၞာန် မၞုံပွိုၚ်ဍုၚ်မုမ် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ဒပ်ပံၚ်ကောံ ဒပ်မဟာ (၃)တအ် ဗတိုက်သီကေတ်မာန်လဝ်တုဲ ပ္ဍဲကဵုပေါဲဗတိုက်ဂှ် လ္ပာ်ဒပ်ကံၚ်ဇြဳပၞာန် ဒးချိုတ်လတ် (၁၅)တၠရဂှ် ဗဟဵု KNU လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၂)ရ။

ဗဒိုပ်တေတ်ချဇြုက် မဒှ်ဗဒိုပ်ဖျေံသ္ဇိုၚ်ဒပ်ကံၚ်ဇြဳပၞာန် မၞုံပွိုၚ်ဍုၚ်မုမ် KNU ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် (KNLA) တအ် စဗတိုက်လဝ် ပ္ဍဲဂိတုအဝ်ဂါတ် စၟတ်တ္ၚဲ (၃၁)တုဲကၠုၚ်တေံ အခိၚ်နူဂယး (၅)နာဍဳဂှ်တုဲ ပ္ဍဲဂိတုသေပ်တေမ်ဗာ စၟတ်တ္ၚဲ (၁)အခိၚ်ဗ္တံ (၅)နာဍဳကဝက်ဂှ် သီကေတ်ဗဒိုပ်မာန်ရ။

ပ္ဍဲကဵုဗဒိုပ်တေတ်ချဇြုက်ဂှ် တံဒပ်ခလရ (၄၃၉)၊ ခလရ (၆၀)၊ ခမရ (၃၅၀)၊ ခမရ (၃၅၁) ကံၚ်ဇြဳပၞာန်တအ် ဖျေံလဝ်ဗဒိုပ်တုဲ အခိၚ်ဒပ်ဒပ်ပံၚ်ကောံ KNLA တအ် လုပ်ဗတိုက်လဝ်ဂှ် လ္ပာ်ကံၚ်ဇြဳပၞာန် ဒးချိုတ်လဝ် ပ္ဍဲပေါဲဗတိုက် (၁၅)တၠတုဲ သီဂွံလဝ် ပၠံၚ်ကောန်မာန်ဒိုဝ် ၂ ဒကိုအ်၊ လွဟ်စက် ၁ ဒကိုအ်၊ ပံၚ်လၟိဟ်လွဟ်ဍောတ် ၁၉ ဒကိုအ်တုဲ လ္ပာ်ဒပ်ပံၚ်ကောံ KNLA ဂှ် ဒးပြဟ်လလုဲလဝ် ၂ တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဗဒိုပ်တေတ်ချဇြုက်တအ်ဂှ် စၟဳစၟတ်သၟာန်သၟုက်ဒၟံၚ် ညးဍုက်ကွာန်အာတရဴတအ်ကီု၊ ပန်ဖျေံဒၟံၚ်လွဟ်ဇၞော် ပ္ဍဲဗွိုၚ်ကမၠောန်ညးဍုၚ်ကွာန်တအ် ကၠောန်စသုၚ်ဒၟံၚ် မၞုံဗ္ဒာဲဂှ် သီုပ္ဍဲကွာန်ကီု၊ စွံလဝ်ညးဍုၚ်ကွာန် ညံၚ်ကၟာၚ်ဒၞးတုဲ သိုၚ်လဝ်ဗဒိုပ်ကီု ကေတ်ဇြဟတ်လွဟ်တုဲ ဟိုတ်နူဍဵုဍိုက်သ္ပမာန်ဒၟံၚ် ညးဍုၚ်ကွာန်တအ်ဂှ်ရ ဒးဗတိုက်သီကေတ်လဝ်ရဂှ် KNU လလောၚ်တြး ဟီုဂးလဝ်ရ။

ဃောသီကေတ်ဗဒိုပ်တေတ်ချဇြုက်ဂှ် ဒပ်ကံၚ်ဇြဳပၞာန်ဂှ် နူပ္ဍဲဗဒိုပ်သၟးဟွံသေၚ် သီုနူကဵုသ္ၚိဌာန်ညးဍုၚ်ကွာန်၊ ဘာဗ္တောန်လိက်ကေုာံ ရုၚ်ဂဥုဲတအ်ဂှ် မံၚ်ဒၟံၚ်တုဲ ကလေၚ်ဒုၚ်ဒဝ်ပန်လဝ်ကီု၊ ပါဲနူပန်ပှော်လဝ်လွဟ်ဇၞော် နူကဵုတံဒပ်ဖျေံသ္ဇိုၚ်ကံၚ်ဇြဳပၞာန်တုဲ ဟိုတ်နူသုၚ်စောဲပန်ရီုလဝ် သီုက္ၜၚ်ကျာဂှ်ရ ဒးဗတိုက်သီကေတ်လဝ် ဗွဲမဝါတ်ဂါတ်ရဂှ် KNU ဟီုလဝ်ရ။

ပ္ဍဲပေါဲဗတိုက်သီဗဒိုပ်ဂှ် ဟိုတ်နူဒပ်ကံၚ်ဇြဳပၞာန် ကၠုၚ်ပန်ပှော်လဝ်ကဵုက္ၜၚ်ကျာတုဲ လၟိဟ်မၞိဟ် ၅၆၀၀ ပြၚ် နူကွာန် ၈ ကွာန်မပ္တံကဵု တေတ်ချဇြုက်၊ ဖိုဝ်တဝ်သု၊ တိုၚ်ပေန်၊ ဥယှေတ်ခေၚ်၊ ၚလောက်တိုက်၊ မျေတ်ယျေဝ်ကွာန်ကရေၚ် ကေုာံမျေတ်ယျေဝ်ကွာန်ဗမာတအ် ဒးဂြိပ်ဒဴပါဲဓလေတ်ဒၟံၚ် ဒၞာဲဗၠးဘဲလမျီုရဂှ် ဂွံတီကေတ် နူတၚ်လလောၚ်တြး KNU ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU