ကိုဝ်ရဳယာသၟဝ်ကျာ ထပ်ပန်ဗလးဏာ ကမ်လှောဝ်ခရုဇ်

ပျုမ်ယာမ် – သေပ်တေမ်ဗာ(၃)

ပ္ဍဲဂိတုသေပ်တေမ်ဗာသ္ကုတ်ကၠာဂှ် ကၟိန်ဍုၚ်ကိုဝ်ရဳယာသၟဝ်ကျာ ထပ်ပန်ဗလးဏာ ကမ်လှောဝ်ခရုဇ် ပ္ဍဲကဵုက္ၜဳ ဗွဲမဂၠိုၚ်ဂၠေၚ်ရဂှ် ဒပ်ပၞာန်ကိုဝ်ရဳယာသၠုၚ်ကျာ ဟီုသ္ဂးလဝ်ရ။

စပ်ကဵုပရေၚ်ပန်ဗလးဏာကမ်လှောဝ် တၚ်ဂၞၚ်သောဲသောဲဗြောဲဗြောဲတအ်ဂှ် ညးတာလျိုၚ်ထံၚ်ပရိုၚ် ကိုဝ်ရဳယာသၠုၚ်ကျာကေုာံ အမေရိကာန်တအ် သ္ၚဳဂၠိပ်ပါ်ပါဲဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး သ္ကိုပ်က္ဍိုက်က္ဍိုပ်ပၞာန်ပံၚ်တောဲတအ်ရ။

ပ္ဍဲသ္ကုတ်လကြဴ ဂိတုတုဲကၠုၚ်တေံ ပရေၚ်ဗလးပတိုန်ဂြိုဟ်ပတောံထံၚ်ပရိုၚ် ဟွံအံၚ်ဇၞးလဝ် ပရေၚ်ဟီုဂးပါ်ပါဲ ဗော်ပရေၚ်ဍုၚ်အဓိကကၟိန်ဍုၚ် ဒးမံက်ကၠုၚ်လဝ်ဂှ်ကီု သီုပရေၚ်စမ်ၜတ်ကမ်လှောဝ် ကၠောန်ဗဒှ်လဝ် အခိၚ်တုဲကၠုၚ်ဟွံလအ်ဏီ ကေုာံ ပရေၚ်ပ္ကတ်ပ္ကေၚ်ပၞာန်တအ် ဒှ်လကြဴအိုတ်ရဂှ် ဂွံတီကေတ်ရ။

“ဣဏံဂှ် ဒှ်ကမၠောန်ပြဝ ဂၠာဲသၞဘပဠဒၟံၚ် ပရေၚ်ၜိုဟ်လလံ တ္ကအ်ကိုဝ်ရဳယာ မွဲနဲဗီုရ” ဂှ် ညးမၞုံအခေါၚ်ဟီုဂး ဗော်ဂွံအဝဵုကိုဝ်ရဳယာသၠုၚ်ကျာ ဟီုလဝ်ရ။

ပ္ဍဲတၚ်လလောၚ်တြး မဳဒဳယာကၟိန်ဍုၚ်ကိုဝ်ရဳယာသၟဝ်ကျာပိုၚ် KCNA လလောၚ်တြးလဝ်ဂှ်မ္ဂး ဟိုတ်နူဂျပါန်ကၠောန်ဗဒှ် ကမ်လှောဝ်ပန်ခရာဇမ္ၚောဲတုဲ ပရေၚ်ကြံၚ်မ္ၚိုဟ်ပ္ဍဲဒေသ သၠုၚ်တိုန်ကၠုၚ်ရဂှ် ဌာနဝန်ဇၞော်ဍုၚ်သ္အာၚ် စောတ်စောဲလဝ်တုဲ ဓမံက်ထ္ၜးလဝ် ပရေၚ်ပန်ဗလးလဝ် ကမ်လှောဝ်ဂှ် ဟၟဲရ။

ဂျပါန် ကေုာံအမေရိကာန်တအ်ဂှ် သွက်ဂွံကလေၚ်ပၠန်တဲကဵု အထောဋ်ကမ်လှောဝ် ပြဟ်နူရမျှာၚ် ကြုက်၊ ရုယှာ ကေုာံ ကိုဝ်ရဳယာသၟဝ်ကျာတအ် ကၠောန်ဗဒှ်ဒၟံၚ်ဂှ် ခြာဟွံလအ်ဏံ သွက်ဂွံပံၚ်တောဲကၠောန်ဗဒှ်အာ ကမ်လှောဝ်ကြတ်အကြာ သွက်ဂွံတုပ်စိုတ်နွံဒၟံၚ်ရဂှ် လိက်ပရိုၚ်ဂျပါန်မွဲဌာနဂှ် ဟီုလဝ် ပ္ဍဲဂိတုတုဲကၠုၚ်ဏံရ။

နဒဒှ်ကလေၚ်ပလန်တဲကဵု ပရေၚ်ပျုမ်ယာမ် ဗလးပတိုန်ကမ်လှောဝ်ဂှ် ဖျေံလဝ် ပရေၚ်ကေတ်အရေဝ်ကၟာတ်လဒဵု မၞိဟ် (၅)တၠ ကေုာံ ကုမ္ပဏဳ နူကိုဝ်ရဳယာသၟဝ်ကျာမွဲကုမ္ပဏဳရဂှ် ကိုဝ်ရဳယာသၠုၚ်ကျာ လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁)ရ။

ပျုမ်ယာမ်ဂှ် ဌာန်ပ္တဝ်အလုံမွဲကၟိန်ဍုၚ်ကိုဝ်ရဳယာသၠုၚ်ကျာ ဗီုပြၚ်တုပ်မွဲဂှ် ကၠောန်သ္ပလဝ် ပရေၚ်ဗတိုက်ပန် သၞောတ်ဂတးတိ ကေုာံနျူကလဳယာရဂှ် ဓမံက်လဝ် ပ္ဍဲမဳဒဳယာကၟိန်ဍုၚ်ပိုၚ် KNCA ဏီရ။

ပရေၚ်ပံၚ်တောဲပ္ကတ်ပ္ကေၚ်ပၞာန် ကိုဝ်ရဳယာသၠုၚ်ကျာကဵု အမေရိကာန် ရာသဳက္ညၚ်လၟေၚ်သၞာံ ကော်ဂး Ulchi Freedom Shield ဂှ် ကြဴနူကၠောန်ဗဒှ်လဝ် ပရေၚ်ပ္ကတ်ပ္ကေၚ်က္ၜၚ်ကျာဂြာတ်ထောံဗုမ် B-1B လအ်ပွိုၚ် (၁၁)တ္ၚဲတုဲဂှ် အာစိုပ်လဝ်ဒတုဲ ပ္ဍဲခရာ မွဲၜါတ္ၚဲ တုဲကၠုၚ်ဏံရ။

ပ္ဍဲအခိၚ်ပရေၚ်ပ္ကတ်ပ္ကေၚ်ပၞာန် အာစိုပ်လဝ်ဒတုဲ ခြာကဵုနာဍဳဂှ်ဟေၚ် ကိုဝ်ရဳယာသၟဝ်ကျာ နဒဒှ်က္လေၚ်ပလန်တဲဂှ် ပန်ဗလးဏာ ကမ်လှောဝ်ထိၚ်သၞေဝ်တုဲ ဒစဵုဒစးလဝ် ပရေၚ်တြးစွံလဝ် က္ၜၚ်ကျာဂြာတ်ထောံဗုမ်အမေရိကာန် စှ်ေကိုန်ဗျူဟာတအ်ဂှ်တုဲ ပရေၚ်ပ္ကတ်ပ္ကေၚ်ပၞာန်တအ်ဂှ်လေဝ် ဒှ်ပရေၚ်ပ္ကတ်ပကေၚ်စမ်ၜတ် သွက်ပေါဲပၞာန်ဇေတ်တ်ရ ဟီုပျုတ်ဗ္ဒေက်လဝ်ရဂှ် ဂွံတီကေတ်ရ။

Ref,Reuters