ကောန်ပၞာန် ကေုာံ ဗၠာဲသၟိၚ် ကၠုၚ်ပံၚ်လဝ်တောဲကဵု ညးဍုၚ်ကွာန်တံဂှ် နွံကၠုၚ် စဵုကဵုမွဲဠက်ဘာ်ပြၚ်

မတ်မလီု၊ သေပ်တေမ်ဗာ (၃)

အပ္ဍဲကာလဒပ်ပၞာန်သီလဝ်အဝဵုကၟိန်ဍုၚ်ဗၟာ ပွိုၚ် (၂) သၞာံပြၚ်ဏံ ထောံလသာဒပ်ကံၚ်ဇြဳပၞာန်တုဲ ကောန်ပၞာန် ကေုာံ ဗၠာဲသၟိၚ် မပံၚ်လဝ်တဲ ပ္ဍဲပရေၚ်ချဳဒရာၚ်ဒစဵုဒစးတၠအဝဵု နနဲဟွံပကီုပရာပ် CDM တံဂှ် နွံကၠုၚ် စဵုကဵု (၁၅၀၀၀) ယျဂှ် NUG ဟီုရ။

ပ္ဍဲကဵုမၞိဟ်လုပ်လဝ် CDM ဂမၠိုၚ် မၞိဟ်ပ္တိတ်လဝ်ကုဒ် (code) တံလေဝ်နွံတုဲ သွက်ဂွံပ္တိတ်ကဵု ကုဒ် CDM မၞိဟ်စၟဳတ်ဒၟံၚ်တံကီု မၞိဟ်ဆက်စၠောံကၠုၚ် သွက်ဂွံထပ်ကၠောန်တံဂှ်လေဝ် ပါလုပ်ရောၚ် သ္ဂးလဝ်ရ။

သ္အာၚ်နူကဵုတိဍာ်ဇြဟတ်ပၠန်ဂတးခိုဟ်တံဂှ် ပ္ဍဲကဵုဒပ်ရပ်လွဟ်ကောန်ဍုၚ်အရၚ် မက္တဵုဒှ်ဒၟံၚ်ပေါဲဗ္တိုက် ကုကံၚ်ဇြဳပၞာန်တံဂှ်လေဝ် ကောန်ပၞာန် CDM ကေုာံ ဗၠာဲသၟိၚ် မကလေၚ်ယိုက်ဂၠေၚ်ဒၟံၚ်တာလျိုၚ်တံ နွံဒၟံၚ် ၜိုတ် (၅၀၀) ပြၚ်ရောၚ် ဂွံတီကေတ်ရ။

ပြဟ်ဟ်ဏံ အခိၚ်ကာလသီအဝဵုလအ်ကၠုၚ်ဗက် ဟိုတ်နူပရေၚ်ဇီုကပိုက်ချိုတ်ဂျိုၚ် ဒပ်ကံၚ်ဇြဳပၞာန်တံဂှ်တုဲ ရဲဂြိပ်နူဒပ်ပၞာန်တံ ဂၠိုၚ်ကၠုၚ်ဒၟံၚ်တုဲ လၟိဟ်ဏံဝွံ ဂၠိုၚ်နူကဵုလၟိဟ်လုပ်ကၠုၚ် CDM မာန်ဂှ် ညးမၞုံအခေါၚ်ဟီုဂး ဌာနဝန်ဇၞော်ကာစဵုဒၞါ NUG ဥူမာၚ်ၚ်ဇြိုဲ ဟီုရ။

“ယဝ်ရ ဒေါအ်ဟွံဂွံ ဒးကလေၚ်စဴအာပ္ဍဲဒပ်တေံမ္ဂးလေဝ် အခိၚ်လၟုဟ်ဂှ် ပ္ဍဲကဵုဒပ်တေံ ဟိုတ်နူဇြဟတ်လေၚ်ဒိုက်တံ ဂၠိုၚ်ဒၟံၚ်ဂှ်ရ ဂွံကလေၚ်ကေတ်ဒုဟ်ဒဏ် ကုဍေံတံဗီုကဵုကၠာတေံဂှ် ဟွံကၠောန်မွဲသာ် နိမန်ကေတ်နကဵုဓုပ်နာနာတုဲ သ္ကဵုယိုက်ဂၠေၚ်ဒၟံၚ်တာလျိုၚ် ဒဵုကဵုကဆံၚ်ဏံဂှ် ဇြဟတ်ဍေံဆုတ်ယောၚ်အာယျ” သာ်ဝွံ ဥူမာၚ်ၚ်ဇြိုဲ ဟီုရ။

သ္အာၚ်နူဂှ်ပၠန် အလဵုအသဳညဳသၟဟ်ဂကူဝွံ နူကဵုဂိတုသေပ်တေမ်ဗာ သၞာံ ၂၀၂၁ လောန်ကၠုၚ်တေံဂှ် စဒုၚ်ဒၟံၚ်တဲ CDM တံတုဲ လၟေၚ်ဂိတု သြန်ဗာတ်သေံ (၁၀၀၀) သၟးဟွံက မၞိဟ်ပါကၠုၚ်သီုဂြောဝ်ဂတာတံဂှ်လေဝ် အတိုၚ်လၟိဟ်မၞုံဂှ် ထပ်ကဵုဒၟံၚ်ရောၚ် ဟီုလဝ်ဏီရ။

NUG ဂှ် မ္ၚးနူသြန်ထံက်ပၚ်တံဂှ် သွက်ကောန်ၚာ်သၟတ်၊ သွက်ပရေၚ်ထတ်ယုက်တံဂှ် နကဵုအထံက်အပၚ်ပရေၚ်ပညာ သွက်ဂွံသ္ပဒတဴ ပ္ဍဲကဵုတိဍာ်ဗၠးၜးမာန်ဂှ်လေဝ် ကၠောန်ကဵုဒၟံၚ် CDM တံ နွံဒၟံၚ်ရ။

ရပ်လွဟ်ဒစဵုဒစး ကုဒပ်ကံၚ်ဇြဳပၞာန်တုဲ ကောန်ဒပ် CDM မလုပ်ဒၟံၚ်ပေါဲဗ္တိုက် ပ္ဍဲကဵုပၠန်ဂတးက္ညၚ်ဏံဂှ်လေဝ် NUG သွက်ဂွံကၠောန်ဗဒှ်ကဵုသ္ဘၚ်ပ္တိုန်ဂုန်စရာဲ နွံဒၟံၚ်ဂှ် ညးတာလျိုၚ်တံ ဟီုဂးလဝ်ရ။

အပ္ဍဲကဵုဒပ်ကံၚ်ဇြဳပၞာန် မ္ဒးပံက်လဝ်မုက်ပၞာန် နကဵုဗ္ၜတ်အလုံဍုၚ်ဂှ် မ္ၚးနူသၞောတ်ကဵုအမိၚ်တံ ယောၚ်ယာကၠုၚ်ဂှ် သီုကဵုဍဵုဍိုက်ကၠုၚ် ကောန်ဒပ်တံဂှ်ရ မၞိဟ်လုပ်စိုပ်ကၠုၚ် CDM တံ သာဂၠိုၚ်မာန်ဏောၚ် ညးလ္ၚတ်မၚ်ရံၚ်ဒပ်ပၞာန်တံ ကဵုလဝ်တၚ်စၟတ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု− KNU (အခိၚ်ကောန်ဒပ်ကံၚ်ဇြဳပၞာန်မွဲတၠ လုပ်စိုပ်ဖျေံလွဟ် သီုကဵုလွဟ်လက်နက်)