ၜဳကလေၚ်၊ သေပ်တေမ်ဗာ(၅)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲကဵုပေါဲဗတိုက်ၜါလ္ပာ်က္တဵုဒှ်လဝ် အကြာကွာန်အလူလေဝ်ကဵု ကွာန်တပျေနဳဂှ် သ္ဂံၚ်ဒပ်ပံၚ်ကောံ KNLA၊ PDF ဒးပြဟ်လလုဲလဝ် (၃) တၠရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။
ဂိတုသေပ်တေမ်ဗာ စၟတ်တ္ၚဲ (၄) အခိၚ်နူဂယး ၜိုတ် (၈)နာဍဳဂှ် လ္ပာ်ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA သွက်ဂွံကၠောန်ပရေၚ်ချဳဒရာၚ်ပၞာန် ဃောအာဒၟံၚ်ဂှ် ပ္တဝ်လုပ်အာကဵုဒပ်ကၚ်ကံၚ်ဇြဳပၞာန်တုဲ ဒှ်လဝ်ပေါဲဗတိုက်ဆေၚ်မုက်ရ။
ပ္ဍဲကဵုပေါဲဗတိုက်ဆေၚ်မုက်ၜါလ္ပာ် က္တဵုဒှ်လဝ် လအ်ပွိုၚ်မွဲနာဍဳကဝက်ပြၚ်ဂှ် နူလ္ပာ်ကံၚ်ဇြဳပၞာန် ဂွံလဝ်ကၠာတဲရဂှ် ညးတာလျိုၚ်ဒပ်ပၠန်ဂတး ဗလးမုက်တိမွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုပေါဲဗတိုက်ၜါလ္ပာ်ဂှ် သ္ဂံၚ်လ္ပာ်ဒပ်ပံၚ်ကောံ KNLA (၃)တၠ ဒးပြဟ်လလုဲလဝ်တုဲ လွဟ်လက်နက်မကမ်းညးတအ်လ္ၚဵုဂှ် ဒးဒုၚ်သီဏာလဝ်တုဲ ပရေၚ်ဇီုကပိုက်ချိုတ်ဂျိုၚ်လ္ပာ်ကံၚ်ဇြဳပၞာန်ဂှ်မ္ဂး ဟွံတီကေတ်လဝ်ဏီရ။
ဟိုတ်နူပေါဲဗတိုက်ဂှ်တုဲ ညးဒေသကွာန်အလူလေဝ် ကေုာံ တပျေနဳတအ် ဒးဂြိပ်ပါဲဓလေတ်ဒၟံၚ် သီုအလုံမွဲကွာန်တုဲ ဗွဲမဂၠိုၚ်ဂှ် ဒးပါဲဒၟံၚ်ဘဲပၞာန် ပ္ဍဲကွာန်ဗၠးဘဲ ကေုာံပ္ဍဲအရာပ်လ္တူဍုၚ်တအ်ရ။
အခိၚ်လၟုဟ်ပြဟ်ဟ်ဏံလေဝ် ဟိုတ်နူပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ အကာဲအရာပေါဲဗတိုက်သွက်ဂွံထပ်က္တဵုဒှ်ကၠုၚ် နွံမာန်ဒၟံၚ်ရဂှ် ဂွံတီကေတ် အတိုၚ်လဟီုညးတာလျိုၚ်ဒပ်ပံၚ်ကောံ ဂကောံဇြဟတ်ပၠန်ဂတးတအ်ရ။
ပ္ဍဲပွိုၚ်ဍုၚ်ၜဳကလေၚ် ဂကောံဇြဟတ်ပၠန်ဂတး ဇြဟတ်ခိုဟ်ဒၟံၚ်ဂှ်မ္ဂး သ္ပတံနူဂိတုတုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံတအ် ပေါဲဗတိုက်ထပ်က္တဵုဒှ်ကၠေတ်ကၠုၚ်ဒၟံၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ချာန်နေဝ်တြးဝါဒ
sanlontai