ဗြဝတဳ – သေပ်တေမ်ဗာ (၅)
တွဵုရးကရေၚ်၊ ရုၚ်ခရိုၚ်ပွိုၚ်ဍုၚ်ဗြဝတဳ ဟိုတ်နူဒးဒုၚ်ထောံဖျေံလဝ်ဗုမ် နကဵုဒရုမ်တုဲ ပါလုပ်သီုဒုသ္ကိုပ်ဗိုလ်ဇၞော်အောၚ်ကျဝ်မေန် ဒးချိုတ်လဝ် (၅)တၠတုဲ ညးဇီုကပိုက်ဒးလဝ်ဘဲဝပ် နွံဒၟံၚ်ရဂှ် ဂွံတီကေတ် နူညးစုက်လုက်ကဵု ဂကောံဒပ်ဗၠာဲသၟိၚ်တအ်ရ။
ပရေၚ်ဒဒှ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၃)အခိၚ်ဇိုၚ်သဝ်တ္ၚဲဂှ် ကြဴနူရုၚ်ခရိုၚ်ပွိုၚ်ဍုၚ် ဗြဝတဳဒးဒုၚ်ဂြာတ်ထောံဖျေံဗုမ်တုဲဂှ် ဃောဒပ်ပၞာန် ကေုာံသ္ကိုပ်ပရေၚ်အုပ်ဓုပ်တအ် ကၠုၚ်စၟဳစၟတ်ဂှ် ဟိုတ်နူဒးဒုၚ်ဂြာတ်ထောံဖျေံလဝ်ဗုမ်ပၠန်ဂှ်ရ ပရေၚ်ဒးဇီုကပိုက်ချိုတ်လဝ် နွံကၠုၚ်ရ။
“အဲမိၚ်လဝ်ဂှ် ကၠုၚ်ထောံဖျေံလဝ်ဗုမ်ကဵုဒရုမ် အလန်ပထမဂှ် စရေမွဲတၠ ဒးလဝ်ဝပ်ရ။ အေဂှ် ခရကကဵု မၞိဟ်ဍေံတအ်ကၠုၚ်ရံၚ်ဂှ် ဍေံတအ်ထပ်ဒးလဝ်။ သ္ကိုပ်ဗၠာဲသၟိၚ်ဂှ် ဟွံချိုတ်ဏီပုဟ် အာတိုန်ဒၟံၚ်ရုၚ်ဂဥုဲမာချံက်ရ”ရဂှ် ညးဒေသမွဲတၠ ဟီုကဵု လဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူဂြာတ်ထောံဖျေံဗုမ်တုဲ ဒုသ္ကိုပ်ဗိုလ်ဇၞော်အောၚ်ကျဝ်မေန်၊ သ္ကိုပ်ပရေၚ်အုပ်ဓုပ်ခရိုၚ်ဗြဝတဳ ဥူသိုဝ်တေအ်၊ သ္ကိုပ်က္ဍိုက်က္ဍိုပ်ခရိုၚ် ဥူထောန်ထောန်ညုၚ်၊ စရေဂအုပ်နာနာဥူပျိဖျဵုအောၚ်၊ ဂအုပ်ဗၠာဲသၟိၚ်ထိၚ်ယာဉ်နေလေန်သိုဝ်တအ် ဒးချိုတ်လဝ်ရဂှ် ဂွံတီကေတ်လဝ် အတိုၚ်ပရိုၚ်ပြဟ်ဟ်ဏံရ။
အခိၚ်ပြဟ်ဟ်ဏံဂှ် ညးဇီုကပိုက်ဒးလဝ်ဘဲဝပ်တအ်ဂှ် လွဳလွတ်ဒၟံၚ် ဂဥုဲပ္ဍဲရုၚ်ဂဥုဲ ဗြဝတဳရဂှ် ဂွံတီကေတ်ရ။
သ္အာၚ်နူဂှ်ပၠန် ညးအာစိုပ်လွဳလွတ်ဒၟံၚ် ပ္ဍဲရုၚ်ဂဥုဲမာချံက် မဒှ်ပယျဵုသေံဗၟာနွံဒၟံၚ်ရဂှ် ၜိုန်ရဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာဟွံမာန်ဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် -CJ
sanlontai