ပံၚ်၊ သေပ်တေမ်ဗာ (၅)
ပ္ဍဲတွဵုရးဍုၚ်မန်၊ ပွိုၚ်ဍုၚ်ပံၚ်၊ အရာပ်မိုဝ်နာၚ်၊ လ္တူဂၠံၚ်ကာ လ္ဂုၚ်−မတ်မလီုဂှ် ပ္ဍဲဂိတုသေပ်တေမ်ဗာ (၃) ဇိုၚ်သဝ်တ္ၚဲ (၅) နာဍဳဂှ် ဗၠာဲသၟိၚ်ထိၚ်ရးမွဲတၠ ထပ်ဒးဒုၚ်ပန်ဂစိုတ်လဝ်ရောၚ် ညးဒေသတံ သ္ပဒတန်ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ကိုဝ်ဝ်လွေန် ကောန်ဒပ်ဗၠာဲသၟိၚ်ထိၚ်ရး နူကဵုဗ္ဒိုပ်ဗၠာဲသၟိၚ်ၝောံဍုၚ်ပံၚ်ဂှ်ဝွံ နူကဵုအရာပ်မိုဝ်နာၚ် စဴကၠုၚ်ဗ္ဒိုပ်ဗၠာဲသၟိၚ် နကဵုကွဳလိုန်ဓာတ်ဂှ် သၟာသေနာတ်ဟွံတီယၟုဂမၠိုၚ် မၚ်ဒၟံၚ်ကဵုကွဳစက်တုဲ ပန်ပှော်ဏာလဝ် ကဵုသေနာတ်ရ။
ဟိုတ်နူဒးဒုၚ်ပန်ပှော်လဝ်ကဵုသေနာတ်ဂှ်ရ ကိုဝ်ဝ်လွေန် ဗၠာဲသၟိၚ်ထိၚ်ရးဂှ်ဝွံ ပ္ဍဲကဵုကၞေၚ်၊ သြိုဟ်၊ ဗုၚ် ကေုာံ ပ္ဍဲကဵုတဲတံဂှ် ဂွံအာလဝ်ဝပ် (၁၁) လစုတ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ကြဴနူဗၠာဲသၟိၚ်ထိၚ်ရး ဒးဒုၚ်ပန်ဂစိုတ်တုဲဂှ် ဒပ်ကံၚ်ဇြဳပၞာန်ကဵု ဒပ်ဗၠာဲသၟိၚ်တံ ကၟာတ်လဒဵုဂၠိုက်ဂၠါဲ စၟဳတ်လဝ် ပ္ဍဲကဵုပါၚ်ဂၠံၚ်လုပ်ဍုၚ်ပံၚ်ဂှ်ရောၚ် ညးဍုၚ်ကွာန်အာတရဴတံ ဟီုဂးလဝ်ရ။
ဂကောံလဵု ပန်ပှော်လဝ် ကိုဝ်ဝ်လွေန် ဗၠာဲသၟိၚ်ထိၚ်ရးဂှ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ် မွဲမွဲသာ်ဂှ် ဟွံဂွံဆဵုကေတ်ဏီရ။
ပ္ဍဲကဵုပွိုၚ်ဍုၚ်ပံၚ် တွဵုရးဍုၚ်မန်ဂှ် အပ္ဍဲကာလသီအဝဵုဏံ ကောန်ဒပ်ဗၠာဲသၟိၚ် နူကဵုဗ္ဒိုပ်ဗၠာဲသၟိၚ်တိဍာ်ဇိုၚ်ကျာ် ကေုာံ ဗ္ဒိုပ်ဗၠာဲသၟိၚ်ၝောံဍုၚ်ပံၚ်တံ ဟွံအောန်နူကဵု (၆) တၠ ချိုတ်အာလဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−PAN
sanlontai