ညံၚ်လေဝ်ပေန်၊ သေပ်တေမ်ဗာ (၅)
ပ္ဍဲခရိုၚ်ညံၚ်လေဝ်ပေန် KNU တိဍာ်ဒပ်မဟာ (၃) ဂှ် ဟိုတ်နူဒပ်ကံၚ်ဇြဳပၞာန် ပ္တဝ်လဝ်ကဵုကောန်အရာပ်ညးဍုၚ်ကွာန် ဗတိုက်ကၠုၚ်ဒၟံၚ်တုဲ ညးဍုၚ်ကွာန်ပါဲဘဲပၞာန် ဒးဂြိပ်ဒဴပါဲဓလေတ်ဒၟံၚ် စဵုကဵုၜါကိုတ်ပြၚ် နွံကၠုၚ်တုဲ နွံဒၟံၚ်ပၟိက်ကဵုအရီုဗၚ်ရဂှ် ဂွံတီကေတ် နူဇာနှိက်ထံက်ရီုဓဝ်ၜိုဟ်လလံကရေၚ် KPSN ရ။
ပ္ဍဲပွိုၚ်ဍုၚ်ယှိုဲကျေန်၊ ပွိုၚ်ကျောက်ဂျဳကဵု ပွိုၚ်ဍုၚ်မုမ် ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တအ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ (၃)တအ် ပေါဲဗတိုက်က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတုဲ ဒပ်ကံၚ်ဇြဳပၞာန် ကၠောန်သ္ပဒၟံၚ် ပရေၚ်ပန်ဖျေံဗတိုက်ဒၟံၚ် နကဵုလွဟ်ဇၞော်၊ က္ၜၚ်ကျာ၊ ဒရုမ် ပ္ဍဲကွာန် ကေုာံ ဗွိုၚ်ကမၠောန် ညးဍုၚ်ကွာန် မံၚ်တန်တဴကၠောန်စဒၟံၚ်တအ်ဂှ်ရ။
ပ္တဝ်လဝ်ကဵုကောန်အရာပ်တုဲ ဒပ်ကံၚ်ဇြဳပၞာန် ပန်ပှော်ဗတိုက်ဒၟံၚ်ဟေၚ်ဟွံသေၚ်တုဲ ဟိုတ်နူရပ်ဒက်ပြိုက်ဂစိုတ်ဒၟံၚ်ဂှ်ရ ကောန်အရာပ်ညးဍုၚ်ကွာန်ဗွဲမဂၠိုၚ် ဒးဂြိပ်ဒဴပါဲဓလေတ်ဒၟံၚ်တုဲ အခိၚ်လၟုဟ်ပြဟ်ဟ်ဏံ ပ္ဍဲခရိုၚ်ညံၚ်လေဝ်ပေန် KNU ဂှ် လၟိဟ်ညးဍုၚ်ကွာန်ပါဲဘဲပၞာန် နွံကၠုၚ်ၜါကိုတ်ပြၚ်ရဂှ် KPSN ဟီုလဝ်ရ။
ဟိုတ်နူလၟိဟ်ညးဍုၚ်ကွာန်ပါဲဒဴဘဲပၞာန်တအ် ဂၠိုၚ်တိုန်ကၠုၚ်ဒၟံၚ်ဂှ်ရ ပရေၚ်ရီုဗၚ်ထံက်ပၚ် လ္တူညးဍုၚ်ကွာန်ပါဲဘဲပၞာန်တအ်လေဝ် ဒးဆဵုဂဗဒၟံၚ်ကဵု အခက်ခုဲဗွဲမဂၠိုၚ်ရဂှ် သဝ်လေဝ်ပဝ် ညးမၞုံအခေါၚ်ဟီုဂး ဇာနှိက်ထံက်ရီုဓဝ်ၜိုဟ်လလံကရေၚ် KPSN မွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် သွက်ညးဍုၚ်ကွာန် ဒးဂြိပ်ဒဴပါဲဒၟံၚ်ဘဲပၞာန်တအ် နွံဒၟံၚ်ပၟိက်ကဵု ပရေၚ်မၚ်မွဲရံၚ်စံၚ်ပရေၚ်ထတ်ယိုတ်တုဲ တၚ်နွံပၟိက် အရီုဗၚ်ဗ္စာရဏာပရေၚ်မၞိဟ် မပ္တံကဵုဇွောံစၞစ၊ ဂဥုဲဇဗ သၠုၚ်ဂၠိုၚ်ဒၟံၚ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ဗတိုက်လဝ် ပ္ဍဲခရိုၚ်ညံၚ်လေဝ်ပေန်တုဲ ပ္ဍဲပွိုၚ်ၜါသတ္တာဟတုဲကၠုၚ်တေံ ကောန်အရာပ် ဟွံအောန်နူ (၅)တၠ ပါလုပ်သီုကောန်ၚာ် မၞိဟ်ဗြဴတအ် ဒးချိုတ်လဝ်တုဲ ကောန်အရာပ်ဗ္ဒာဲ (၃၀)တၠ ဇီုကပိုက်ဒးလဝ်ဘဲဝပ်တုဲ အပံၚ်လၟိဟ်စမြိုၚ် ၜိုတ် (၄၀) ပါလုပ် သီုဘာကျာ်ခရေတ်ယာန် သီုသ္ၚိဒၟံၚ်တအ် ဒးဇီုကပိုက်လီုလာ်လဝ်ရဂှ် ဗဟဵု KNU လလောၚ်တြးလဝ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၁) တုဲကၠုၚ်တေံ အခိၚ်ဗ္တံဂှ်လေဝ် ဒပ်ပံၚ်ကောံ KNLA လုပ်ဗတိုက်သီကေတ်လဝ် ဗဒိုပ်တေတ်ချဇြုက် မဒှ်ဒပ်ဖျေံသ္ဇိုၚ်ကံၚ်ဇြဳပၞာန် မၞုံပွိုၚ်ဍုၚ်မုမ် KNU မာန်လဝ်တုဲ လ္ပာ်ကံၚ်ဇြဳပၞာန် ဒးဇီုကပိုက်ချိုတ်လဝ် ဗွဲမဂၠိုၚ်ဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – KPSN
sanlontai