ပ္ဍဲပေါဲဗ္တိုက်ဘာပန် လ္ပာ်ကံၚ်ဇြဳပၞာန် ဇီုကပိုက်ချိုတ်ဂၠိုၚ်မံၚ်ရောၚ် KNUဟီု

ဘာပန်၊ သေပ်တေမ်ဗာ(၅)

ပ္ဍဲပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ် ပ္ဍဲဒေသဒပ်မဟာ(၅)၊ ခရိုၚ်ဘာပန် ဗော်သွးကောန်ဂကူကရေၚ် (KNU) အပ္ဍဲပွိုၚ်မွဲဂိတုဂှ် လ္ပာ်ကံၚ်ဇြဳပၞာန်တံ ပါလုပ်သီုကဆံၚ်ဗိုလ်ဇၞော်တံဂှ် ညးဇီုကပိုက်ချိုတ်တံဂၠိုၚ်လဝ်တုဲ ရုၚ်ဂကောံပၞာန်တံကဵု စမြိုၚ်တၞဟ်ဟ်(၇)မတံဂှ်လေဝ် ပလီုပလာ်မာန်လဝ်ရဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ(၅)ရ။

တုဲကၠုၚ် ပ္ဍဲဂိတုအဝ်ဂါတ် ပွိုၚ်မွဲဂိတုဂှ် ပ္ဍဲခရိုၚ်ဘာပန်၊ တိဍာ်ဒပ်မဟာ(၅)ဂှ် အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်၊ ဒပ်မၚ်ပယျဵု (BGF)တံဂှ် ပေါဲဗ္တိုက်အပံၚ် (၁၄၃)ဝါက္တဵုဒှ်လဝ်တုဲ လ္ပာ်ကံၚ်ဇြဳပၞာန်ဂှ် သီုညးကဆံၚ်ဗိုလ်ဇၞော်မွဲတၠ မပါလုပ်ဂှ် (၈၈)တၠ ချိုတ်တုဲ (၅၇)တၠ က္လိဂွံလဝ်ဝပ်ရဂှ် ပါလုပ်ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် မ္ၚးနူပလီုပလာ်လဝ် ရုၚ်ဂကောံပၞာန်တံကဵု စမြိုၚ်တၞဟ်ဟ် (၇)မ၊ ယာဉ်အသုၚ်စောဲပၞာန်မွဲဖ္ဍိုက်တံမာန်လဝ်ဂှ် ပန်ဂစိုတ်လဝ် ချး (၂၅)မာန်တုဲ (၂၅)ပၠန်ဂှ် ညံၚ်သ္ဂောံက္လိဂွံဝပ်ဗွဲမသ္ကာတ်မြဟ် ပန်ပှော်မာန်လဝ်ရဂှ် လလောၚ်ပ္တိတ်လဝ်ရ။

ပ္ဍဲဂိတုအဝ်ဂါတ်၊ စၟတ်တ္ၚဲ(၁၁) အခိၚ်သဝ်တ္ၚဲဂှ် ရုၚ်လဝကခရိုၚ်၊ ရုၚ်ဥပဒေ၊ ရုၚ်စၟဳတ်စရၚ်၊ ရုၚ်အကံၚ်ခေါန်၊ သ္ၚိဒၟံၚ် ညးယိုက်ဝန်ပရေၚ်အုပ်ဓုပ်ကာနာနာ၊ သ္ၚိဒၟံၚ် သ္ကိုပ်ရုၚ်လဝကခရိုၚ် မၞုံပ္ဍဲခရိုၚ်ဘာပန် သၟဝ်တဲကံၚ်ဇြဳပၞာန်တံ ဒးဒုၚ်ပလီုပလာ် ဗ္တိုဟ်လဝ်ဗုံတုဲ ဟိုတ်နူပရေၚ်ဗ္တိုဟ်ထ္ကးတုဲ စမြိုၚ်ဂမၠိုၚ် ဒးလီုလာ်အာလဝ်မဒှ်ရ။

ပ္ဍဲပေါဲဗ္တိုက် က္တဵုဒှ်လဝ် ပ္ဍဲပွိုၚ်မွဲဂိတုတံဂှ် လ္ပာ်ဒပ်ပၞာန်ဗၠးၜးကောန်ဂကူကရေၚ် KNLAတံဂှ် (၅)တၠ ပြဟ်လလုဲအာလဝ်တုဲ (၂၆)တၠ ဇီုကပိုက်က္လိဂွံအာလဝ်ဝပ်ရဂှ် လ္ပာ်ဒပ်မဟာ(၅)တံ လလောၚ်ပ္တိတ်ဟီုဂးလဝ်ရ။

အပ္ဍဲပေါဲဗ္တိုက်တံဂှ် ဒပ်ကံၚ်ဇြဳပၞာန်တံ ပ္ဍဲကွာန်တံကဵု ဒၞါဲဝၚ်ကမၠောန်ဝါဗ္ၚတံဂှ် ပန်ပှော်လဝ် မကမ်လွဟ်ဇၞော် ၉၆ မတုဲ တုဲကၠုၚ် ပ္ဍဲဂိတုအဝ်ဂါတ် စၟတ်တ္ၚဲ(၁၈) အခိၚ်လ္ဒေါဝ်တ္ၚဲဂှ်လေဝ် ကၠုၚ်ပန်ဖျေံဏာလဝ် ဗုံဇၞော်(၄)မ ပ္ဍဲအကြာကွာန် ဗဝ်ကျောအ်လာ ကဵု ကွာန်ပိုဝ်ကာတံ နကဵု က္ၜၚ်ကျာဗ္တိုက်အသုၚ်စောဲပၞာန် (၂)ဖ္ဍိုက်ရဂှ် ထ္မံက်ထ္ၜးလဝ်ပ္ဍဲတၚ်လလောၚ်တြးရ။

ပ္ဍဲခရိုၚ်ဘာပန်ဂှ် သွက်ညးဍုၚ်ကွာန်ဒေသ ဒးဂြိပ်ဒဴပါဲဓလေတ်လဝ် ဟိုတ်နူပရေၚ်ဗ္တိုက်ဂြာတ်ဗုံ နကဵုက္ၜၚ်ကျာ ဒပ်ကံၚ်ဇြဳပၞာန်တံ သ္ဂောံဂွံ စၞစ၊ ဒၞါဲဗ္ဒဗ္ဒါဲကဵု ပရေၚ်မၚ်မွဲပရေၚ်ထတ်ယုက်တံဂှ် သာတုဲခက်ခုဲကၠုၚ်မံၚ်တုဲ ဟိုတ်နူပရေၚ်ဗ္တိုက်တံတုဲ ညးဍုၚ်ကွာန်ဒေသတံ ဒးမံၚ်စံၚ်မံၚ် ဗွဲမဖေက်လကိုတ်ရဂှ် ဂကောံအခေါၚ်အရာမၞိဟ်ကရေၚ် (KHRG) ဟီုဂးလဝ်ရ။

ပရိုၚ်-သြၚ်လောန်တိုၚ်မ်

ဗီု-KNU