မတ်မလီု၊ သေပ်တေမ်ဗာ (၅)
ပ္ဍဲတွဵုရးဍုၚ်မန် လက်ထက်ကံၚ်ဇြဳပၞာန်ဏံ ဟိုတ်နူပြသၞာကောန်ကလောန်အောန်တံ ဇၞော်ကၠုၚ်ဂှ်ကီု သီုကဵုပရေၚ်ဍုၚ်ကွာန် ဟွံညိၚ်ဝတ်တံဂှ်တုဲ ကမၠောန်ကၠအ်ထၜိုတ်တံ ဂွံကလေၚ်စဂှ် ဒးဂဗဒၟံၚ်အခက်အခုဲရောၚ် တၠကၠအ်ထၜိုတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ကၠအ်ထၜိုတ်တံဂှ် ပ္ဍဲတွဵုရးဍုၚ်မန်ဂှ် ကၠောန်ဒၟံၚ် နူကဵုဂိတုသေပ်တေမ်ဗာ စဵုကဵုဂိတုမေကီုလေဝ် ပ္ဍဲကဵုသၞာံဏံဂှ် ဒးဆေၚ်ဒၟံၚ်မုက် ကုပြသၞာကောန်ကလောန်စိုန်သ္ကီုတံအောန် ဇၞော်ကဵုဇြဟတ်ရ။
တၠကမၠောန်ကၠအ်ထၜိုတ်တံဝွံ ဒၟါနူကော်ကောန်ကလောန်တၟိတံ ဟွံဂွံဂှ်ကီု၊ ကောန်ကလောန်စိုန်သ္ကီုနွံဒၟံၚ်ရရတံဂှ်လေဝ် ဟိုတ်နူၚုဟ်ဖျာက္ဍၚ်ကဵု အခက်အခုဲပရေၚ်စသုၚ်မံၚ်စံၚ်တံဂှ်တုဲ အာကၠောန်ဒၟံၚ်ကမၠောန် ပ္ဍဲဍုၚ်မွဲလ္ပာ်တေံအိုတ်တုဲ ကောန်ကလောန်အောန်ကၠုၚ်ရ။
တၠကၠအ်ထၜိုတ်မွဲတၠဂှ် ကောန်ကလောန်ထၜိုတ်စိုန်သ္ကီု ညးဒေသတံဂမၠိုၚ်ဝွံ ဒၟါနူကလောန်ကၟိတ်ဟွံပြေပြံၚ်တုဲ အာစိုပ်ကၠောန်ကၠုၚ်ကမၠောန် လ္ပာ်ဍုၚ်မွဲလ္ပာ်တေံတုဲ သၟာကမၠောန် နူကဵုတွဵုရး ကေုာံ ရးဒေသတၞဟ်ဟ်တံဂှ်လေဝ် ဂွံကော်ဝါတ်ဂါတ်ဂှ်ရ ဒးဆေၚ်ဒၟံၚ်မုက် ကုကောန်ကလောန်စိုန်သ္ကီုတံ ဝါတ်ဂါတ်တံရောၚ်ဂှ် ဟီုရ။
“ကောန်ကလောန်ဂၠါဲဝါတ်ဂှ် အရိုဟ်သၞာံ ဒးဂဗဒၟံၚ်ရ။ မုဒှ်ရောဟီုတှ်ေ ကမၠောန်ထၜိုတ်ဂှ် ဟိုတ်နူဒးသုၚ်စောဲ ကောန်ကလောန်တံ ဂၠိုၚ်ကွေံကွေံဂှ်ရ အခက်အခုဲဏံဂှ် နွံဒၟံၚ်အရိုဟ်သၞာံရ။ အကာဲအရာသာ်လဵုရောဟီုတှ်ေ ပ္ဍဲကဵုဍုၚ်ဗၟာဂှ် ကၠောန်စဟွံပြေပြံၚ်ရပုဟ်လေဝ်။ ဒှ်ကၠုၚ် လဆောဝ်ဂွံစ လဆောဝ်ကၠောဝ်ရ။ တုဲပၠန် မၞိဟ်ဍောတ်တ်သွတ်တ်တံဂှ် အာထောံဍုၚ်သေံအိုတ်ယျ။ ပ္ဍဲကဵုတွဵုရးဍုၚ်မန်ဂှ်တှ်ေ ပ္ဍဲကဵုကွာန်ကဵုဒှ်၊ ပ္ဍဲကဵုဍုၚ်ကဵုဒှ်၊ ဒေသလဵုဒှ်ဒှ် မၞိဟ်ဇၞော်ဇၞော်တံကဵု မၞိဟ်ကၠောန်ပရေၚ်ပိုန်ဒြပ်တံ သှ်ေဒၟံၚ်။ မၞိဟ်နူတံဏံဟွံမွဲတုဲ ကော်ကေတ်ရဲဨရာဝတဳ၊ ဗဂေါတံဂှ်တုဲ ဒးကၠောန်မွဲတဲပၠန်၊ မၞိဟ်နူဒေသဇကုဟွံသေၚ်တုဲ ဂွံကော်ဂှ်လေဝ် ဝါတ်ဂါတ်ဒၟံၚ်။ အရာရာအိုဿီုဂှ် ခက်ခုဲမံၚ်ဖအိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲသၞာံတုဲကၠုၚ်တေံ နဒဒှ်ၚုဟ်ခွါတ်ထၜိုတ်ဂှ် ကဵုလဝ် ကောန်ကလောန်ထၜိုတ်တံ မွဲတၞံ ၁၃ ဒ္ကေဝ်တုဲ အခိၚ်လၟုဟ် ဟိုတ်နူကောန်ကလောန်စိုန်သ္ကီုတံ အောန်စှ်ေကၠုၚ်ဂှ်ရ မွဲတၞံဂှ် ဂလိုၚ်ပ္တိုန်ကဵု ၁၅ ဒ္ကေဝ်ကီုလေဝ် ကၠုၚ်စိုပ်ကၠောန်ကလောန် ဟွံမွဲအိုတ်ရပုဟ်ဂှ် ညးဆက်ဟီုရ။
ပ္ဍဲကဵုကၠအ်ထၜိုတ်တံဂှ် ကောန်ကလောန်တြေံတြေံတံ ဟွံမွဲရဂှ်တုဲ ဒးဂၠါဲဒၟံၚ်ကောန်ကလောန်တၟိတၟိတံတုဲ ယဝ်ရဟွံဂွံကောန်ရဲတၟိမ္ဂး ဒှ်ကၠုၚ်အကာဲအရာ စဵုကဵုဒးကၟာတ်ကၠအ်ထၜိုတ်မာန်ဂှ် တၠကၠအ်ထၜိုတ်မွဲတၠ ဟီုရ။
“လၟုဟ် ပိုယ်တံဂှ် အဃောဂၠါဲဒၟံၚ်ကောန်ရဲဖိုဟ်ရ။ ကောန်ကလောန်တြေံတြေံတံဂှ် တိုန်အာဍုၚ်သေံအိုတ်ယျ။ ကောန်ကလောန်တၟိတၟိတံဂှ် ဂၠါဲဒၟံၚ်ဖိုဟ်ရ။ ကၠအ် ၜိုတ် (၃) ဨက၊ (၄) ဨက၊ (၅) ဨကတံဂှ်တှ်ေ မၞိဟ်ဂွံဂှ်ဂွံဏောၚ်၊ မၞိဟ်ဟွံဂွံဂှ် ဟွံဂွံပုဟ်။ ဆ္ဂး ညးဒေသလ္ပာ်ဏံဗွဲမဂၠိုၚ်ဂှ်တှ်ေ ဗီုဏံရဏောၚ်။ အာထောံ မလေဝ်ယှာ၊ သေံတံအိုတ်တုဲ ကောန်ကလောန်ကျာတ်ဝါတ်ဂှ် ဒှ်အာအခက်အခုဲအိုတ်ရ။ ဇၟာပ်ရဲကၠအ်ထၜိုတ်တံဂှ် လွဳလဝ်ကောန်ရဲမာန်မှဏောၚ်။ ကောန်ကလောန်ဂှ် ပိုတ်ဗက်ဟွံဂတာပ် ကမၠောန်ခွါတ်ထၜိုတ်ဂှ်လေဝ် ဒေါအ်ဒေၚ်အာအိုတ်ယျ။ ဒးကၟာတ်အာကၠအ်ဂှ်ရ။ ဟွံဂွံခွါတ်မွဲသာ် ဒးမံၚ်ဒၟံၚ်ရ“ သာ်ဝွံ သ္ဂးရ။
ဟိုတ်နူကောန်ကလောန်ထၜိုတ်တံ အောန်စှ်ေကၠုၚ်ဂှ်ရ ကမၠောန်ထၜိုတ်တံ သွက်ဂွံဂေတ်ဂြိပ်ကၠုၚ် ပေၚ်ၚ်ဂှ် အခက်အခုဲနွံကၠုၚ်တုဲ အပ္ဍဲအခိၚ်မစၟတ်လဝ်ဂှ် ဟွံဂွံကောန်ကလောန်မ္ဂးလေဝ် ဒးကၠောန်အာ ၜိုတ်မာန်ကဵုမာန်ဂှ်ရ ဗၞိက်ထၜိုတ်တံ အောန်စှ်ေကၠုၚ် တီတီမာန်ရောၚ်ဂှ် တၠကၠအ်ထၜိုတ်တံ သ္ဂးအိုတ်ရ။
မွဲလ္ပာ်ပၠန်ဂှ် ကောန်ကလောန်ထၜိုတ် နူကဵုရးဒေသ ကေုာံ တွဵုရးတၞဟ်ဟ်တံဝွံ ဒၟါနူတၚ်သၞောတ်ဗ္ၜတ်အာကၠုၚ် တတ်ကၠောံပယျဵု ကံၚ်ဇြဳပၞာန်တံဂှ်ကီု၊ သီုကဵုအခက်အခုဲစရၚ်ကၟုဲထဳတံကီု၊ အမိၚ်တိတ်ဗ္တံဟွံဂွံတံဂှ်တုဲလေဝ် မၞိဟ်ကၠုၚ်စိုပ်ကၠောန်ကလောန် အောန်ကၠုၚ်ဒၟံၚ်ရ။
တွဵုရးဍုၚ်မန်ဝွံ ဒှ်တွဵုရးတိဍာ်တဵုလွဳထၜိုတ် နွံမသုန်ကိုဋ်ပြၚ်မွဲတုဲ လၟေၚ်သၞာံ လျိုၚ်တာန်ထၜိုတ် တိတ်ဒၟံၚ် မွဲကိုဋ်ပြၚ်တုဲ နူကဵုအခန်ကဏ္ဍထၜိုတ်ရဝ်ဗာဂှ် ကလိဂွံဒၟံၚ် ဒဝ်ဠာအမေရိကာန် ဂၠိုၚ်ကဵုပြကောဋိကိုဋ်ရ။
ဆ္ဂး ကဏ္ဍထၜိုတ်ရဝ်ဗာဝွံ အပ္ဍဲကာလသီအဝဵုဏံ ဒၟါနူတၚ်သၞောတ်ဗ္ၜတ် ကံၚ်ဇြဳပၞာန်တံကီု သီုကဵုမူဝါဒဗၠေတ်တ်တံကီုဂှ်တုဲ ယာက္ဍိုပ်ဟွံမာန် ဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai