ဒပ်ပၞာန်ဗၟာဂှ် ဖိုဝ်ရာမ်ညးဍုၚ်ကွာန်အာဇြဳယာန် လလောၚ်တြး နဒဒှ်ဂကောံပ္ကီုပရာပ်

မတ်မလီု – သေပ်တေမ်ဗာ(၅)

ဒပ်ပၞာန်ဗၟာဂှ် ဟိုတ်နူက္လိလောန်ဒၟံၚ် ဒုဟ်ဂစိုတ်ကမၠက်ဂကူ၊ ဒုဟ်ရာဇဝတ်ပၞာန် ကေုာံဒုဟ်ရာဇဝတ် က္လိလောန်လဝ် လ္တူကောန်ဂကူမၞိဟ်တအ်ဂှ်ရ စၟတ်သမ္တီကေတ်လဝ် နဒဒှ်ဂကောံပ္ကီုပရာပ်ဘပဠဒၟံၚ် ပရေၚ်ဂီုကၠီု ပရေၚ်ညိၚ်ဝတ် ပ္ဍဲဒေသရဂှ် ဖိုဝ်ရာမ်ညးဍုၚ်ကွာန်အာဇြဳယာန် လလောၚ်တြးလဝ်ရ။

ဖိုဝ်ရာမ်ညးဍုၚ်ကွာန်အာဇြဳယာန် ကၠောန်ဗဒှ်လဝ် ပ္ဍဲဍုၚ်ဂျာကာတာ ကၟိန်ဍုၚ်အေန်ဒေါနဳယှာ သ္ပတံနူဂိတုသေပ်တေမ်ဗာ စၟတ်တ္ၚဲ (၁) စဵုကဵုစၟတ်တ္ၚဲ (၃)တုဲကၠုၚ်တေံဂှ် လလောၚ်တြးကၠုၚ်လဝ်ရ။

ဟိုတ်နူဒပ်ပၞာန်ဗၟာက္လိလောန်လဝ် ဒုဟ်ဂစိုတ်ကမၠက်ဂကူ၊ ဒုဟ်ရာဇဝတ်ပၞာန်ဂှ်ရ စၟတ်သမ္တီကေတ် နဒဒှ်ဂကောံပ္ကီုပရာပ်တုဲ ပ္ဍဲကဵုပေါဲဗတိုက် သွက်ပရေၚ်ဗၠးၜးကေုာံ ပရေၚ်ဗဗွဲဓဝ်တအ်ဂှ် သရာဲသ္ဂံၚ်အာဇာနဲ ဒုၚ်ဂိ ဒုၚ်သၠးလဝ်တအ်ဂှ် ထေက်ကဵုဒးသ္ပဇြိုဟ်နက် ပ္တိုန်ဂုဏ်စရာဲထေက်ရောၚ်ဂှ်လေဝ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ကမၠောန်ပြဝကံၚ်ဇြဳပၞာန် ပ္တိတ်ဒၟံၚ်ကသပ် သွက်ဂွံသီကေတ်ကၟိန်ဍုၚ်ဂှ် စဵုကဵုအခိၚ်လၟုဟ်ဏံ ဟွံဂွံအံၚ်ဇၞးဏီရဂှ် စၟတ်သမ္တီကေတ်တုဲ ပရေၚ်းညးဍုၚ်ကွာန်ဗၟာ ချဳဒရာၚ်ရုန်ဂစာန်ဒၟံၚ် သွက်ဂွံက္လေၚ်က္လိဂွံဒဳမဝ်ကရေဇြဳဂှ် ဒှ်ပၟတ်ပၞာၚ်သ္ဍဴ သွက်အလုံဒေသဒိုဟ်အဂၞဲမွဲရဂှ် ဟီုသ္ဂးလဝ်ရ။

ဟိုတ်နူဒစဵုဒစး ပရေၚ်ကံၚ်ဇြဳပၞာန်ပ္တိတ်ဒၟံၚ်ဇြဟတ် သွက်ဂွံသီအဝဵုဂှ်တုဲ စဵုကဵုဂိတုသေပ်တေမ်ဗာ စၟတ်တ္ၚဲ (၁)ဏံ ညးဗြဴ (၆၀၂)တၠ ဒးဒုၚ်ပြိုက်ဂစိုတ်လဝ်တုဲ ကောန်အရာပ် ညးချဳဒရာၚ်ကတိုၚ်ကၟဟ် (၄၀၂၉)တၠ ဒးဒုၚ်ပြိုက်ဂစိုတ်လဝ်ဂှ်ရ ဒးက္တဵုဒှ်ဒၟံၚ်ပၞောတ် ဇၞော်ကဵုဇြဟတ်ရဂှ် ဟီုလဝ်တုဲ ဒးက္လေၚ်ပလန်တဲ နကဵုရမျှာၚ် သ္ကာတ်မြဟ်ထေက်ရောၚ်ဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

နကဵုကၟိန်ဍုၚ်နာနာ NUG၊ NUCC၊ ERO ကေုာံ ဂကောံညးအရာပ်တအ်ကီု သီုညးမဆေၚ်စပ် ဗွဲမလုပ်သၞောဝ်တအ် ဒပ်ပ္တန် ပရေၚ်ဆက်ဆောံဗွဲမလုပ်သၞောဝ်တုဲ သွက်ရီုဗၚ်ထ္ၜလဘာ် ကဵုအာရီုဗၚ်ဗ္စာရဏာပရေၚ်မၞိဟ်ကာတၟေၚ် နူကဵုအလဵုအသဳ ပရေၚ်ညဳသၟဟ်ကောန်ဂကူ ကေုာံဂကောံပၠန်ဂတးကောန်ဍုၚ်အရၚ်တအ်မွဲကဆံၚ် လွာဲလၟုဟ်ဂှ်လေဝ် ဖိုဝ်ရာမ်ညးဍုၚ်ကွာန်အာဇြဳယာန် အာတ်မိက်လဝ်ရ။

နကဵုညးဍုၚ်ကွာန်ကၟိန်ဍုၚ်ဗၟာတအ်ဂှ် အခိၚ်လၟုဟ်ဏံ ဟိုတ်နူဒှ်အခိၚ် ဒးဆဵုဂဗဒၟံၚ်ကဵု တၚ်ကော်ချဴပရေၚ်ညဳသၟဟ်၊ ပရေၚ်ဒဳမဝ်ကရေဇြဳ နှဴရဴဒၟံၚ်ဂှ်ရ ကၟိန်ဍုၚ်ဗရူနိုၚ်ဒါရုသလေမ်၊ ကမ္ဘောဒဳယာ၊ အေန်ဒေါနဳယှာ၊ လာအိုဝ်၊ မလေဝ်ယှာ၊ ဖိလေတ်ပိုၚ်၊ သေၚ်္ကာပေါဝ်၊ သေံ၊ တဳမဝ်လေတ်သတဳ ကေုာံဗဳယာတ်နာမ်တအ် နွံဒၟံၚ် ကရောံညးဍုၚ်ကွာန်ကၟိန်ဍုၚ်ဗၟာတအ်ရဂှ် ကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ (ဃောကောန်ဒပ်ကံၚ်ဇြဳပၞာန် ရပ်ကေတ်ဒၟံၚ်ညးဍုၚ်ကွာန်တအ်)