ညးယိုက်ဝန်ကီု သီုဂကောံသ္ၚိကၟိန်ညးတအ် ညံၚ်ဂွံစ္ဍးတိတ်အာ နူရုၚ် ကေုာံသ္ၚိဌာန်သ္ဇိုၚ်ဝန်ဂှ် ဒပ် Federal Wings ကဵုသတိ

ဗြဝတဳ – သေပ်တေမ်ဗာ(၆)

နကဵုညးယိုက်ဝန်သၟဝ်တဲကံၚ်ဇြဳပၞာန် ဟွံရပ်လွဟ်တအ်ကီု သီုကဵုဂကောံသ္ၚိကၟိန်ညးတအ်၊ ဂကောံသ္ၚိကၟိန် ကောန်ဒပ်ကံၚ်ဇြဳပၞာန်ကီုတအ်ဂှ် သွက်ဂွံစ္ဍးတိတ် နူကဵုရုၚ် ကေုာံသ္ၚိဌာန်သ္ဇိုၚ်ဝန်ဂှ် ဒပ် Federal Wings ကဵုလဝ်သတိရ။

ကြဴနူကောန်ဒပ်ကံၚ်ဇြဳပၞာန် ကေုာံညးလုပ်ဂကောံသၞာဲဒဴပရေၚ်အုပ်ဓုပ် (၅)တၠ ဒးချိုတ်တုဲ ဒးလဝ်ဘဲဝပ် (၁၁) ပ္ဍဲပရေၚ်ဗတိုက်ပန်ပှော်လဝ် ရုၚ်ပရေၚ်အုပ်ဓုပ် သီုဗဒိုပ်ဗၠာဲသၟိၚ် မၞုံဍုၚ်ဗြဝတဳ၊ တွဵုရးကရေၚ် နကဵုဒရုမ်တုဲဂှ် ဒပ် Federal Wings ကဵုကၠုၚ်လဝ်သတိ သာ်ဏံရ။

ဒပ် Federal Wings ဂှ် နကဵုအလဵုညးတအ် ပ္ဍဲအရာဗတိုက်ပၠန်ဂတးကဵုဒပ်ကံၚ်ဇြဳပၞာန်ဂှ် ဟိုတ်နူရန်လဝ် သွက်ညးရပ်လွဟ်ဟေၚ် ဂွံဒးဇီုကပိုက်ဂှ်ရ ညံၚ်ညးလုပ်ဂကောံသ္ၚိကၟိန် ဟွံရပ်လွဟ်တအ် ဂွံစ္ဍးတိတ်အာ နူရုၚ် ကေုာံသ္ၚိဒၟံၚ်သ္ဇိုၚ်ဝန် ဒးကဵုလဝ်သတိရဂှ် ဟီုလဝ်ရ။

သ္အာၚ်နူဂှ်ပၠန် ပရေၚ်ဗတိုက်ပန်ပှော် နကဵုဒရုမ်ဂှ် ၜိုန်ရပရေၚ်ချိုတ်ပၠိုတ် နွံဒၟံၚ်ကီုလေဝ် ဟိုတ်နူဖိုလ်အဆက်လ္ပာ်ပရေံ နွံကၠုၚ်မာန်ဂှ်ရ ညံၚ်ညးဒေသတအ် ဟွံဂွံဇီုကပိုက်ဒး နကဵုညးဍုၚ်ကွာန်တအ် သွက်ဂွံပြံၚ်မံၚ်တန်တဴကဵု ပ္ဍဲဒၞာဲသ္ၚောဲခြာ နူရုၚ်ဒပ်ကံၚ်ဇြဳပၞာန် ဖျေံလဝ်ဗဒိုပ်၊ ဒၞာဲဗဒိုပ်ဒပ်ပၞာန်ညိဂှ် အာတ်မိက်ဒုၚ်လဝ်ဂုဏ်ရ။

ဂိတုသေပ်တေမ်ဗာ စၟတ်တ္ၚဲ (၃) တုဲကၠုၚ်တေံ ပ္ဍဲပရေၚ်ဗတိုက်ပန်ပှော် ရုၚ်ပရေၚ်အုပ်ဓုပ် သီုဗဒိုပ်ဗၠာဲသၟိၚ်ပွိုၚ်ဍုၚ်ဗြဝတဳ နကဵုဒရုမ်ဂှ် သ္ကိုပ်တံဒပ် ကံၚ်ဇြဳပၞာန် ယာယဳ ခလရ (၂၇၅) သ္ကိုပ်ဗိုလ်ဇၞော်အောၚ်ကျဝ်မေန်၊ သ္ကိုပ်ပရေၚ်အုပ်ဓုပ် ခရိုၚ်ဗြဝတဳ ဥူသိုဝ်တေအ်၊ သ္ကိုပ်က္ဍိုက်က္ဍိုပ်အုပ်ဓုပ်ခရိုၚ် ဥူထောန်လေန်၊ တခဳရုၚ်အုပ်ဓုပ်/နာနာ ဥူပျိဖျိုဝ်အောၚ်ကေုာံ ဂအုပ်ဗၠာဲသၟိၚ်ထိၚ်ယာဉ် နေလေန်သိုဝ်တအ် ဒးချိုတ်လဝ်တုဲ ဒးလဝ်ဘဲဝပ် (၁၁)တၠရဂှ် ဒပ် Federal Wings လလောၚ်တြးလဝ်ရ။

ဝန်ဇၞော်ပရေၚ်အပ္ဍဲဍုၚ်ကံၚ်ဇြဳပၞာန် ဒုတိယဂအုပ်ဗိုလ်ဇၞော်ယျာပျိဂှ်လေဝ် ပရေၚ်ဂကောံဇြဟတ်ပၠန်ဂတးတအ် သုၚ်စောဲဒၟံၚ်ဒရုမ်မသက္ကုမၞိဟ်ဒဳဂှ် ဒှ်ကၠုၚ်တၚ်ကော်ချဴအနာဂတ်မာန်ကၠုၚ်ဒၟံၚ်ရောၚ်ဂှ် ဒုၚ်လဝ်ဝန်ဟီုသ္ဂးလဝ် ပ္ဍဲကောံဓရီုကဆံၚ်ဝန်ဇၞော်အာဇြဳယာန် ပရေၚ်ဗတိုက်သရိုဟ်ဂဗုတ်လောန်ၜက်တတ်ကၠောံဍုၚ် မရနုက်ကဵု ၁၇ ဝါ ကၠောန်ဗဒှ်လဝ် ပ္ဍဲဍုၚ်လာဘောန်ဗာဂျိုဝ် ကၟိန်ဍုၚ်အေန်ဒေါနဳယှာ ပ္ဍဲဂိတုအဝ်ဂါတ် စၟတ်တ္ၚဲ (၂၁)တေံရ။

နကဵုသြန်ဂအုံပၠန်ဂတးညးဍုၚ်ကွာန် ထံက်ပၚ်ကဵုလဝ် ဇရေၚ်ဒပ်ပၠန်ဂတး ပ္ဍဲရးဒေသဇၞော် ကေုာံတွဵုရး သွက်ပရေၚ်ထံၚ်ပရိုၚ်၊ ပရေၚ်ဗတိုက်ပန် ကေုာံပရေၚ်တြးဝါဒ Drone လၟိဟ် ၄၀၀ ဖ္ဍိုက်ပြၚ်ရဂှ် ဌာနဝန်ဇၞော်ပရေၚ်စဵုဒၞာ အလဵုအသဳပရေၚ်ညဳသၟဟ်ကောန်ဂကူ NUG လလောၚ်တြးလဝ် ပ္ဍဲဂိတုအဝ်ဂါတ် စၟတ်တ္ၚဲ (၂၃)ဂှ်ရ။

ပရိုၚ် – သြၚ်​လောန်တိုၚ်(မ်)

ဗီုရုပ် – Federal Wings