ဂကောံစဵုဒၞာ ပ္ဍဲရးမဂွေကဵု ရးသေတ်ဂါၚ်တအ် သွက်ဂွံဗတိုက်ကဵုကံၚ်ဇြဳပၞာန် ဒက်လဝ်မဟာမိတ်

​ယျေသဂျိုဝ် – သေပ်တေမ်ဗာ (၆)

ရးဒေသမဂွေ၊ ပွိုၚ်ဍုၚ်ယျေသဂျိုဝ်၊ သွက်ဂွံစဵုဒၞာ ဒေသတ္ကအ်လ္ဒောဝ်ၜဳကဵု ရးသေတ်ဂါၚ်၊ ပွိုၚ်ဍုၚ်မျောၚ်ဂှ် ဂကောံစဵုဒၞာဒေသတအ် ပံၚ်တောဲတုဲ ဒက်ပ္တန်လဝ် နဒဒှ်မဟာမိတ်ရဂှ် Myingyan Black Tiger လလောၚ်တြးပ္တိတ်လဝ်ပရိုၚ်ရ။

ဂကောံဒက်ပ္တန်လဝ် နဒဒှ်မဟာမိတ်တအ်ဂှ်မ္ဂး ဟိုတ်နူတၚ်ဂၞၚ်ပရေၚ်ဂီုကၠီုတုဲ ဓမံက်ပ္တိတ်ဟီုထ္ၜးအာဟွံသေၚ်တုဲ ထ္ပက်လဝ်စၟတ်တဲ တၚ်တုပ်စိုတ် (၁၀)တၚ်ရမာန်လဝ်ရဂှ် သ္ဂးလဝ်ရ။

“အတိုၚ်တၚ်တုပ်စိုတ်သ္ဇိုၚ်တအ်ဂှ်တှ်ေ ဂကောံပါလုပ်တအ် ဓမံက်ပ္တိတ်ဟီုထ္ၜးဟွံဂွံဟီုဂှ် ဟိုတ်နူပါလုပ်ဒၟံၚ်ဂှ်ရ နကဵုပိုဲ ဟီုထ္ၜးကဵု ဟွံဂွံပုဟ်။ ကဵုတံဒပ် ဒပ်သၟဝ် MOD၊ ပ.အ.ဖ၊ ပ.က.ဖ၊ ပ.လ.ဖ တအ်လေဝ် ဆက်ရေၚ်တၠုၚ် ကၠောန်အာဂတတေံဏောၚ်” ဂှ် က္ဍိုပ်သ္ကိုပ် ဂကောံ Myingyan Black Tiger ဗိုလ်မိုက်ခေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

နကဵုညးဍုၚ်ကွာန်တအ်ဂှ် လ္တူစိုတ်ဓာတ်စှ်ေ၊ ပရေၚ်ဒှ်ဓဝိၚ် အရာလဵုဂွံဒးဖေက်ရောဟွံတီဂှ် ညံၚ်ဂွံပရံၚ်လဝ်စိုတ်ဓာတ်ကီု သွက်ဂွံဗတိုက်ကဵုကံၚ်ဇြဳပၞာန် ဒဒှ်ရလွဟ်လက်နက်မကမ် နွံဒၟံၚ်ဂှ်ရ ညံၚ်ဂွံပါလုပ်ပံၚ်တောဲဂှ်လေဝ် ညးဗတိုက်တဖ္အောဝ်လဝ်ရ။

လၟုဟ်ပြဟ်ဟ်ဏံမ္ဂး ဒေသယျေသဂျိုဝ်ကဵု ဒေသမျောၚ်ဂှ် ဒှ်အခိၚ်ဍာ်တိုန်တုဲ အခိၚ်ဍာ်စှ်ေမ္ဂး ကောန်ဒပ်ကံၚ်ဇြဳပၞာန်တအ် ထ္ပက်ကၠုၚ်ကရောၚ်ပၞာန်မာန်ဒၟံၚ်ဂှ် သွက်ဂွံပရဟ်ဒုၚ်စဵုဒၞာလဝ်ဂှ်လေဝ် ဒပ်ဒေသတအ် ပံၚ်တောဲတုဲ စန်ပကောံလဝ် ဂကောံဇြဟတ်မဟာမိတ်ရဂှ် ဂွံတီကေတ်ရ။

ပွဟွံဗဗွဲဓဝ် သ္ပကဵုညးဍုၚ်ကွာန်တအ် စိုတ်ဂွံဒးလီုသီုဖအိုတ်ဂှ် သွက်ဂွံဘိုၚ်ဗတိုက်ပ္တိတ်ကီု၊ ပွဒပ်ကံၚ်ဇြဳပၞာန် သ္ပမာန်ကေတ်ဇၞး ပ္ဍဲဒေသ/ကွာန်ဇကု ဖျေံလဝ်သ္ဇိုၚ်ဂှ် ဟွံဆုတ်ကလေၚ်တုဲ သွက်ဂွံဗတိုတ်ပ္တိတ်အာ ညဳညဳကီု။ သွက်ဂွံရီုဗၚ်ပူဗိုၚ်အာ ဂကောံစဵုဒၞာဒေသ ရၚ်သ္ကအ်ကီု ဒပ်ကံၚ်ဇြဳပၞာန်ဟေၚ် ဒးစွံလဝ်စိုတ်နဒဒှ်သၞဒ္တန်တုဲ ပရေၚ်လစွံစိုတ်တၞဟ်ခြာ အကြာဂကောံဇြဟတ်ပၠန်ဂတး၊ ပရေၚ်ညဳသၟဟ်လီုလာ်ဒၟံၚ်၊ ပရေၚ်သ္ပမာန်ဍဵုဍိုက်ဒၟံၚ်တအ်ဂှ် ဘိုၚ်ဂၠာဲသွဟ်တုဲ သွက်ဂွံပံၚ်တောဲသောၚ်ကလးအာ မပ္တံသာ်ဏံ ဒုၚ်လဝ်သ္ဇိုၚ်ကဵု (၄)တၚ်ဏံတုဲ သွက်ဂွံဓမံက်အာရုပ်ရဴဒပ်မဟာမိတ်ပံၚ်ကောံ သဳကၠဳလဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – MBT