ပ္ဍဲၜဳကလေၚ် ဟိုတ်နူကရောၚ်ပၞာန်လုပ်ကၠုၚ်တုဲ ညးဒေသ (၆)ကွာန်တအ် ဒးဂြိပ်ဒဴဒၟံၚ်

ၜဳကလေၚ် – သေပ်တေမ်ဗာ (၆)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ပ္ဍဲကွာန်အလူလေဝ်ဂှ် သ္ပတံနူဂိတုသေပ်တေမ်ဗာ စၟတ်တ္ၚဲ (၅)အခိၚ်နူဂယးဂှ် ဟိုတ်နူဒပ်ကံၚ်ဇြဳပၞာန် လုပ်စိုပ်ကၠုၚ်တုဲ ညးဒေသ နူကွာန် ၆ ကွာန်တအ် ဒးဂြိပ်ဒဴဒၟံၚ်ရဂှ် ဂွံတီကေတ် အတိုၚ်လဟီု ညးဍုၚ်ကွာန်ပါဲဘဲပၞာန်တအ်ရ။

ဒပ်ကံၚ်ဇြဳပၞာန် ဇြဟတ်ဒပ် မၞုံဗ္ဒာဲ ၁၀၀ ဂှ် ကြဴနူထ္ပက်လုပ်ကၠုၚ်ကရောၚ်ပၞာန် ပ္ဍဲဗွိုၚ်ကွာန်အလူလေဝ်တုဲဂှ် တြးလဝ်ဇြဟတ်တုဲ ကၠုၚ်မၚ်ဒၟံၚ်ကၚ်ရဂှ် ညးဒေသတအ် ဟီုလဴလဝ်ရ။

ဟိုတ်နူဒပ်ကံၚ်ဇြဳပၞာန်လုပ်ကၠုၚ်တုဲ ညးဒေသ နူကွာန် (၆)ကွာန် ပါလုပ်သီုကွာန်အလူလေဝ်၊ အလူဂျဳ၊ ဝေန်ပျာန်၊ ကွာန်အလေဝ်၊ ကွာန်အနောက်တအ်ဂှ် ဟိုတ်နူဂွိၚ်ဖေက်ဒှ်ပေါဲဗတိုက်တုဲ ဒးဂြိပ်ဒဴပါဲဓလေတ်ဒၟံၚ် ဒၞာဲဗၠးဘဲရ။

ညးဒေသအလူလေဝ်တအ်ဂှ် တ္ၚဲတုဲကၠုၚ်တေံ ဟိုတ်နူပေါဲဗတိုက် ဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ၜါလ္ပာ်တုဲ ညးဂြိပ်ဒဴပါဲဓလေတ်ဒၟံၚ် နွံတုဲ အခိၚ်လၟုဟ်ဏံ ဟိုတ်နူကရောၚ်ပၞာန် ထပ်လုပ်ကၠုၚ်ပၠန်ဂှ်ရ ဒးပါဲဒၟံၚ်ဘဲပၞာန် ကြပ်ဒှ် သီုအလုံမွဲကွာန်ရ။

ပ္ဍဲကဵုပေါဲဗတိုက်ၜါလ္ပာ် ဒှ်လဝ် ဂိတုသေပ်တေမ်ဗာ စၟတ်တ္ၚဲ (၄)ဂှ် လ္ပာ်ဒပ်ပံၚ်ကောံ KNLA သ္ဂံၚ် (၃) တၠဒးပြဟ်လလုဲလဝ်တုဲ လ္ပာ်ကံၚ်ဇြဳပၞာန်လေဝ် ပရေၚ်ဇီုကပိုက် ဒးချိုတ်လဝ် ၜိုန်နွံကီုလေဝ် ဟွံဂွံတီကေတ်လၟိဟ် ချိုတ်တ်ပၠိုတ်တ်ဏီရ။

ဒေသအလူလေဝ် အကာဲအရာပၞာန်ၜါလ္ပာ် သ္ကာတ်မြဟ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ထပ်ဗပေၚ်လဝ်ဇြဟတ်တုဲ ပေါဲဗတိုက်တအ် သာသ္ကာတ်မြဟ်ကၠုၚ်မာန်ဒၟံၚ်ရဂှ် ညးတာလျိုၚ်ဒပ်ပံၚ်ကောံ ဂကောံဇြဟတ်ပၠန်ဂတးတအ် ဟီုလဝ်ရ။

ပွိုၚ်ဍုၚ်ၜဳကလေၚ် ဂကောံပၠန်ဂတးတအ်ဇြဟတ်ခိုဟ်ဒၟံၚ်ဂှ်မ္ဂး ပ္ဍဲမွဲကာလဒပ်ပၞာန်သီအဝဵုဏံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်က္တဵုဒှ်ဒၟံၚ် ခြာဟွံလအ်ဟွံလအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ