ပ္ဍဲကျံက်ကျဳ လွဟ်​ဇၞော်ဒတုံစှ်ေတုဲ ကောန်အရာပ် (၂) တၠ ချိုတ်အာ

ကျံက်ကျဳ၊ သေပ်တေမ်ဗာ (၁၆)

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကဵုပွိုၚ်ဍုၚ်ကျံက်ကျဳ၊ ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တံဂှ်တုဲ ညးဍုၚ်ကွာန်ကောန်အရာပ် ၂ တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။

တုဲကၠုၚ် ပ္ဍဲဂိတုသေပ်တေမ်ဗာ (၂) ၜိုတ်ဇိုၚ်သဝ်တ္ၚဲ (၃) နာဍဳဂှ် နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ကျံက်ကျဳ ခလရ (၂၆၄) ဟိုတ်နူပန်ပှော်စုတ်လဝ် လွဟ်ဇၞော် အပ္ဍဲကွာန်နယဲပေန်ဂှ်ရ ကောန်ကွာန်မွဲတၠ ချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ (၄) အခိၚ်နူဂယး ၜိုတ် (၁၁) နာဍဳဂှ်လေဝ် နကဵုဒပ်ခလရကံၚ်ဇြဳပၞာန် (၂၆၄) ဂှ် ပန်ပှော်စုတ်လဝ် လွဟ်ဇၞော် အပ္ဍဲကဵုကွာန်နဲယျေချံၚ်ဂှ် ဒၟါနူဒးအာလွဟ်ဇၞော်တုဲ မၞိဟ်တြုံအာယုက် (၄၅) သၞာံမွဲတၠ ချိုတ်အာလဝ်ရောၚ် KNU သ္ဂးရ။

ပ္ဍဲဂိတုသေပ်တေမ်ဗာ (၃) တေံဂှ်လေဝ် ညးဒေသပါဲဒဴဘဲပၞာန် မကလေၚ်စဴကေတ်ဇွောံမ အပ္ဍဲကွာန်တမေန်အေန်ကုန်ဂှ်ဝွံ လိုန်ဒးမာၚ်တိုပ်တိ နူကဵုအခိၚ်ဒပ်ကံၚ်ဇြဳပၞာန် လုပ်စိုပ်လဝ်အပ္ဍဲကွာန်တေံ မပစူလဝ်ဂှ်တုဲ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲခရိုၚ်ညံၚ်လေဝ်ပေန်ဂှ် ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံတုဲ ပန်ပှော်လွဟ်ဇၞော်တံကီု၊ ဗ္တိုက်တရဴကျာတံကီု၊ ဗ္တိုက်ဂြာတ်ဗုမ် နကဵုဒရုၚ်တံကီုဂှ် ကၠောန်ၜိုတ်ဒၟံၚ် အရိုဟ်ဒဒှ်တ္ၚဲတုဲ ရပ်ဒက်ပျဲပျာံ ပန်ဂစိုတ်ဒၟံၚ် ညးဍုၚ်ကွာန်ကောန်အရာပ်တံဂှ်လေဝ် ကၠောန်သ္ပဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။

အပ္ဍဲခရိုၚ်ညံၚ်လေဝ်ပေန် KNU ဂှ် ဟိုတ်နူဒပ်ကံၚ်ဇြဳပၞာန် ဝးပ္ကဝ်အခေါၚ်အရာမၞိဟ်တံဂှ်တုဲ ညးဍုၚ်ကွာန်ဒေသ ၜါကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံ ကာမံက်တိုန်ရောၚ်ဂှ် ဂွံတီကေတ် ဇရေၚ်ဂကောံဗော်သွးကရေၚ်တံရ။

ပရိုၚ်−သြၚ်လောန်တိုၚ်(မ်)

ဗီု−KNU