ကျောန်သု၊ သေပ်တေမ်ဗာ (၆)
ကမၠောန်ကတိုၚ်ဖကောဝ် ဟွံလုပ်သၞောဝ် နူက္ဍိုပ်သ္ကိုပ်ပၞာန်ညးဍုၚ်ကွာန်ပိုၚ် ဒေသကော် ဂကောံပျူသဝ်ထဳ သၟဝ်သြဇာကံၚ်ဇြဳပၞာန် မၞုံပ္ဍဲကွာန်ယမုၚ်၊ ပွိုၚ်ဍုၚ်ကျောန်သု၊ ရးဒေသဇၞော်တၞၚ်သဳဂှ် လုပ်စိုပ်ပလီုပလာ်လဝ်ရောၚ် ပကဖ ပွိုၚ်ဍုၚ် လလောၚ်ပ္တိတ်လဝ်ရ။
ပ္ဍဲဂိတုသေပ်တေမ်ဗာ (၃) အခိၚ်လဒေါဝ်တ္ၚဲ (၁) နာဍဳ ဂကောံဒပ်စဵုဒၞါဒေသတံ လုပ်စိုပ်ပလီုပလာ်လဝ် ကပေါတ်စက် မၞုံပ္ဍဲကမၠောန်ကတိုၚ်ဖကောဝ် က္ဍိုပ်သ္ကိုပ်ပၞာန်ညးဍုၚ်ကွာန် ကွာန်ပေအ်တိုၚ် ဥူကျဳလှကဵု ဥူသဵုမိုဝ်မေန်တံ မကၠောန်ဒၟံၚ်ဂှ်ကဵု တာဲဂမၠိုၚ်ရ။
ကမၠောန်ကတိုၚ်ဖကောဝ်ဏံဝွံ သီကေတ်တိညးဍုၚ်ကွာန်ပိုၚ်တံ ဗွဲအဓမ္မတုဲ ပံၚ်တောဲကဵု ကံၚ်ဇြဳပၞာန်တုဲ ဟိုတ်နူကၠောန်ဒၟံၚ် နကဵုဇြဟတ်လွဟ်ဂှ်ရ ဒးလုပ်စိုပ်ပလီုပလာ်လဝ်ရောၚ် ညးတာလျိုၚ် ဂကောံစဵုဒၞါညးဍုၚ်ကွာန် ပွိုၚ်ဍုၚ်ကျောန်သုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်အာစိုပ်ပလီုပလာ် ကမၠောန်ကတိုၚ်ဖကောဝ်ဂှ် ဟွံဂွံဆဵုကေတ် ကောန်ပၞာန်ညးဍုၚ်ကွာန်တံကဵု ကောန်ကလောန်ကတိုၚ်ဖကောဝ်တံဂှ်တုဲ ဂွံဆဵုကေတ်လဝ် ကပေါတ်ဆက်စပ်တံသၟးရဂှ် သ္ဂးရ။
ကမၠောန်ကတိုၚ်ဖကောဝ် က္ဍိုပ်သ္ကိုပ်ပၞာန်ညးဍုၚ်ကွာန် ဥူကျဳလှ မပိုၚ်ပြဳလဝ်ဂှ်ဝွံ တိသီကေတ်လဝ် အဓမ္မဂှ် ၆ ဨက၊ ဒၞါဲကတိုၚ်ဖကောဝ် နွံ ၃ တုဲ နူကဵုပရေၚ်ၜံက်ခါဲဖကောဝ်ဏံဂှ် လၟေၚ်ဂိတု ကလိဂွံဒၟံၚ်သြန်လုပ် ဂၠိုၚ်ကဵုကၠံကိုဋ်ရောၚ် ဂွံတီကေတ် အတိုၚ်ဂလာန်ဂကောံဒပ်စဵုဒၞါဒေသတံရ။
ပ္ဍဲပွိုၚ်ဍုၚ်ကျောန်သုဂှ် ကၠာဂွိုအ်သီအဝဵုတေံ ကတိုၚ်ဖကောဝ်ဇၞော်ဇၞော် မကၠောန်ဒၟံၚ် နကဵုအခေါၚ်အလဵုအသဳတံသၟးရနွံတုဲ ပ္ဍဲလက်ထက်ကံၚ်ဇြဳပၞာန်ဏံ ကတိုၚ်ဖကောဝ်ဍောတ်တ် ဟွံလုပ်သၞောဝ်တံ ဂၠိုၚ်ကၠုၚ်တုဲ သွက်ဂွံဂွံအခေါၚ်ကၠောန်ဂှ် ဒးကဵုဒၟံၚ်ၚုဟ် ဇရေၚ်ဒပ်ကံၚ်ဇြဳပၞာန်ကဵု ဂကောံပၞာန်ညးဍုၚ်ကွာန်တံရောၚ် ညးဒေသတံ ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−PDF
sanlontai