သွက်ဂွံကေတ်တာလျိုၚ် ဥက္ကဌဒးအလန်အာဇြဳယာန် စၞးဍုၚ်ဗၟာဂှ် ဒှ်ဒၟံၚ်ဒတုဲယျ ဖဳလေတ်ဖေန် လလောၚ်တြး

မနဳလာ၊ သေပ်တေမ်ဗာ (၆)

အခိၚ်ဒးရုန်ဂ္စါန်ဒၟံၚ် ပရေၚ်ပ္ညဳပ္ညပ် ကုက္ဍိုပ်သ္ကိုပ်ပၞာန်ဗၟာတံဂှ် ပ္ဍဲသၞာံကၠုၚ်စိုပ် ၂၀၂၆ ဏံ ဖဳလေတ်ဖေန် သွက်ဂွံကေတ်တာလျိုၚ် ဥက္ကဌဒးအလန်အာဇြဳယာန် စၞးဍုၚ်ဗၟာဂှ် ဒှ်ဒၟံၚ်ဒတုဲယျရောၚ် သမ္မတ ဝှာဒဳနာန်မာကောသ် ဂျူနဳယျာ ဟီုဂးလဝ်ရ။

ပ္ဍဲကဵုဍုၚ်ဂျာကာတာ ဍုၚ်အေန်ဒိုဝ်နဳယှာဂှ် သမ္မတမာကောသ်ဂှ် “ဖဳလေတ်ဖေန်ဝွံ ပ္ဍဲသၞာံ ၂၀၂၆ ဏံ သွက်ဂွံကေတ်တာလျိုၚ် ဥက္ကဌအာဇြဳယာန်ဂှ် ဒှ်ဒၟံၚ်ဒတုဲယျဂှ် မိက်ဂွံလလောၚ်တြးဏာရ။ ပရေၚ်ပံၚ်ကောံပိုယ်တံဂှ်ဝွံ က္တဵုဗဒှ်ကဵုရိုဟ်ကၞက်သ္ဇိုၚ်တံ ခိုၚ်ကၠိုက်တုဲ ညံၚ်အာဇြဳယာန် ဂွံစမုက်လိက်တၟိမာန် ပ္တဝ်အာက္ဍိုပ်ဏောၚ်” သာ်ဝွံ ဟီုဂးလဝ်ရ။

ဆ္ဂး ဖဳလေတ်ဖေန်ဝွံ ကိစ္စလှဲပြံၚ်ကေတ်တာလျိုၚ်ဥက္ကဌ ဇရေၚ်ဍုၚ်ဗၟာဂှ် ဟီုဂးလဝ် ဟွံမွဲဏီရ။

ကလုတ်တမာန်အာယှဒိုဟ်အဂၞဲ မတိုန်စိုပ်ကၠုၚ် ကောံဓရီုကဆံၚ်လ္တူ ၜါတၠဂှ် တၚ်ရေၚ်တၠုၚ်ဏံဝွံ တုပ်လဝ်စိုတ် အကြာက္ဍိုပ်သ္ကိုပ်တံတုဲ ညံၚ်ဂွိုအ်က္တဵုဗဒှ်ကဵု အကြေပ်အဂြတ် ကုအစဳဇန်ဂကောံအာဇြဳယာန်တံဂှ်ကီု၊ မိတ်သ္ကအ်မ္ၚးမ္ၚးဂမၠိုၚ် အကာဲအရာလုပ်စိုပ်ကၠုၚ် ဍုၚ်ဗၟာဂှ်လေဝ် တာဒၞါမာန်ရောၚ် သ္ဂးလဝ်ရ။

“အရာဏံဂှ် သ္ဂုတ်သွာတ်လဝ်တုဲယျတုဲ ပ္ဍဲအရာလလောၚ်တြး အကြာက္ဍိုပ်သ္ကိုပ်တံဂှ်လေဝ် ဒစဵုဒစးလဝ်ဟွံမွဲရ” သာ်ဝွံ ကလုတ်တမာန် ဟွံမိက်ထ္မံက်ယၟုမွဲတၠ ဟီုရ။

သ္အာၚ်နူဂှ်ပၠန် ကလုတ်တမာန်ဂှ် ကြဴနူချူပလံၚ်ဗစိုပ်လဝ်လိက် ကုဖဳလေတ်ဖေန် သွက်ဂွံဒုၚ်တဲ ကဆံၚ်ဥက္ကဌ သွက်သၞာံဂှ်တုဲဂှ် လ္ပာ်အလဵုအသဳမနဳလာ ဒုၚ်လဝ်တဲဂှ် သ္ဂးလဝ်ရ။

ကလုတ်ဟွံမိက်ထ္မံက်ယၟုမွဲတၠပၠန်ဂှ်လေဝ် ဟိုတ်နူကံၚ်ဇြဳပၞာန်ဗၟာ သ္ပလဝ်မၛ္ဇဟ် ကုတၚ်စၟဳတ်က္ဍိုပ်သ္ကိုပ်ဂမၠိုၚ် လ္တူပရေၚ်တောတက် စပ်ကဵုအစဳဇန် (၅) သာ် မတုပ်လဝ်စိုတ် လောန်ကၠုၚ် (၂) သၞာံတေံဂှ်တုဲ က္တဵုဒှ်ကၠုၚ်အပြံၚ်အလှာဲသာ်ဏံရောၚ် ဟီုလဝ်ရ။

ကောံဓရီုကဆံၚ်လ္တူအာဇြဳယာန်သၞာံဂတဏံဂှ် ကၠောန်ဗဒှ်အာ ပ္ဍဲဍုၚ်လာအိုဝ်ဏောၚ်တုဲ မလေဝ်ယှာဂှ် သၞာံ ၂၀၂၅ ဏံ ဒးကေတ်အာတာလျိုၚ် ဥက္ကဌရောၚ် ဂွံတီကေတ်ရ။

Ref: The Straits Times