ပ္ဍဲၜဳကလေၚ် ဒပ်ကံၚ်ဇြဳပၞာန် ဒးမာၚ်တုဲ ဟွံအောန်နူကဵု ၅ တၠ ဇီုကပိုက်ချိုတ်မာန်

ၜဳကလေၚ်၊ သေပ်တေမ်ဗာ (၇)

ဒပ်ကံၚ်ဇြဳပၞာန် မကၠုၚ်တောပ်ဗ္တိုက်ဒၟံၚ် ပ္ဍဲကွာန်(ဒေါက်ရပ်) ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ဟိုတ်နူဒးအာလဝ်မာၚ်ဂှ်ရ ကောန်ဒပ်ကံၚ်ဇြဳပၞာန် ဟွံအောန်နူကဵု (၅) တၠ ဇီုကပိုက်ချိုတ်မာန်ရောၚ် ဂွံတီကေတ် ဇရေၚ်ဂကောံဒပ်ပံၚ်တောဲ ဂကောံဇြဟတ်ပၠန်ဂတးတံရ။

တုဲကၠုၚ် ပ္ဍဲဂိတုသေပ်တေမ်ဗာ (၅) အခိၚ်လဒေါဝ်တ္ၚဲ ၜိုတ် (၁၂) နာဍဳဂှ် ဒပ်ကံၚ်ဇြဳပၞာန် ဇြဟတ်ဒပ်ၜိုတ် (၄၀) ပါ မကၠုၚ်တောပ်ဗ္တိုက် သွက်ရေၚ်ကွဳစက်ကံၚ်ဇြဳပၞာန်ဂှ်ဝွံ ဒးအာလဝ်မာၚ် ဗ္ဒါဲကဵုကွာန်(ဒေါက်ရပ်) ရ။

ဒပ်ကံၚ်ဇြဳပၞာန် မကၠုၚ်တောပ်ဗ္တိုက်ဂှ်ဝွံ ကြဴနူဒးအာမာၚ် နူကဵုဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ မပစူလဝ်ဂှ်တုဲဂှ် ကလေၚ်ပန်ပှော်လဝ်လွဟ်ဇၞော်လွဟ်ဍောတ် ကြာန်န်တုဲ ကလေၚ်ဆုတ်အာလဝ်ဒပ်ရ။

ဟိုတ်နူမာၚ်ဂှ်တုဲ ကောန်ဒပ်ကံၚ်ဇြဳပၞာန် ဟွံအောန်နူကဵု (၅) တၠ ကလိဂွံဝပ်သ္ဇက်ဒးဂွိၚ်တုဲ ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ၜဳကလေၚ်ဂှ် ဂွံတီကေတ်ရ။

ကြဴနူဒပ်ကံၚ်ဇြဳပၞာန် ဒးမာၚ်တုဲဂှ် နူကဵုဒၞါဲဒပ်ကံၚ်ဇြဳပၞာန် မဖျေံလဝ်သ္ဇိုၚ် ကေုာံ ဒပ်အမၠံက် ဖျေံသ္ဇိုၚ်ဇြဳဝန် ပွိုၚ်ဍုၚ်ၜဳကလေၚ်ဂှ် ဒဵုကဵုဇိုၚ်သဝ်တ္ၚဲ ပန်ပှော်ကၠုၚ်လဝ် လွဟ်ဇၞော် လ္ပာ်ကွာန်ခေဝ်မံက်၊ (ဒေါက်ရပ်) တံ ဟွံပိုတ်သ္ကုတ်ရ။

လ္တူဂၠံၚ်ကွဳစက် လ္ဂုၚ်−မတ်မလီု ကွာန်(ဒေါက်ရပ်) ဂှ် ရေၚ်ကွဳစက်ကံၚ်ဇြဳပၞာန်တံ ဒးဒုၚ်ဗ္တိုက်ဒၟံၚ်မာၚ် မွဲဏှမွဲဏှဂှ်ရ အခိၚ်ရေၚ်ကွဳစက်ပၞာန် တတ်အာတံဂှ် ဒပ်ကံၚ်ဇြဳပၞာန်တံ မၚ်တောပ်ဗ္တိုက် ကေတ်ဂီုကၠီု မွဲဒမြိပ်ဂၠံၚ်ကာတံ နွံဒၟံၚ်ရ။

တုဲကၠုၚ် ပ္ဍဲဂိတုသေပ်တေမ်ဗာ (၄) တေံဂှ်လေဝ် ပ္ဍဲကဵုကွာန်အလူလေဝ် ပွိုၚ်ဍုၚ်ၜဳကလေၚ်ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ်ပေါဲဗ္တိုက်တုဲ လ္ပာ်ဂကောံဒပ်ပံၚ်ကောံတံဂှ် ကောန်သ္ဂံၚ် ၃ တၠ ပြဟ်လလုဲအာလဝ်တုဲ လ္ပာ်ကံၚ်ဇြဳပၞာန်လေဝ် ဇီုကပိုက်ချိုတ်ဂျိုၚ်တံ နွံဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ညးတာလျိုၚ်ဂကောံဇြဟတ်ပၠန်ဂတးတံရ။

ပရိုၚ်−သြၚ်လောန်တိုၚ်(မ်)

ဗီု−Social Media