တၞၚ်သဳ၊ သေပ်တေမ်ဗာ (၈)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ဗ္ဒါဲကွာန်အဝ်ကျဳဂှ် ကွဳစက်ကံၚ်ဇြဳပၞာန်မွဲဖ္ဍိုက်ကဵု ကရောၚ်ပၞာန်တိုက်တံ ဒးဒုၚ်ကြတ်ဗ္တိုက်တုဲ ပါလုပ်သီုကဵုဗိုလ်မွဲတၠဂှ် ၄ တၠ ချိုတ်အာလဝ်ရောၚ် ညးတာလျိုၚ် (ပကဖ) ရးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုသေပ်တေမ်ဗာ (၆) အခိၚ်လဒေါဝ်တ္ၚဲ ၜိုတ်မွဲနာဍဳကဝိုက် ကွဳစက်ဝဳဂိုဝ်မွဲဖ္ဍိုက် မတိတ်ကၠုၚ် နူကဵုတမ်ဒပ်ကံၚ်ဇြဳပၞာန် စၟတ် (၅၆၆) ဖျေံသ္ဇိုၚ်ကွာန်ဇြဝါ ပွိုၚ်ဍုၚ်တၞၚ်သဳဂှ် ဂကောံဒပ်ပံၚ်ကောံဇြဟတ်ပၠန်ဂတးတံ ဗ္တိုက်ဗ္တိုဟ်လဝ်မာၚ်ရ။
ကြဴနူဂှ်တုဲ မၚ်မံၚ် ကုကရောၚ်ပၞာန်တိုက် ကံၚ်ဇြဳပၞာန် မကၠုၚ်ဘိုၚ်ရီု လ္တူပရေၚ်ဒဒှ်ကွဳစက်ပၞာန် ဒးဒုၚ်ဗ္တိုက်ဂှ်တုဲ ထပ်ဗ္တိုက်လဝ်ဂှ်ရ လ္ပာ်ကံၚ်ဇြဳပၞာန်တံ ဒးဂိလဝ်ရ။
ဒပ်ကံၚ်ဇြဳပၞာန် မ္ဒးဂိအာ ဟိုတ်နူပရေၚ်ဗ္တိုက်ဂှ်ဝွံ ကလေၚ်ကပှ်ဏာ ကောန်ဒပ် မဇီုကပိုက်ချိုတ်အာတံဂှ်တုဲ ပလံၚ်ဗစိုပ်ဏာ ရုၚ်ဂဥုဲဗိက်ဂှ် ညးတာလျိုၚ် ဂကောံစဵုဒၞါညးဍုၚ်ကွာန် ရးတၞၚ်သဳမွဲတၠ သ္ဂးရ။
ပရေၚ်ဗ္တိုက်ဏံဂှ် ဂကောံဒပ်ဒမၠုက်စဵုဒၞါဒဵုရေၚ်၊ ပကဖ ပွိုၚ်ဍုၚ်ပဠဝ်၊ ဂကောံ(တောပုန်းကြီး) တံကီု သီုကီုဂကောံမဟာမိတ်တံ ပံၚ်တောဲဗ္တိုက်လဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၂) တေံဂှ်လေဝ် ဂကောံဒပ်ကံၚ်ဇြဳပၞာန်တောပ်ဗ္တိုက် မၞုံဗ္ဒါဲရုပ်(ဗိုလ်ချုပ်) ဂၠံၚ်ပန်သွာၚ် ဂၠံၚ်လုပ်ဍုၚ်တၞၚ်သဳဂှ် ဒးဒုၚ်ဗ္တိုက်လဝ်ဂှ်ရ ကောန်ဒပ်ကံၚ်ဇြဳပၞာန် (၂) တၠ ကလိဂွံလဝ်ဝပ်ဏီရ။
ပရိုၚ်−သြၚ်လောန်တိုၚ်(မ်)
ဗီု−Tanintharyi PDF
sanlontai