ပံၚ်၊ သေပ်တေမ်ဗာ (၈)
ဗ္ဒိုပ်ကၚ်ဗၠာဲသၟိၚ် ကံၚ်ဇြဳပၞာန် မၞုံကွာန်ယျေန်ညုၚ်၊ ပွိုၚ်ဍုၚ်ပံၚ်၊ တွဵုရးဍုၚ်မန်ဂှ်ဝွံ ပ္ဍဲဂိတုသေပ်တေမ်ဗာ (၇) အခိၚ်ဇိုၚ်သဝ်တ္ၚဲဂှ် ဒးဒုၚ်ဗ္တိုက်လဝ် ကဵုဒရုၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် ဗ္ဒိုပ်ကၚ်ဗၠာဲသၟိၚ်ယျေန်ညုၚ်ဂှ် ဇိုၚ်သဝ်တ္ၚဲ (၄) နာဍဳဂှ်မွဲဝါ၊ ဇိုၚ်သဝ်တ္ၚဲ (၄) နာဍဳကဝိုက်ဂှ်မွဲဝါ ကၠုၚ်စိုပ်ဗ္တိုက်လဝ် နကဵုဒရုၚ်ၜါဝါရ။
အပ္ဍဲပရေၚ်ဗ္တိုက် နကဵုဒရုၚ်ဂှ် ဟိုတ်နူမဗုမ်လ္ၚဵု ဒတုံဗ္တိုဟ်ထ္ကးအာလဝ် အပ္ဍဲကၚ်ဗၠာဲသၟိၚ်တံနွံကီုလေဝ် ဇီုကပိုက်ချိုတ်တံကဵု ပရေၚ်လီုလာ် ဗွဲလစှ်ေတံဂှ် ဟွံဂွံတီကေတ်ဏီရ။
ကြဴနူကၚ်ဗၠာဲသၟိၚ် ဒးဒုၚ်ဗ္တိုက်တုဲဂှ် လ္ပာ်ကံၚ်ဇြဳပၞာန် ဟိုတ်နူပန်ပှော်လဝ် နကဵုလွဟ်ဍောတ် ကြာန်န်ဂှ်ရ ပွမဒးလကိုတ်ဂွိၚ်ဂွါဲတံ က္တဵုဒှ်လဝ်ရောၚ် ဂွံတီကေတ် အတိုၚ်ဂလာန် ညးဒေသတံရ။
တုဲကၠုၚ် ပ္ဍဲဂိတုအဝ်ဂါတ် (၂၇) တေံဂှ်လေဝ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ၝောံဍုၚ် ကဵု ရုၚ်အုပ်ဓုပ်ကာနာနာ ပွိုၚ်ဍုၚ်ပံၚ်တံ နကဵုဒရုၚ်ရ။
ဒုသ္ကိုပ်ဗိုလ်ဇၞော် ယျာပျေအ် ဝန်ဇၞော်ကာအပ္ဍဲဍုၚ် ကံၚ်ဇြဳပၞာန်ဂှ် ပရေၚ်ရပ်စပ်စကာ ဒရုၚ်မသက္ကုမၞိဟ်ဒဳ နူကဵုဂကောံဇြဟတ်ပၠန်ဂတးတံဂှ်ဝွံ အနာဂတ်ဂတဏံ ဒှ်ကၠုၚ်တၚ်ကော်ဆဴမွဲရောၚ် ပ္ဍဲဂိတုအဝ်ဂါတ် (၂၁) တေံ ဒုၚ်ဝန်ဟီုဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−PAN
sanlontai