ပ္ဍဲသဝ် ဟိုတ်နူလွဟ်ဇၞော်ဒပ်ပၞာန်ပန်ဖျေံလဝ်တုဲ ညးဍုၚ်ကွာန် (၄)တၠ ဇီုကပိုက်ဒးလဝ်ဘဲဝပ်

သဝ် – သေပ်တေမ်ဗာ(၈)

ရးဒေသမဂွေ၊ ပွိုၚ်ဍုၚ်သဝ်ဂှ် ဟိုတ်နူလွဟ်ဇၞော်ဒပ်ကံၚ်ဇြဳပၞာန် ပန်ဖျေံလဝ်တုဲ ညးဍုၚ်ကွာန် (၄)တၠ ဇီုကပိုက်ဒးလဝ်ဘဲဝပ်တုဲ ဒးဆေၚ်ဒၟံၚ်မုက်ကဵု အကာဲအရာဒးဒှ်ဓဝိၚ် (၁)တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုသေပ်တေမ်ဗာ စၟတ်တ္ၚဲ (၅)တုဲကၠုၚ်တေံ အခိၚ်ဗ္တံဂှ် ကြဴနူဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ဒှ်လဝ်ပေါဲဗတိုက်ဆေၚ်မုက်တုဲဂှ် နူလ္ပာ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ရ။

“ဒှ်လဝ်ဂှ် ဒှ်ကၠုၚ်နူလဵုရောဂှ် ဟွံတီပုဟ်။ လ္ပာ်ကံၚ်ဇြဳပၞာန်လေဝ် မၞိဟ်ဇၞော်မွဲ ဒးစှ်ေလဝ် ဟီုကီုလေဝ် သ္ပဒ္တန်ဟွံမာန်ဏီရ။ အကာဲအရာလၟုဟ်ဏံ ယှုက်ထုဲဒၟံၚ်တုဲ ဒှ်ဒၟံၚ်အကာဲအရာ အခိၚ်ဟွံရုဲ က္လေၚ်ဒှ်ကၠုၚ်မာန်ဒၟံၚ်ရ”ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

စပ်ကဵုပေါဲဗတိုက်ဒှ်လဝ် လ္တူဍုၚ်သဝ်တုဲ ညးဍုၚ်ကွာန် နူတံဒပ်ခရိုၚ်ဂဂဝ် စၟတ် (၃)မွဲတၠ ဒးလဝ်ဘဲဝပ်သ္ကာတ်မြဟ်တုဲ ဗက်ဂၠာဲသ္အးဇ္ၚးဒၟံၚ်လွဟ်ဇၞော် ဟွံဂွံပါ်ခတိုဟ်လဝ်ဏီတအ်ရဂှ် လလောၚ်တြးလဝ်ပရိုၚ်ရ။

နကဵုညးဍုၚ်ကွာန်တအ် ယဝ်ဆဵုဂဗလွဟ်ဇၞော် ဟွံခတိုဟ်ဏီနွံမ္ဂး လ္ပရပ်လုက်တုဲ ညံၚ်ဂွံကဵုပရိုၚ် ကုတံဒပ်ဂဂဝ်စၟတ် (၃)ကီု ယဝ်မိၚ်ရမျှာၚ်လွဟ် ရမျှာၚ်ဗုမ်မ္ဂး ညံၚ်ဂွံအောပ်မာဒၟံၚ် ပ္ဍဲဥမၚ်ဂှ် ဗတိုက်ဖ္အောဝ်လဝ်ရ။

ပ္ဍဲဂိတုဂျူလာၚ်တုဲကၠုၚ်တေံလေဝ် ဒှ်လဝ်ပေါဲဗတိုက်ကဵုကံၚ်ဇြဳပၞာန် ပွိုန်ပန်တ္ၚဲတုဲ လ္ပာ်ဒပ်စဵုဒၞာညးဍုၚ်ကွာန်တအ် ဒးပြဟ်လလုဲလဝ် ဟွံအောန်နူ (၆)တၠနွံတုဲ လ္ပာ်ကံၚ်ဇြဳပၞာန်ဂှ်မ္ဂး ၜိုတ် (၅၀)တၠ ဇီုကပိုက်ဒးလဝ်ဝပ် ချိုတ်လဝ် နွံရဂှ် ဌာနဝန်ဇၞော်စဵုဒၞာ NUG လေလာင်တြးလဝ် ပရိုင်ရ။

ပ္ဍဲပွိုၚ်ဍုၚ်ထဳလေန်၊ သဝ် ကေုာံပွိုၚ်ဍုၚ်ဂဂဝ် ခရိုၚ်ဂဂဝ် ပရေၚ်ချဳဒရာၚ်ပၞာန် ဇြဟတ်ခိုဟ်ဒၟံၚ်ဂှ် ပါဲနူကံၚ်ဇြဳပၞာန် ထ္ပက်ကရောၚ်ပၞာန်တုဲ ဟိုတ်နူပန်ဖျေံဒၟံၚ်လွဟ်ဇၞော်တုဲ ညးဍုၚ်ကွာန်တအ် ဒးဂြိပ်ဒဴပါဲဓလေတ်ဒၟံၚ်ရဂှ် ဂွံတီကေတ်ရ။

ကြဴနူဒပ်ပၞာန်သီကေတ်အဝဵုကၟိန်ဍုၚ်ဗၟာတုဲ သ္ကုတ်လကြဴဏံ ပ္ဍဲရးဒေသမဂွေဂှ် ညးဍုၚ်ကွာန် (၃၂၀) ပြၚ် ဒးချိုတ်လဝ်ရဂှ် ဓမံက်လဝ် ပ္ဍဲဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် AAPP ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ (ဃောဒပ်ပၞာန်ပန်ဖျေံလဝ်လွဟ်ဇၞော် ပ္ဍဲကွာန်ယျေန်ကေဝ် ပွိုၚ်ဍုၚ်သဝ် ဗီုရုပ်တြေံ)