လ္ဂုၚ်၊ သေပ်တေမ်ဗာ (၈)
သွက်ဂွံသောၚ်ကလး အကြေပ်အဂြတ်ပရေၚ်ဍုၚ်ကွာန် ဍုၚ်ဗၟာ မက္တဵုဒှ်ဒၟံၚ် ကြဴနူဒပ်ပၞာန်သီအဝဵုဂှ်တုဲ တၚ်တုပ်စိုတ် က္ဍိုပ်သ္ကိုပ်အာဇြဳယာန်ဂမၠိုၚ် မတုပ်လဝ်စိုတ် (၅) သာ်ဂှ် သွက်ဂွံဆက်ထိၚ်ဒဝ်အာဂှ် အာဇြဳယာန် ဖျေံလဝ်သ္ဂုတ်သွာတ်ရ။
ပ္ဍဲကဵုကောံဓရီုကဆံၚ်လ္တူအာဇြဳယာန် မရနုက်ကဵု ၄၃ ဝါ မကၠောန်ဗဒှ်လဝ် ပ္ဍဲကဵုဍုၚ်အေန်ဒိုဝ်နဳယှာဂှ် စပ်ကဵုပရေၚ်ဍုၚ်ဗၟာတုဲ တၚ်သ္ၚဳဂၠိပ် က္ဍိုပ်သ္ကိုပ်အာဇြဳယာန် (၈) တၚ် စပ်ကဵုပရေၚ်ထ္မံက်ရုပ်ရဴ တၚ်တုပ်စိုတ် (၅) တၚ်တံဂှ်ကဵု တၚ်သ္ဂုတ်သွာတ် စှ်တၚ်ဂှ် ပ္ဍဲဂိတုသေပ်တေမ်ဗာ (၅) တေံ လလောၚ်ပ္တိတ်လဝ်ရ။
တၚ်တုပ်စိုတ်မသုန်တၚ် အလဵုက္ဍိုပ်သ္ကိုပ်ပၞာန်ဗၟာ သ္ကိုပ်ပၞာန်ဇၞော် မေန်အံၚ်လှာၚ် မတုပ်လဝ်စိုတ် ဒုၚ်လဝ်တဲဂှ် စဵုကဵုပေၚ်ကၠုၚ် ဗ္ဒါဲပိသၞာံကီုလေဝ် လ္တူပရေၚ်ထ္မံက်ရုပ်ရဴ မတီကၠးပြာကတ်တံ ဟွံမွဲဂှ် ဒဒှ်ရဂွိၚ်တဴဂှ် လ္ပာ်က္ဍိုပ်သ္ကိုပ်အာဇြဳယာန်တံ သ္ၚဳဂၠိပ်လဝ်အိုတ်ရ။
နကဵုအာဇြဳယာန် သွက်ဂွံသောၚ်ကလး အကြေပ်အဂြတ်ဍုၚ်ဗၟာဂှ် ဆက်ထိၚ်ဒဝ်အာ တၚ်တုပ်စိုတ် မသုန်တၚ်ဏံ နဒဒှ်တၚ်စၞောန်ဏောၚ်တုဲ သွက်ဂွံကဵုအရီုဗၚ် ပရေၚ်ဗ္စာရဏာမၞိဟ်တံမာန် ကေုာံ သွက်ဂွံဒေါအ်ဒေၚ်ကဵု ပွပကီုပရာပ်တံဂှ်တုဲ ညံၚ်ဂွံကၠောန်ဗဒှ် ပေါဲသဳကၠဳ ညးမဆက်စပ်အိုဿီုပါလုပ်မွဲမာန်ဂှ်လေဝ် ပၟိက်ဇၞော်ရောၚ် သ္ဂးရ။
ဍုၚ်ဗၟာ မ္ဒးကေတ်အာတာလျိုၚ် နဒဒှ်ဥက္ကဌဒးအလန်အာဇြဳယာန် ပ္ဍဲသၞာံ ၂၀၂၆ တေံဂှ် သွက်ဂွံပအပ်ကဵုတာလျိုၚ် ထ္ပက်အဇာ ကုဍုၚ်ဖဳလေတ်ဖေန်ဂှ်လေဝ် က္ဍိုပ်သ္ကိုပ်အာဇြဳယာန်တံ သ္ဂုတ်သွာတ်လဝ်အိုတ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပွမတးပါဲထောံ ဍုၚ်ဗၟာ နူကဵုဒၞါဲဥက္ကဌ အာဇြဳယာန်ဂှ်ဝွံ ၜိုန်ရဒှ်တဴ ပရေၚ်တောတက်ကီုလေဝ် လ္တူအလဵုအသဳပၞာန်ဗၟာ ဟွံထ္မံက်ရုပ်ရဴ တၚ်တုပ်စိုတ်ဂမၠိုၚ်ဂှ် နကဵုအာဇြဳယာန် သွက်ဂွံကေတ်အရေဝ် ပိုတ်တ်သ္ကုတ်တ်ဂှ် နွံပၟိက်ရောၚ် ဟီုရ။
“တးပါဲထောံ ကိစ္စဍုၚ်ဗၟာ မ္ဒးသ္ပဥက္ကဌအာဇြဳယာန်ဂှ် ဒှ်ပရေၚ်တောတက်ရောၚ် ဟီုဂွံရ။ ဆ္ဂး သ္ဂုတ်သွာတ်ထောံသာ်ဏံဂှ်ဝွံ ဒှ်အာသဘဴ သ္ပထောံစၟတ်သမ္တီ ကုကံၚ်ဇြဳပၞာန် သွက်ဂွံဆက်ဒတူလိုၚ်အာ စဵုကဵု သၞာံ ၂၀၂၆ ဂှ်ရ ဟွံကိတ်ညဳကဵု အကာဲအရာ မက္တဵုဒှ်ဒၟံၚ် အပ္ဍဲကဵုဍုၚ်တံဂှ်ရ ဂလာန်ဏံဂှ် ဒုၚ်တဲဟွံမာန်ပုဟ်။ ညအ်ဂှ် တုပ်တဴညံၚ်ရဴ ကဵုထောံဂၠံၚ်ဍာန် သွက်ကံၚ်ဇြဳပၞာန် ဂွံဆက်ဂျိုၚ်တဴအာပၠန်ရ။ ဍာံဍာံဂှ် လၟုဟ် ပေၚ်အာပိသၞာံယျ၊ ဟွံထ္မံက်ရုပ်ရဴ အာဇြဳယာန် ၅ တၚ်ဂှ်ပုဟ်ဟီုမ္ဂး အခိၚ်ပေၚ်ပိသၞာံဏံဂှ် သာ်လဵုကေတ်တဴအရေဝ် လ္တူအလဵုအသဳပၞာန်ဗၟာ စကစဏံရောဟီုဂှ် တၚ်သ္ဂုတ်သွာတ်ချိုတ်တ်ပၠိုတ်တ်ဂှ် ညးဍုၚ်ကွာန်ပိုယ်တံ စၟဳစဒၟံၚ်ရ “ သာ်ဝွံ ညးသ္ဂးရ။
လ္ပာ်အာဇြဳယာန်ဂှ် သီုဒပ်ပၞာန်ဗၟာကီု သီုကဵုဂကောံရပ်လွဟ်တၞဟ်ဟ်တံကီု သွက်ဂွံဖအောန်ဖျေံအသိၚ် ပွပကီုပရာပ်တံဂှ်ကဵု ပွမစွံပွန်ဗ္တိုက် ကုကောန်အရာပ်တံ၊ သ္ၚိဒၟံၚ်၊ စမြိုၚ်သာသနာ၊ ဘာဗ္တောန်လိက်၊ ရုၚ်ဂဥုဲ၊ ဖျာ မပ္တံကဵုဒၞါဲတံဏံဒှ်တမ် သွက်ဂွံဒေါအ်ဒေၚ်ကဵုဂှ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် အတိုၚ်မသ္ဂုတ်သွာတ်လဝ် ပ္ဍဲကဵုကောံဓရီုကဆံၚ်လ္တူအာဇြဳယာန် တုဲကၠုၚ်တေံဂှ်မ္ဂး မူ မကၟာတ်လဒဵုလဝ် အခေါၚ်တိုန်စိုပ် ညးစၞးပရေၚ်ဍုၚ်ဗၟာ ပ္ဍဲကဵုကောံဓရီုကဆံၚ်လ္တူအာဇြဳယာန်တံကဵု ကောံဓရီုဝန်ဇၞော်ကာဍုၚ်သ္အာၚ်အာဇြဳယာန်တံဂှ် ဆက်ရပ်စပ်အာဏောၚ် သ္ဂုတ်သွာတ်လဝ်ရ။
ဌာနဝန်ဇၞော်ကာဍုၚ်သ္အာၚ် ကံၚ်ဇြဳပၞာန်ဂှ် နကဵုက္ဍိုပ်သ္ကိုပ်အာဇြဳယာန်ဂမၠိုၚ် လ္တူကလေၚ်သ္ၚဳဂၠိပ်ဖျေံသ္ဂုတ်သွာတ် ကုတၚ်တုပ်စိုတ် ၅ သာ်ဂှ် ဍုၚ်တၞဟ်ဟ်တံ လုပ်စိုပ်ပလာပ်ထုဲ ကာအပ္ဍဲဍုၚ် ကၟိန်ဍုၚ်အာဇြဳယာန်မွဲမွဲ ဟွံဂွံဂှ် ပ္ဍဲဂိတုသေပ်တေမ်ဗာ (၅) တေံ ဒစဵုဒစးလဝ်ရ။
ပရိုၚ်−သြၚ်လောန်တိုၚ်(မ်)
ဗီု− NBNC
sanlontai