ဘာပန်၊ သေပ်တေမ်ဗာ (၈)
တွဵုရးကရေၚ်၊ ပွိုၚ်ဍုၚ်ဘာပန်၊ ရုၚ်ဌာနက္ဍိုက်က္ဍိုပ် ပရေၚ်အုပ်ဓုပ် ဍုၚ်ကမမောၚ်ဂှ် ဟိုတ်နူဒးဒုၚ်ဗတိုက်လဝ်ကဵုဒရုမ်တုဲ သ္ကိုပ်အုပ်ဓုပ်အရာပ်မွဲတၠ ဒးချိုတ်လဝ်တုဲ ညးယိုက်ဝန်ၜါတၠ ဒးလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုသေပ်တေမ်ဗာ စၟတ်တ္ၚဲ (၇) အခိၚ်နူယး ၜိုတ် (၁၀)နာဍဳ ဃောကၠောန်ဒၟံၚ်ကောံဓရီု ပ္ဍဲရုၚ်အုပ်ဓုပ်ကမမောၚ်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် ထောံဖျေံလဝ်ဗုမ်ကဵုဒရုမ် (၃)မတုဲ ဗတိုက်လဝ်ရ။
ပ္ဍဲပရေၚ်ထောံဖျေံဗုမ် ဗတိုက်လဝ်ကဵုဒရုမ်ဂှ် ဟိုတ်နူဒတုံစှ်ေပါ်ခတိုဟ်လဝ် ဗ္ဒာဲရုၚ်အုပ်ဓုပ်ဂှ်ရ သ္ကိုပ်ပရေၚ်အုပ်ဓုပ်အရာပ် စၟတ် (၄) ဥူသိုဝ်မေန် နွံဒၟံၚ်ဂတမုက်ရုၚ်ဂှ် ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်ရ။
ပ္ဍဲပရေၚ်ဗတိုက်လဝ်ကဵုဒရုမ်ဏံ ညးယိုက်ဝန်ရုၚ်အုပ်ဓုပ်ၜါတၠ ဒးလဝ်ဘဲဝပ် ဟွံဒးဒှ်ဓဝိၚ်တုဲ စမြိုၚ်ရုၚ်လ္ၚဵုဂှ် ဇီုကပိုက်ဒးလီုလာ် ဒးက္တဵုဒှ်လဝ်ရ။
ကြဴနူရုပ်အုပ်ဓုပ်ကမမောၚ် ဒးဒုၚ်ဗတိုက်လဝ်ကဵုဒရုန်တုဲဂှ် ဒပ်ပံၚ်တောဲ ကံၚ်ဇြဳပၞာန်ကဵု BGF တအ် ကၠုၚ်စၟဳစၟတ်လဝ်ရဂှ် ညးဒေသတအ် ဟီုထ္ၜးလဝ်ရ။
ပ္ဍဲဂိတုသေပ်တေမ်ဗာ တုဲကၠုၚ် စၟတ်တ္ၚဲ (၃)တေံဂှ်လေဝ် တွဵုရးကရေၚ်၊ ဟိုတ်နူရုၚ်အုပ်ဓုပ်ခရိုၚ်ဗြဝတဳ ဒးဒုၚ်ဗတိုက်လဝ်ကဵုဒရုမ်တုဲ ပါလုပ်သီုသ္ကိုပ်တံဒပ်ကံၚ်ဇြဳပၞာန် ဒးချိုတ်လဝ် (၉) တၠတုဲ ဒးလဝ်ဘဲဝပ် (၇) တၠရဂှ် ကံၚ်ဇြဳပၞာန် သ္ပလဝ်ဒ္တန်ရ။
ပရိုၚ် – သြၚ်လောန်တိုၚ်(မ်)
ဗီုရုပ် -PAN
sanlontai