မတ်မလီု၊ သေပ်တေမ်ဗာ(၈)
တွဵုရးဍုၚ်မန်၊ ပ္ဍဲထံၚ်စာတ်ဗဟဵုကျာ်မြဟ်ဂှ် ကံၚ်ဇြဳပၞာန်တံ ကၠောန်သ္ပကၠုၚ် ပရေၚ်သၞောတ်ဗ္ၜတ် အခေါၚ်ပလံၚ် စၞစတံကေုာံကပေါတ်ပါသေဝ်ဂကောံသ္ၚိကၟိန်တံ ဇရေၚ်ကောန်ထံၚ်ပရေၚ်ဍုၚ်ကွာန်တံရဂှ် ညးစုက်လုက်ကဵုဂြောဝ်ဂတာ ကောန်ထံၚ်ပရေၚ်ဍုၚ်ကွာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကံၚ်ဇြဳပၞာန်ဂှ် ယဝ်ရဂြောဝ်ဂတာ ကောန်ထံၚ်ဒးဒုၚ်ဖျေံမံၚ်ထံၚ် နကဵုဒုဟ်ဒဏ်တၞဟ်ဟ်တံ ပလံၚ်ကပေါတ်ပါသေဝ်မ္ဂး ဒုၚ်တဲဍိုက်က်ပေၚ်ၚ်ကီုလေဝ် ကုကောန်ထံၚ် ဒးဒုၚ်ဖျေံမံၚ်ထံၚ်နကဵုၝောံပိုဒ်ပရေၚ်ဍုၚ်ကွာန်တံဂှ်တှ်ေ သၞောတ်ဗ္ၜတ်ကၠုၚ် အခေါၚ်ပလံၚ်ကပေါတ်ပါသေဝ်တံ မဒှ်ရ။
အခေါၚ်ပလံၚ်ကပေါတ်ပါသေဝ် ဇရေၚ်ကောန်ထံၚ်ပရေၚ်ဍုၚ်ကွာန်တံဂှ် ကၠာတေံဂှ် မွဲသတ္တဟမ္ဂး (၂)ဝါ ပအပ်ကဵုကၠုၚ်လဝ်အခေါၚ်ကီုလေဝ် အခိၚ်လၟုဟ်ဂှ်တှ်ေ မွဲသတ္တဟမ္ဂး(၁)ဝါ၊ ပ္ဍဲအရာပလံၚ်ကပေါတ်ပါသေဝ်တံဂှ်လေဝ် ခၞံကြုက်ကှ်ကှ်(၅)ဓုပ်၊ ကဝ်ဖဳမေတ်ဓုပ်ဍောတ်ဂှ် (၇)ဓုပ်၊ သွဖျုန်တံဂှ်လေဝ် ညံၚ်ဂွံပလံၚ် သၟဝ်လယိုၚ်(၅၀)ဂှ် လလောၚ်ပ္တိတ်လဝ် စေဝ်ပၞောန်ရ။
ပ္ဍဲအရာပလံၚ်ကပေါတ်ပါသေဝ် နကဵုသၞောတ်ဗ္ၜတ်ဂှ်လေဝ် ပတေၚ်ဂြတ်လဝ် ပရေၚ်စၟဳတ်တုဲ မပ္တံတၞးကာတ်ကောန်ဍုၚ်၊ တၞးဆာဲစရၚ်ဂကောံသ္ၚိကၟိန်တံဂှ်လေဝ် ဒးထ္ၜးကဵုမံၚ်ရဂှ် ညးစုက်လုက်ကဵု ဂြောဝ်ဂတာ ကောန်ထံၚ်ပရေၚ်ဍုၚ်ကွာန်မွဲတၠဂှ် ဟီုရ။
“သာတုဲဓရေပ်ဓရတ်ကၠုၚ် လ္တူနူကၠာတေံရ။ ပလံၚ်ပါသေဝ်တှ်ေ ကၠာတေံမ္ဂး မၞိဟ်မွဲတၠဂှ် ၜိုတ်(၂)ဓုပ်ပလံၚ်ဂွံမံၚ်၊ မွဲသတ္တဟဂှ် (၂)ဝါ ပလံၚ်ဂွံမံၚ်။ အတိုၚ်စေဝ်ပၞောန်ဍေံတံစၟတ်လဝ်ဂှ်ရတှ်ေ။ လၟုဟ်ဂှ် မၞိဟ်မွဲတၠမ္ဂး မွဲသတ္တဟ မွဲဝါရ ပလံၚ်ဂွံ။ တုဲပၠန် ကပေါတ်ဂှ်လေဝ် ကၠာတေံဂှ်တှ်ေ ၜိုတ်ဒးစိုတ်ပံက်လဝ်ကဵုရ။ လၟုဟ်ဂှ် ကဝ်ဖဳမေတ်တှ်ေ ဓုပ်ဍောတ်ကွက်မွဲခေါ်ဂှ် (၇)ဓုပ်၊ ခၞံကြုက်ကှ်ကှ်တှ်ေ (၅)ဓုပ်ရ ကဵုအခေါၚ်။သွဖျုန်ကဂှ်လေဝ် သၟဝ်လယိုၚ်(၅၀)ရဂွံ။ တုဲပၠန် မၞိဟ်ကၠုၚ်ပလံၚ်ပါသေဝ်ဂှ်လေဝ် ဒးထ္ၜးတၞးကာတ်ကောန်ဍုၚ်၊ စရၚ်ဂကောံသ္ၚိကၟိန်ရ။ စၟတ်တဲဂှ် ဒးထ္ပက်(၂)အလန်ရ။ အမှုတၞဟ်ဟ်တံဂှ် တၚ်သၞောတ်ဗ္ၜတ်စေဝ်ပၞောန် ဟွံမွဲၜိုတ်ကောန်ထံၚ်ပရေၚ်ဍုၚ်ကွာန်တံပုဟ်။ ပၞောန်လေဝ်ဟွံဒးရေၚ်ပုဟ်။ ကပေါတ်တဍေံတံဂှ် မွဲအလန်ဓဝ် ညံၚ်ကဵုညးပြံၚ်သ္ၚိရ။ ပံက်လဝ်ကဵုရ။ မုပရေၚ်စၟဳတ်လေဝ် ဟွံမွဲပုဟ်။ ဟီုကဵုၝောံပိုဒ်အမှုတှ်ေ ပ္ဍဲဍေံတံဂှ် ကၠောန်လဝ်ကဵုပရေၚ်ကၠိုဟ်စိုတ်ညးသ္ကအ်ရ။ ဍေံတံဂှ်တှ်ေ ကဵုလဝ်အခေါၚ်သၠးပွး ဖအိုတ်ရ” သာ်ဝွံ သ္ဂးရ။
စၞစသုၚ်၊ ဂဥုဲဇဗကေုာံ ကပေါတ်အရပ်စပ် ဂြောဝ်ဂတာ ကောန်ထံၚ်ပရေၚ်ဍုၚ်ကွာန်တံ ပလံၚ်နၚ်တံဂှ်လေဝ် ဟွံကဵုဍိုက်က်ပေၚ်ၚ်တုဲ ညးယိုက်ဝန်ထံၚ်စာတ်တံဂှ် ၜိုတ်နွံပၟိက်ဂှ်ကေတ်တုဲ ကလေၚ်သွံမံၚ်ပ္ဍဲဆေၚ်ဖျာသက်သာ ပ္ဍဲထံၚ်တံနွံမံၚ်ရဂှ် ညးဆက်ဟီုရ။
ညးယိုက်ဝန်နူဌာနက္ဍိုက်က္ဍိုပ်ထံၚ်စာတ် သၟဝ်တဲကံၚ်ဇြဳပၞာန်တံဂှ် ကောန်ထံၚ်ပရေၚ်ဍုၚ်ကွာန်တံဂှ် ဟွံကဵုအခေါၚ်ဆဵု ကုဂကောံသ္ၚိကၟိန်တံမွဲသာ် ထပိုတ်လဝ်အဆက်တုဲ ကလိလောန်မံၚ် ပရေၚ်လီအာတ်သြန်လှုဲနာနာသာ်ရဂှ် ကောန်ထံၚ်ပရေၚ်ဍုၚ်ကွာန် ကလေၚ်ဗၠးကၠုၚ်တံ ဟီုအိုတ်ရ။
ကောန်ထံၚ်ပရေၚ်ဍုၚ်ကွာန်တြေံမွဲတၠဂှ်တှ်ေ သက်က် သ္ပမာန်ဍဵုဍိုက် ကောန်ထံၚ်ပရေၚ်ဍုၚ်ကွာန်တုံတုဲ ဖံက်ပ္ကဝ်ကၠုၚ် စေဝ်ပၞောန်ပ္ဍဲထံၚ်တံကဵု အခေါၚ်အရာမၞိဟ်တံ မံက်က်ထေၚ်ၚ်ရဂှ် ပါ်ပါဲမံၚ်ရ။
“ဍေံတံလၟုဟ်ဂှ် သွက်ဂွံမာန်တၞဟ်ဟ်တံ ဟွံမွဲစကွေံကွေံရတုဲ မၞိဟ်နွံမံၚ်ပ္ဍဲတဲဍေံတံဂှ်ရ သ္ပမာန်မံၚ်ရ။ နကဵုတၚ်ရန်တၟအ်ဏံရ။ ပိုဲညာတ်ကေတ်ဂှ်တှ်ေ ကောန်ထံၚ်ပရေၚ်ဍုၚ်ကွာန်တံဂှ် သ္ပမာန်ဂွံရ။ ကၠောန်မံၚ် နကဵုပဝ်လဇြဳ မၞိဟ်ဗှ်ေတံ နွံမံၚ်ပ္ဍဲတဲအဲ။ မာန်မံၚ်မၞိဟ်ဗှ်ေတံဏီရ။ ဇေတ်တ်ဂှ် ဖံက်ပ္ကဝ်မံၚ်အခေါၚ်အရာမၞိဟ်ရ။ လ္ဂောံကဵုစေဝ်ပၞောန်ထံၚ်ဍေံတံဂှ် အခေါၚ်အရာကောန်ထံၚ် စေဝ်ပၞောန်ချူလဝ် ပ္ဍဲထံၚ်ဍေံတံ နွံမံၚ်ရ။ စေဝ်ပၞောန်တံဏံဂှ်လေဝ် ဖံက်ပ္ကဝ်၊ အခေါၚ်မရာမၞိဟ်ဂှ်လေဝ် ဖံက်ပ္ကဝ်ရ။ စေဝ်ပၞောန်ပ္ဍဲထံၚ်တံဂှ်လေဝ် အတိုၚ်ပၟိက်စိုတ်ဍေံတံ ဍေံတံဖံက်ပ္ကဝ်မံၚ်ရ” သာ်ဝွံ သ္ဂးရ။
ပ္ဍဲလက်ထက်ကံၚ်ဇြဳပၞာန်ဂှ် ကောန်ထံၚ်ပရေၚ်ဍုၚ်ကွာန်တံဂှ် ဒးဒုၚ်ဍဵုဍိုက်မံၚ်ပ္ဍဲထံၚ်နာနာသာ် လ္တူနူကောန်ထံၚ် ကလိလောန်လဝ် ဒုဟ်ဒဏ်တၞဟ်ဟ်တုဲ ဒးဒုၚ်ဖျေံမံၚ်ဒဏ်ထံၚ်တံဏီတုဲ အာတ်မိက်အခေါၚ်အရာ သ္ဒးဂွံထေက်တံမ္ဂးလေဝ် ပွဒးဒုၚ်ကၟာတ်တိုက်တံ၊ ဒးဒုၚ်ပြံၚ်ထံၚ်တံနွံမံၚ်ရ။
သ္အာၚ်နူဂှ်ပၠန် ကောန်ဂကောံဒပ်ကံၚ်ဇြဳပၞာန်တံ လဆောဝ်လဆောဝ် ပ္ဍဲအခိၚ်ဗ္တံတံဂှ် နကဵုဇြဟတ်လၟိဟ်ဗွဲမဂၠိုၚ် ကၠုၚ်ကော်ဏာမံၚ် ကောန်ထံၚ်ပရေၚ်ဍုၚ်ကွာန်တံတုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ကော်ဏာတံဂှ် အဆက်ပိုတ်အာ ကုဂကောံသ္ၚိကၟိန်တံလးလးတံ နွံမံၚ်ရဂှ် ဂွံတီကေတ်ရ။
မွဲလ္ပာ်ပၠန်ဂှ်တှ်ေ ကုကောန်ထံၚ်ပရေၚ်ဍုၚ်ကွာန်တံဂှ် ဟွံကဵုပရေၚ်မၚ်မွဲရံၚ်စံၚ်ပရေၚ်ထတ်ယုက် ပ္ဍဲထံၚ်တံပေၚ်ၚ်ရတုဲ နနဲနာနာသာ် ကၠောန်သ္ပကၠုၚ် ပရေၚ်ဝးပ္ကဝ်အခေါၚ်အရာမၞိဟ်တံ၊ ပွကဵုပလာပ်ပထုဲတံ ခြာဟွံလအ်ဟွံလအ်ရဂှ် ကောန်ထံၚ်ပရေၚ်ဍုၚ်ကွာန်တြေံတံ သ္ဂးအိုတ်ရ။
ပ္ဍဲတွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန်တံဂှ် စွံလဝ်ပ္ဍဲထံၚ်စာ်ဗဟဵုကျာ်မြဟ်ဂှ်ဂၠိုၚ်အိုတ်တုဲ လ္ဂုၚ်၊ အၚ်ဝ၊ ဗဂေါ၊ တွဵုရးကရေၚ် ကေုာံ တွဵုရးဍုၚ်မန်မပါလုပ် ကောန်ထံၚ်ပရေၚ်ဍုၚ်ကွာန်တြုံ၊ ဗြဴ ဒးဒုၚ်ရပ်ဒက်ဖျေံလဝ်ထံၚ် နူဒေသစုၚ်တံ နွံမံၚ်ဗ္ဒါဲ ၃၀၀ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-Social Media
sanlontai