သၞေဟ်ကၚ်စၟဳစၟတ်ကျာ်ဗ္စံက် ဍုၚ်ထဝါဲ ဒးဒုၚ်ဗတိုက်တုဲ ဒးချိုတ်လဝ် (၂) တၠ

ထဝါဲ၊ သေပ်တေမ်ဗာ(၉)

ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ဟိုတ်နူသၞေဟ်ကၚ်စၟဳစၟတ်ကျာ်ဗ္စံက်ကံၚ်ဇြဳပၞာန် မၞုံဗ္ဒာဲကွာန်မောၚ်မေဝ်ယှောၚ်ဂှ် ဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၂)တၠ ဒးချိုတ်လဝ်ရဂှ် ဂွံတီကေတ်အတိုၚ်တၚ်လလောၚ်တြး ကရောၚ်ပၞာန်ဥဩရ။

သၞေဟ်ကၚ်စၟဳစၟတ်ကျာ်ဗ္စံက်ကံၚ်ဇြဳပၞာန် ဇြဟတ်ဒပ် နွံဗ္ဒာဲ (၃၀)ဖျေံဗဒိုပ်မံၚ်တန်တဴဒၟံၚ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ(၇) အခိၚ်ဒေါဝ်တ္ၚဲ ၜိုတ် (၁)နာဍဳကဝက်ဂှ် ဒပ်ပံၚ်ကောံ ဒပ်စဵုဒၞာဒေသတအ် လုပ်စိုပ်ဗတိုက်လဝ် ဃောဝိုတ်ဒၟံၚ်သတိရ။

ဟိုတ်နူပရေၚ်ဗတိုက်ပန်ပှော်ဏံတုဲ ပရေၚ်ပန်ပှော်ၜါလ္ပာ် ဒှ်လဝ် ဗ္ဒာဲပွိုၚ် (၁၀)မိနေတ်ပြၚ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၂)တၠတုဲ ဒးလဝ်ဘဲဝပ် (၃)တၠရ။

သၞေဟ်ကၚ်စၟဳစၟတ်ကျာဗ္စံက်ဏံ ဟိုတ်နူရပ်စပ်စၟဳစၟတ်ဒၟံၚ် ညးဍုၚ်ကွာန်အာတရဴတအ်ကီု၊ ဟိုတ်နူအာတ်မိက်ဒၟံၚ်သြန်ကီုတုဲ လုပ်စိုပ်ဗတိုက်လဝ် ဃောဝိုတ်ဒၟံၚ်သတိရဂှ် ညးတာလျိုၚ်ကရောၚ်ပၞာန်ဥဩ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကြဴနူဗတိုက်ပန်လဝ်တုဲ ဃောကောန်ဒပ်ဒပ်စဵုဒၞာညးဍုၚ်ကွာန်တအ် က္လေၚ်ဆုတ်တိတ်ဒၟံၚ်ဂှ် နူလ္ပာ်ကံၚ်ဇြဳပၞာန် ပန်ပှ်ောဒၟံၚ်ကြာန်န်ဒၟာန်န်အဆက်ဟွံပိုတ်သ္ကုတ်ရဂှ် ညးအာတရဴတအ် ဟီုလဝ်ရ။

ကြဴနူကၠုၚ်ကပှ်ကေတ်ဏာ ကောန်ဒပ်ကံၚ်ဇြဳပၞာန် ဒးချိုတ်လဝ် ဟိုတ်နူဒးဒုၚ်ဗတိုက်ပန်လဝ်ဏံ နကဵုယာဉ်ကွဳစက်ပ္ဍိုက်ညးယဲတုဲဂှ် ပလံၚ်ဗစိုပ်ဏာလဝ် ရုၚ်ဂဥုဲထဝါဲရဂှ် ဂွံတီကေတ်ရ။

ပ္ဍဲဂိတုအဝ်ဂါတ် စၟတ်တ္ၚဲ (၁၈)တုဲကၠုၚ်တေံလေဝ် သၞေဟ်ကၚ်စၟဳစၟတ်ကျာ်ဗ္စံက်ဂှ် ဟိုတ်နူဂကောံစဵုဒၞာညးဍုၚ်ကွာန်တအ် ကၠုၚ်ပန်လဝ်ကဵုသနိုက်ဗာတုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၁)တၠဏီရ။

ပရိုၚ် – သြၚ်လောန်တိုၚ်(မ်)

ဗီုရုပ် -Oae Awd Column