လဂုၚ်၊ သေပ်တေမ်ဗာ(၈)
ပ္ဍဲပၠန်ဒစဵုဒစးပၠန်ဂတးညးဍုၚ်ကွာန် ပွိုၚ်ၜါသၞာံဏံ ဘပဠကၠုၚ်ပရေၚ်ပၞာန် စဵုကဵုနေပျဳဒဝ် ဒၞာဲကံၚ်ဇြဳပၞာန်လဇံက်လဝ်ရုၚ်မာန်ကၠုၚ်ရဂှ် သမ္မတအလဵုအသဳပရေၚ်ညဳသၟဟ်ကောန်ဂကူ (NUG) ဒူဝါလယှဳလ ဟီုသ္ဂးကၠုၚ်ရ။
ပ္ဍဲကဵုဂလာန်လၟိၚ် တ္ၚဲလလောၚ်တြးကၠုၚ်ပၞာန်ဒစဵုဒစးပၠန်ဂတးညးဍုၚ်ကွာန် ပေၚ်(၂) သၞာံ ကၠုၚ်စိုပ် ပ္ဍဲဂိတုသေပ်တေမ်ဗာ စၟတ်တ္ၚဲ (၇)ဂှ် သမ္မတယာယဳဒူဝါလယှဳလ ဟီုလဝ် ဃောဟီုဒၟံၚ်ဂလာန်လၟိၚ်ဂှ်ရ။
သမ္မတယာယဳ ဒူဝါလယှဳလဂှ် ပ္ဍဲပၞာန်ဒစဵုဒစးပၠန်ဂတး ပေၚ်ပွိုၚ်ၜါသၞာံဏံ သွက်ဂကောံပၞာန်သီအဝဵု ပတှ်ေကေတ်လဝ် ဒၞာဲဂီုကၠီုအိုတ် ပ္ဍဲနေပျဳဒဝ်ဂှ်လေဝ် ညံၚ်ဂွံဒုၚ်စသိုၚ် ပရေၚ်ဟွံဂီုကၠီုဂှ် သ္ဂံၚ်ပၠန်ဂတးတအ် ပ္တိတ်ဇြဟတ်မာန်ဒၟံၚ်ယျဂှ် ဟီုလဝ်ရ။
သ္အာၚ်နူဂှ်ပၠန် ဂကောံပၞာန်ဂှ် မ္ၚးနူပရေၚ်ပၞာန်၊ ပရေၚ်ပိုန်ဒြပ် ကေုာံကေၚ်ကာကလုတ်တမာန် ဒးကျဟောံဗြီုဒၟံၚ် ပ္ဍဲကဏ္ဍနာနာဂှ်တုဲ ပ္ဍဲကဵုပေါဲဗတိုက်ပၠန်ဂတးက္ညၚ်ဂှ်လေဝ် မွဲလဂါံတုဲမွဲလဂါံ ကြပ်ညောန်ကၠုၚ်ဒၟံၚ်ပေါဲအံၚ်ဇၞးရဂှ် သမ္မတယာယဳ ဟီုလဝ်ရ။
ဂအုပ်ဗိုလ်ဇၞော်ဇြဝ်မေန်ထောန် ညးမၞုံအခေါၚ်ဟီုဂးကံၚ်ဇြဳပၞာန်ဂှ်မ္ဂး ၜိုန်ရဒုၚ်လဝ်ဝန် ပေါဲဗတိုက်ဒှ်လဝ် ဗဒါဲဗွိုၚ်နေပျဳဒဝ်ဂှ်ကီုလေဝ် လ္တူတၚ်ကြီုခအောတ်လဝ်မ္ဂး ဂၠံၚ်သီုဖအိုတ်ဂှ် အာနေပျဳဒဝ်ဏောၚ်ဂှ် ဟီုသ္ပလဝ်စရဵု ပ္ဍဲပေါဲသောၚ်ကလးပရိုၚ် မရနုက်ကဵု(၂၂) ဝါ ကၠောန်ဗဒှ်လဝ် ပ္ဍဲဂိတုအဝ်ဂါဝ် စၟတ်တ္ၚဲ (၂၂)ဂှ်ရ။
အတိုၚ်လိက်ဒုၚ်စဳရေၚ် အလဵုအသဳပရေၚ်ညဳသၟဟ်ကောန်ဂကူ (NUG) ပေၚ်ၜါသၞာံဂှ်မ္ဂး အလုံမွဲကၟိန်ဍုၚ် အပံၚ်လၟိဟ်ပေါဲဗတိုက် စဵုကဵုဗ္ဒာဲ ၉၉၀၀ က္တဵုဒှ်လဝ်တုဲ ဗတိုက်သရိုဟ်လဝ် ဇြဟတ်ဒပ်ပၞာန်သၞ ဗ္ဒာဲ ၃၀,၀၀၀ မာန်လဝ်ရဂှ် လလောၚ်တြးလဝ်ရ။
အလုံမွဲကၟိန်ဍုၚ်လေဝ် ဒက်ပ္တန်ကၠုၚ် ဒပ်ပၞာန်စဵုဒၞာညးဍုၚ်ကွာန် (PDF) တံဒပ် ၂၉၃ တံဒပ် မာန်ကၠုၚ်တုဲ သွက်ဂွံသ္ပဒ္တန် နဒဒှ်တံဒပ်ဂှ် အပံၚ်လၟိဟ်တံဒပ် ၆၈ တံဒပ် ဃောစၟဳစၟတ်ဒၟံၚ် နွံရဂှ် ဓမံက်လဝ် ပ္ဍဲလိက်ဒုၚ်စဳရေၚ် NUG ပေၚ် ၜါသၞာံဂှ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – NUG
sanlontai